വയനാട് ജില്ലയിലെ കള്ളാടി തുരങ്കപാത നിർമാണ സ്ഥലത്തിന് സമീപം വൻ മണ്ണിടിച്ചിൽ. മീനാക്ഷിപാലത്തിന് സമീപം ഉണ്ടായ അപകടത്തിൽ നിരവധി പേർ മണ്ണിനടിയിൽ കുടുങ്ങിയിട്ടുണ്ടെന്ന ആശങ്ക ഉയർന്നിട്ടുണ്ട്. ഇതിനിടെ മണ്ണിനടിയിൽപ്പെട്ട അഞ്ച് പേരെ രക്ഷാപ്രവർത്തകർ സുരക്ഷിതമായി പുറത്തെടുത്തതായി അധികൃതർ അറിയിച്ചു.
പാലത്തിനടുത്തുള്ള കുന്നിന്റെ വലിയൊരു ഭാഗമാണ് ഇടിഞ്ഞുവീണ് റോഡിലേക്കും സമീപത്തെ പുഴയിലേക്കും ഒഴുകിയിറങ്ങിയത്. മണ്ണിടിച്ചിലിനെ തുടർന്ന് പ്രദേശത്ത് ഗതാഗതം തടസപ്പെടുകയും നിരവധി വാഹനങ്ങൾ കുടുങ്ങിക്കിടക്കുകയും ചെയ്തിട്ടുണ്ട്. നിർമാണ പ്രവർത്തനങ്ങൾ നടന്നുകൊണ്ടിരുന്ന സ്ഥലത്ത് ജോലി ചെയ്തിരുന്ന ഒരു തൊഴിലാളിയെയും മണ്ണിനടിയിൽ നിന്ന് രക്ഷപ്പെടുത്തിയിട്ടുണ്ട്.
സംഭവത്തെ തുടർന്ന് മുഖ്യമന്ത്രി വി.ഡി. സതീശൻ സ്ഥിതിഗതികൾ വിലയിരുത്തി. വയനാട് ജില്ലാ കളക്ടറുമായി ഫോണിൽ സംസാരിച്ച മുഖ്യമന്ത്രി അടിയന്തര രക്ഷാപ്രവർത്തനങ്ങൾ ശക്തമാക്കാൻ നിർദേശം നൽകി. മീനങ്ങാടിയിൽ നിന്നുള്ള എൻഡിആർഎഫ് സംഘത്തോട് ഉടൻ സ്ഥലത്തെത്താൻ നിർദേശിച്ചിട്ടുണ്ടെന്നും കോഴിക്കോട്ടുള്ള എൻഡിആർഎഫ് യൂണിറ്റിനോടും വയനാട്ടിലേക്ക് തിരിക്കാനാണ് നിർദേശം നൽകിയിരിക്കുന്നതെന്നും മുഖ്യമന്ത്രിയുടെ ഓഫീസ് അറിയിച്ചു.
മന്ത്രിമാരായ ടി. സിദ്ദിഖും എ.പി. അനിൽ കുമാറും സംഭവസ്ഥലത്തേക്ക് തിരിച്ചിട്ടുണ്ട്. കൂടാതെ റാപിഡ് റെസ്പോൺസ് ടീമിനും പ്രദേശത്തേക്ക് നീങ്ങാൻ നിർദേശം നൽകിയതായി മന്ത്രി ടി. സിദ്ദിഖ് അറിയിച്ചു.
പ്രദേശത്ത് ഇന്നലെയും അതിതീവ്ര മഴയാണ് രേഖപ്പെടുത്തിയിരുന്നത്. ഇപ്പോഴും ശക്തമായ മഴ തുടരുന്നതിനാൽ രക്ഷാപ്രവർത്തനങ്ങൾക്ക് വെല്ലുവിളി നേരിടുന്നുണ്ട്. മണ്ണിടിച്ചിൽ ഉണ്ടായ സമയത്ത് പാലത്തിലൂടെ വാഹനങ്ങളോ യാത്രക്കാരോ കടന്നുപോയിരുന്നോയെന്ന കാര്യത്തിലും ആശങ്ക നിലനിൽക്കുകയാണ്.
തിരുവമ്പാടി എംഎൽഎ സി.കെ. കാസിം അടിയന്തര രക്ഷാപ്രവർത്തനങ്ങൾ ആരംഭിച്ചതായി അറിയിച്ചു. അതേസമയം, നിരവധി പേർ മണ്ണിനടിയിൽ കുടുങ്ങിയിരിക്കാമെന്നാണ് പ്രദേശവാസികളും മുൻ പഞ്ചായത്ത് അംഗം അബ്ദുൾ സലാമും പറയുന്നത്. മണ്ണിടിച്ചിലിൽ ബസ് സ്റ്റോപ്പ് തകർന്നതായും പാലത്തിന് മുകളിൽ വലിയ തോതിൽ മണ്ണ് അടിഞ്ഞുകൂടിയതായും അദ്ദേഹം പറഞ്ഞു. പാലത്തിന് കേടുപാടുകൾ സംഭവിച്ചിട്ടുണ്ടോയെന്ന് പരിശോധിച്ചുവരികയാണ്.
സുരക്ഷാ മുൻകരുതലിന്റെ ഭാഗമായി അപകട മേഖലക്ക് സമീപമുള്ള വീടുകളിൽ താമസിച്ചിരുന്നവരെ മാറ്റിപ്പാർപ്പിച്ചിട്ടുണ്ട്. നിർമാണ തൊഴിലാളികൾ ഉൾപ്പെടെ കൂടുതൽ പേർ പ്രദേശത്തുണ്ടായിരുന്നുവെന്നതിനാൽ വ്യാപകമായ തിരച്ചിലാണ് പുരോഗമിക്കുന്നത്. എൻഡിആർഎഫ്, അഗ്നിരക്ഷാസേന, പൊലീസ്, റവന്യൂ വകുപ്പ് എന്നിവയുടെ നേതൃത്വത്തിൽ രക്ഷാപ്രവർത്തനം തുടരുകയാണ്.
