തമിഴ്നാട്ടിലെ തിരുവാരൂരിന് സമീപം അമ്മയപ്പൻ ഗ്രാമത്തിൽ ഒരു മകന്റെ അമ്മയോടുള്ള സ്നേഹത്തിന്റെ പ്രതീകമായി നിർമ്മിച്ച സ്മാരകം വലിയ ജനശ്രദ്ധ നേടുന്നു. “തെക്കൻ താജ്മഹൽ” എന്നറിയപ്പെടുന്ന ഈ നിർമ്മിതി കാണാൻ സംസ്ഥാനത്തിനകത്തുനിന്നും രാജ്യത്തിന്റെ വിവിധ ഭാഗങ്ങളിൽ നിന്നുമായി നിരവധി പേർ എത്തുകയാണ്.
ചെന്നൈയിൽ താമസിക്കുന്ന ബിസിനസുകാരനായ അമുർദീൻ (49) ആണ് തന്റെ അമ്മ ജൈലാനി ബീവിയുടെ സ്മരണയ്ക്കായി ഈ സ്മാരകം പണിതത്. അച്ഛൻ ഷെയ്ഖ് ദാവൂദിന്റെ മരണത്തിന് ശേഷമാണ് അമ്മയെ കൂടെയുണ്ടായിരുന്നത്. 2020-ൽ അമ്മ അന്തരിച്ചതോടെ, അവർക്കായി ശ്രദ്ധേയമായ ഒരു സ്മാരകം നിർമ്മിക്കണമെന്ന ആഗ്രഹം അദ്ദേഹം പ്രകടിപ്പിച്ചു.
മുൻ ഡിഎംകെ നേതാവ് എം. കരുണാനിധി തന്റെ അമ്മയ്ക്ക് നിർമിച്ച സ്മാരകത്തിൽ നിന്ന് പ്രചോദനം ഉൾക്കൊണ്ടാണ് അമുർദീൻ ഈ പദ്ധതിയുമായി മുന്നോട്ട് പോയത്. രാജസ്ഥാനിൽ നിന്ന് കൊണ്ടുവന്ന വെളുത്ത മാർബിൾ കല്ലുകൾ ഉപയോഗിച്ച് മുഗൾ ശൈലിയിലുള്ള താജ്മഹൽ മാതൃകയിൽ നിർമ്മിച്ച ഈ സ്മാരകം ഏകദേശം ഒരു ഏക്കർ സ്ഥലത്ത് 8,000 ചതുരശ്ര അടി വിസ്തൃതിയിലാണ് നിലകൊള്ളുന്നത്. 46 അടി വീതിയുള്ള ഘടനയ്ക്ക് ഉയർന്ന മിനാരങ്ങളും സവിശേഷതയാണ്.
2022 ജൂൺ 2-ന് ലളിതമായ ചടങ്ങിൽ ഉദ്ഘാടനം ചെയ്ത സ്മാരക സമുച്ചയത്തിൽ ജൈലാനി ബീവിയുടെ സ്മാരക പള്ളി, ഒരു വലിയ മസ്ജിദ്, വിദ്യാർത്ഥികൾക്ക് താമസിച്ച് പഠിക്കാനാവുന്ന മദ്രസ എന്നിവയും ഉൾപ്പെടുന്നു.
യഥാർത്ഥ താജ്മഹൽ കാണാൻ എല്ലാവർക്കും സാധിക്കാത്ത സാഹചര്യത്തിൽ, ദക്ഷിണ തമിഴ്നാട്ടിലെ ആദ്യത്തെ വെള്ളമാർബിൾ താജ്മഹൽ മാതൃക സ്മാരകമായി ഇത് മാറിയിട്ടുണ്ട്. തുറന്നതിന് പിന്നാലെ തന്നെ ആയിരക്കണക്കിന് സന്ദർശകർ ഇവിടെ എത്തി.
വേനൽക്കാല അവധിക്കാലം തുടങ്ങിയതോടെ സന്ദർശകരുടെ എണ്ണം കൂടി. ചൂടിനെ നേരിടാൻ എത്തുന്നവർക്കായി സൗജന്യമായി മോര്, സുണ്ടൽ, നിലക്കടല മിഠായി എന്നിവയും ഒരുക്കിയിട്ടുണ്ട്. ജാതി-മത ഭേദമില്ലാതെ എല്ലാവർക്കും പ്രവേശനം അനുവദിച്ചിരിക്കുന്നതും പ്രത്യേകതയാണ്.
കുടുംബസമേതം എത്തുന്നവർ ഇവിടെ ഫോട്ടോകൾ എടുത്ത് അനുഭവം ആസ്വദിക്കുന്നതായി കാണാം. പ്രത്യേകിച്ച് ആഗ്ര സന്ദർശിക്കാൻ അവസരം ലഭിക്കാത്തവർക്ക് ഈ സ്മാരകം വേറിട്ട അനുഭവമാണ് സമ്മാനിക്കുന്നത്.
അമ്മയോടുള്ള സ്നേഹത്തിന്റെയും ആദരവിന്റെയും പ്രതീകമായി ഇത്തരമൊരു സ്മാരകം നിർമിച്ച അമുർദീനെ പലരും അഭിനന്ദിക്കുന്നു.
