ആഗോള എണ്ണ-വാതക വ്യാപാരത്തിലെ നിർണായക ജലപാതയായ ഹോർമുസ് കടലിടുക്കിലൂടെ സഞ്ചരിക്കുന്ന വാണിജ്യ കപ്പലുകളിൽ നിന്ന് സേവന ഫീസ് ഈടാക്കുമെന്ന് ഇറാൻ പ്രഖ്യാപിച്ചു. അമേരിക്കയുമായുള്ള 60 ദിവസത്തെ സൗജന്യ ഗതാഗത കരാർ അവസാനിച്ചതിന് ശേഷമാകും പുതിയ സംവിധാനം പ്രാബല്യത്തിൽ വരിക. അതേസമയം, സൗഹൃദ രാജ്യങ്ങൾക്ക് പ്രത്യേക ഇളവുകൾ നൽകുമെന്നും ഇറാൻ അറിയിച്ചു.
ചൈനയിലെ ലോക സമാധാന ഫോറത്തിൽ സംസാരിച്ച ഇറാൻ അംബാസഡർ അബ്ദുൾറെസ റഹ്മാനി ഫസ്ലിയാണ് ഇക്കാര്യം വ്യക്തമാക്കിയത്. കപ്പൽ സുരക്ഷ, ഗതാഗത നിരീക്ഷണം, പരിസ്ഥിതി സംരക്ഷണം തുടങ്ങിയ സേവനങ്ങൾക്കായുള്ള ഫീസാണിതെന്നും ഇത് ടോൾ ഫീസായി കാണരുതെന്നും അദ്ദേഹം പറഞ്ഞു. പുതിയ സംവിധാനത്തിന്റെ ഭാഗമായി ഒമാനുമായി സഹകരിച്ച് പ്രവർത്തിക്കുമെന്നും അദ്ദേഹം കൂട്ടിച്ചേർത്തു.
അമേരിക്ക-ഇറാൻ സംഘർഷത്തെ തുടർന്ന് ഈ വർഷം ആദ്യം ഹോർമുസ് കടലിടുക്കിലെ ഗതാഗതം തടസപ്പെട്ടിരുന്നു. തുടർന്ന് വെടിനിർത്തലും അനുരഞ്ജനവും ഉണ്ടായതോടെ 60 ദിവസത്തേക്ക് കപ്പലുകൾക്ക് സൗജന്യ യാത്രയ്ക്ക് അനുമതി നൽകിയിരുന്നു. എന്നാൽ, കടലിടുക്ക് അന്താരാഷ്ട്ര കപ്പൽഗതാഗതത്തിന് തുറന്നിടണമെന്ന നിലപാടിലാണ് അമേരിക്ക.
ഇറാന്റെ പുതിയ പ്രഖ്യാപനം ആഗോള ഷിപ്പിംഗ് ചെലവുകളിലും എണ്ണവിലയിലും എന്ത് സ്വാധീനം ചെലുത്തുമെന്നതാണ് ഇപ്പോൾ അന്താരാഷ്ട്ര വിപണികൾ ശ്രദ്ധയോടെ നിരീക്ഷിക്കുന്നത്.
