രമേശ് ചെന്നിത്തലയുടെ പേഴ്സണൽ സ്റ്റാഫ് നിയമനത്തിനെതിരെ ഡി.വൈ.എഫ്.ഐ സംസ്ഥാന സെക്രട്ടറി വി.കെ. സനോജ് രംഗത്ത്. കഞ്ചാവ് കേസിലെ പ്രതിയുടെ സഹോദരനെ പേഴ്സണൽ സ്റ്റാഫ് അംഗമാക്കിയെന്നാണ് അദ്ദേഹം ആരോപിച്ചത്. യൂത്ത് കോൺഗ്രസ് നേതാവായ നഹാസ് പത്തനംതിട്ടയെയാണ് പേഴ്സണൽ സ്റ്റാഫിൽ ഉൾപ്പെടുത്തിയിരിക്കുന്നതെന്നും, കഞ്ചാവ് കേസ് സമഗ്രമായി അന്വേഷിച്ചാൽ നഹാസും കേസിൽ പ്രതിയാകുമെന്നുമാണ് സനോജിന്റെ ആരോപണം.
‘ഓപ്പറേഷൻ തൂഫാൻ’ പോലുള്ള നടപടികൾക്ക് നേതൃത്വം നൽകുന്ന ഓഫീസിലാണ് കഞ്ചാവ് കേസിലെ പ്രതിയുടെ ബന്ധുവിനെ നിയമിച്ചിരിക്കുന്നതെന്നും അദ്ദേഹം വിമർശിച്ചു.
യുഡിഎഫ് സർക്കാർ നിയമനങ്ങളിൽ സ്വന്തക്കാരെ തിരുകിക്കയറ്റുകയാണെന്നും, ഇത് ആർഎസ്എസ്–യുഡിഎഫ് ധാരണയുടെ ഭാഗമാണെന്നും വി.കെ. സനോജ് ആരോപിച്ചു. ബി. അശോകിനെ ഉന്നത വിദ്യാഭ്യാസ സെക്രട്ടറിയായി നിയമിച്ചതും ഇത്തരം ഒരു ധാരണയുടെ ഭാഗമാണോയെന്ന് അദ്ദേഹം ചോദിച്ചു. ബി. അശോകിന്റെ മുൻകാല നിലപാടുകൾ പരിശോധിച്ചാൽ അദ്ദേഹത്തിന് സംഘപരിവാർ ബന്ധമുണ്ടെന്ന് വ്യക്തമാകുമെന്നും സനോജ് പറഞ്ഞു.
കേരളത്തിലെ ജനങ്ങൾക്ക് ഈ ‘ഡീലിന്റെ’ യഥാർത്ഥ സ്വഭാവം അറിയാൻ താൽപര്യമുണ്ടെന്നും അദ്ദേഹം കൂട്ടിച്ചേർത്തു. ആർഎസ്എസിന്റെ പരിപാടിയിൽ സർവകലാശാല വൈസ് ചാൻസലർമാർ പങ്കെടുത്തത് എന്ത് അടിസ്ഥാനത്തിലാണെന്നും അദ്ദേഹം ചോദ്യം ചെയ്തു.
യുഡിഎഫും ആർഎസ്എസും തമ്മിലുള്ള ബന്ധത്തിന്റെ തെളിവുകൾ ഓരോ ദിവസവും പുറത്തുവരുകയാണെന്നും, വി.സിമാരോട് മാപ്പ് പറയാൻ ആവശ്യപ്പെട്ടത് മാത്രം പോരെന്നും സനോജ് വ്യക്തമാക്കി.
