നടി അൻസിബ ഹസന്റെ പരാതിയിൽ നടൻ ടിനി ടോംക്കെതിരെ കടവന്ത്ര പൊലീസ് കേസ് രജിസ്റ്റർ ചെയ്തു. വർഗീയ അധിക്ഷേപവും സ്ത്രീത്വത്തെ അപമാനിച്ചതും ഉൾപ്പെടെയുള്ള ആരോപണങ്ങളിലാണ് ജാമ്യമില്ലാ വകുപ്പുകൾ പ്രകാരം കേസ് എടുത്തിരിക്കുന്നത്.
അൻസിബ നൽകിയ പരാതിയിൽ കേസ് എടുക്കാനാകില്ലെന്ന പൊലീസ് റിപ്പോർട്ട് അപൂർണമാണെന്ന് കോടതി നേരത്തെ നിരീക്ഷിച്ചിരുന്നു. അൻസിബയ്ക്കെതിരായ ‘ജിഹാദി’ പരാമർശം തമാശയുടെ ഭാഗമാണെന്ന പൊലീസ് വിശദീകരണവും കോടതി തള്ളുകയായിരുന്നു.
പ്രഥമദൃഷ്ട്യാ ടിനി ടോമിനെതിരെ തെളിവുകളുണ്ടെന്നും നടി നീന കുറുപ്പ് നൽകിയ സാക്ഷിമൊഴിയിലും ഇക്കാര്യങ്ങൾ പരാമർശിക്കുന്നുണ്ടെന്നും കോടതി ഉത്തരവിൽ വ്യക്തമാക്കിയിട്ടുണ്ട്. ഇതിനെ തുടർന്നാണ് പൊലീസ് കേസ് രജിസ്റ്റർ ചെയ്തത്.
അൻസിബയുടെ പരാതിയിൽ വിശദമായ അന്വേഷണം നടത്തണമെന്നും കോടതി നിർദേശിച്ചിട്ടുണ്ട്. ബിഎൻഎസ് 173(5) പ്രകാരം കേസ് രജിസ്റ്റർ ചെയ്യാൻ എറണാകുളം ജില്ലാ അഡീഷണൽ സെഷൻസ് കോടതിയുടെ നിർദേശത്തെ തുടർന്നാണ് കടവന്ത്ര പൊലീസ് നടപടി സ്വീകരിച്ചത്.
കേസുമായി ബന്ധപ്പെട്ട കൂടുതൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
