ഇറാന്റെ പരമോന്നത നേതാവായ ആയത്തുള്ള അലി ഖമേനിയുടെ സംസ്കാരച്ചടങ്ങിൽ രാജ്യത്തെ ഉന്നത നേതാക്കൾ ഒന്നിച്ചുകൂടിയത് അമേരിക്കയ്ക്ക് ഒരു “വലിയ സൈനിക അവസരമായിരുന്നു” എന്ന് യു.എസ് പ്രസിഡന്റ് ഡൊണാൾഡ് ട്രംപ്. എന്നാൽ നിലവിൽ തുടരുന്ന നയതന്ത്ര ചർച്ചകൾ പരിഗണിച്ചാണ് അത്തരം നടപടികളിലേക്ക് അമേരിക്ക കടക്കാതിരുന്നതെന്നും അദ്ദേഹം അവകാശപ്പെട്ടു.
അമേരിക്കൻ മാധ്യമമായ ആക്സിയോസിന് നൽകിയ അഭിമുഖത്തിലാണ് ട്രംപ് ഈ വിവാദ പരാമർശം നടത്തിയത്. ഖമേനിയുടെ സംസ്കാരച്ചടങ്ങുകൾ അമേരിക്ക സൂക്ഷ്മമായി നിരീക്ഷിച്ചിരുന്നുവെന്നും അദ്ദേഹം പറഞ്ഞു.
“ഇറാനിലെ പ്രധാന നേതാക്കളെല്ലാം ഒരിടത്ത് ഒത്തുകൂടിയിരുന്നു. ഒരൊറ്റ നീക്കത്തിലൂടെ അവരെയെല്ലാം ലക്ഷ്യമിടാനാകുമായിരുന്നു. പക്ഷേ അങ്ങനെ ചെയ്തിരുന്നെങ്കിൽ പിന്നീട് ചർച്ചകൾ നടത്താൻ ആരും അവശേഷിക്കുമായിരുന്നില്ല,” ട്രംപ് പറഞ്ഞു.
അമേരിക്കയുടെ 250-ാം സ്വാതന്ത്ര്യദിനത്തോടനുബന്ധിച്ച് വാഷിങ്ടണിൽ നടന്ന ‘സല്യൂട്ട് ടു അമേരിക്ക’ പരിപാടിയിലും ട്രംപ് ഇറാനെ പരിഹസിച്ചു. ഖമേനിയുടെ വിലാപയാത്രയുടെ പശ്ചാത്തലത്തിൽ ഇരുരാജ്യങ്ങളും ചർച്ചകൾക്ക് ഒരാഴ്ചത്തെ ഇടവേള നൽകിയിരിക്കുകയാണെന്നും അദ്ദേഹം പറഞ്ഞു.
ടെഹ്റാനിൽ നടന്ന സംസ്കാരച്ചടങ്ങിൽ ലക്ഷക്കണക്കിന് ആളുകൾ പങ്കെടുത്തത് ശ്രദ്ധേയമാണെങ്കിലും, ഇറാനിലെ ഭൂരിഭാഗം ജനങ്ങളും ഖമേനിക്ക് അനുകൂലരല്ലെന്നാണ് താൻ വിശ്വസിക്കുന്നതെന്നും ട്രംപ് പറഞ്ഞു.
“അവിടെ കണ്ട ചില പ്രതികരണങ്ങൾ വ്യാജക്കണ്ണീർ മാത്രമായിരിക്കാം,” എന്നായിരുന്നു ട്രംപിന്റെ പരാമർശം. അതേസമയം, അമേരിക്കയുമായി ഒരു നയതന്ത്ര കരാറിലെത്താൻ ഇറാൻ ഇപ്പോൾ വലിയ സമ്മർദത്തിലാണെന്നും അതിനായി ശ്രമിക്കുകയാണെന്നും ട്രംപ് അവകാശപ്പെട്ടു. ഖമേനിയുടെ സംസ്കാരച്ചടങ്ങുകൾ പൂർത്തിയാകുന്നതുവരെ ചർച്ചകൾക്ക് താൽക്കാലിക വിരാമം നൽകാൻ ഇരുപക്ഷവും ധാരണയിലെത്തിയിട്ടുണ്ടെന്നും ഈ കാലയളവിൽ പരസ്പരം സൈനിക നടപടികൾ ഒഴിവാക്കുമെന്നും ട്രംപ് വ്യക്തമാക്കി.
ട്രംപിന്റെ പുതിയ പ്രസ്താവനകൾ ഇറാൻ–അമേരിക്ക ബന്ധത്തിലെ സംഘർഷം വീണ്ടും രാഷ്ട്രീയ ചർച്ചകൾക്ക് വഴിവെച്ചിരിക്കുകയാണ്. ഖമേനിയുടെ മരണാനന്തര സാഹചര്യത്തിൽ പശ്ചിമേഷ്യയിലെ ശക്തിസമവാക്യങ്ങൾ എങ്ങോട്ട് നീങ്ങുമെന്നത് ആഗോളതലത്തിൽ ഉറ്റുനോക്കപ്പെടുകയാണ്.
