പാക് അധീന കശ്മീരിൽ പാകിസ്ഥാൻ സർക്കാരിനെതിരായ പ്രതിഷേധം ശക്തമാകുന്നു. റാവൽപിണ്ടിയിലെ ഈദ്ഗാഹ് മൈതാനിയിൽ കഴിഞ്ഞ 22 ദിവസമായി ആയിരക്കണക്കിന് ആളുകൾ പ്രതിഷേധ സമരം തുടരുകയാണ്. മേഖലയിലെ രാഷ്ട്രീയ, സാമ്പത്തിക പ്രശ്നങ്ങൾ പരിഹരിക്കണമെന്നാവശ്യപ്പെട്ടാണ് വിവിധ സംഘടനകളുടെയും പൗരാവകാശ പ്രവർത്തകരുടെയും നേതൃത്വത്തിൽ പ്രതിഷേധം നടക്കുന്നത്.
പാക് അധീന കശ്മീർ പാകിസ്ഥാന്റെ ഭാഗമല്ലെന്നും പ്രദേശത്തിന്റെ ഭാവിയെക്കുറിച്ചുള്ള തീരുമാനങ്ങൾ പ്രാദേശിക ജനങ്ങളുടെ താൽപര്യങ്ങൾ പരിഗണിച്ചായിരിക്കണമെന്നും പ്രതിഷേധക്കാർ ആവശ്യപ്പെടുന്നു. സമരത്തിൽ പങ്കെടുത്ത പൗരാവകാശ പ്രവർത്തകൻ സർദാർ അമൻ ഖാൻ, പാകിസ്ഥാൻ സർക്കാരിനെതിരെ രൂക്ഷ വിമർശനമാണ് ഉന്നയിച്ചത്. ഭക്ഷണവും അവശ്യസാധനങ്ങളുടെയും വിതരണം തടസ്സപ്പെടുത്തുന്ന നടപടികൾ തുടരുകയാണെങ്കിൽ ഇന്ത്യയിലേക്കുള്ള അതിർത്തി തുറക്കണമെന്ന ആവശ്യം ശക്തമാക്കുമെന്ന് അദ്ദേഹം മുന്നറിയിപ്പ് നൽകി.
പാകിസ്ഥാൻ സർക്കാരിന്റെ ഭരണപരമായ വീഴ്ചകൾ, കടുത്ത സാമ്പത്തിക പ്രതിസന്ധി, ഉയർന്ന പണപ്പെരുപ്പം, ജനങ്ങളുടെ അടിസ്ഥാന ആവശ്യങ്ങൾ നിറവേറ്റുന്നതിലെ പരാജയം എന്നിവയാണ് പ്രതിഷേധത്തിന് കാരണമായതെന്ന് സമരക്കാർ ആരോപിക്കുന്നു. കഴിഞ്ഞ ദിവസങ്ങളിൽ ഭക്ഷ്യവിതരണത്തിലും മറ്റ് അവശ്യ സേവനങ്ങളിലും ഉണ്ടായ തടസ്സങ്ങൾ ജനരോഷം വർധിപ്പിച്ചതായും അവർ പറയുന്നു.
പ്രതിഷേധങ്ങളുടെ വിവരങ്ങൾ പുറംലോകത്തേക്ക് എത്തുന്നത് തടയാൻ ജൂൺ 5 മുതൽ പ്രദേശത്തെ ഇന്റർനെറ്റ് സേവനങ്ങൾ നിയന്ത്രിച്ചതായും സമരക്കാർ ആരോപിച്ചു. ജൂൺ 9 മുതൽ നിയന്ത്രണരേഖയ്ക്ക് സമീപ പ്രദേശങ്ങളിലും സമാന പ്രതിഷേധങ്ങൾ തുടരുകയാണ്.
വിദേശ രാജ്യങ്ങളിലെ പാകിസ്ഥാൻ എംബസികൾക്ക് മുന്നിലും കശ്മീരി സംഘടനകൾ പിന്തുണാ പ്രതിഷേധങ്ങൾ സംഘടിപ്പിക്കുന്നതായി റിപ്പോർട്ടുകളുണ്ട്. മുസാഫറാബാദ് ഉൾപ്പെടെയുള്ള പ്രദേശങ്ങളുമായി ബന്ധപ്പെട്ട രാഷ്ട്രീയ ആവശ്യങ്ങൾ അംഗീകരിക്കുന്നതുവരെ സമരം അവസാനിപ്പിക്കില്ലെന്നാണ് പ്രതിഷേധക്കാരുടെ നിലപാട്.
