ഇറാനും യുഎസും തമ്മിലുള്ള സംഘർഷം കടുത്തുവരുന്നതിനിടെ ഗൾഫ് മേഖലയിലെ വാണിജ്യ കപ്പലുകൾക്ക് നേരെയുള്ള ആക്രമണങ്ങൾ വീണ്ടും ആശങ്ക ഉയർത്തുന്നു. ഒമാനിലെ ഷിനാസ് തുറമുഖത്തിന് സമീപം ഇന്ത്യൻ ജീവനക്കാരുമായി സഞ്ചരിച്ചിരുന്ന ഒരു ടാങ്കർ കപ്പലിന് നേരെയും ആക്രമണം ഉണ്ടായതായി റിപ്പോർട്ട് ചെയ്തു.
ഒമാനിലെ ഇന്ത്യൻ എംബസി സംഭവത്തിന്റെ സ്ഥിരീകരണം നൽകിയിട്ടുണ്ട്. പ്രാദേശിക അധികാരികളുമായി ബന്ധപ്പെടുകയും സ്ഥിതിഗതികൾ സൂക്ഷ്മമായി നിരീക്ഷിക്കുകയാണെന്നും എംബസി അറിയിച്ചു. ഗിനിയ-ബിസാവു പതാകയുള്ള ‘ ജൽവീർ ’ എന്ന ടാങ്കറാണ് ആക്രമണത്തിന് വിധേയമായത്. ഇന്ത്യൻ ജീവനക്കാരെ വഹിച്ചിരുന്ന കപ്പൽ ആക്രമിക്കപ്പെട്ടിട്ടും മുഴുവൻ ജീവനക്കാരും സുരക്ഷിതരാണെന്ന് പ്രാഥമിക റിപ്പോർട്ടുകൾ സൂചിപ്പിക്കുന്നു. സംഭവത്തെക്കുറിച്ചുള്ള കൂടുതൽ വിവരങ്ങൾ ഇപ്പോഴും ലഭ്യമല്ല.
കഴിഞ്ഞ ഒരാഴ്ചയ്ക്കുള്ളിൽ ഇന്ത്യൻ ജീവനക്കാരുള്ള കപ്പലുകൾ ലക്ഷ്യമിട്ട് നടന്ന മൂന്നാമത്തെ ആക്രമണമാണിത്. ഇറാൻ–യുഎസ് സംഘർഷം കൂടുതൽ വഷളാകുന്ന സാഹചര്യത്തിൽ മേഖലയിലെ സുരക്ഷാ സ്ഥിതി അതീവ സങ്കീർണ്ണമായിരിക്കുകയാണ്. ഒരു യുഎസ് സൈനിക ഹെലികോപ്റ്റർ തകർത്തതിനു പിന്നാലെ അമേരിക്കൻ സേന പ്രതികാര നടപടികൾ ആരംഭിച്ചതായി റിപ്പോർട്ടുണ്ട്. ഇതിന് മറുപടിയായി ഇറാൻ മിസൈലുകളും ഡ്രോണുകളും ഉപയോഗിച്ച് ആക്രമണം നടത്തിയതോടെ ഗൾഫ് മേഖലയിലെ സംഘർഷാവസ്ഥ കൂടുതൽ രൂക്ഷമായി.
ഇന്ത്യൻ ജീവനക്കാരുള്ള കപ്പലുകൾക്ക് നേരെയുണ്ടായ ആക്രമണങ്ങളെ കേന്ദ്ര വിദേശകാര്യ മന്ത്രാലയം ശക്തമായി അപലപിച്ചു. അന്താരാഷ്ട്ര ജലപാതകളിൽ സ്വതന്ത്രമായ നാവിഗേഷൻ തടസ്സപ്പെടുത്തരുതെന്ന് ഇന്ത്യ വ്യക്തമാക്കി. അതേസമയം, സംഘർഷം കുറയ്ക്കുന്നതിനും നയതന്ത്ര പരിഹാരത്തിലേക്കുള്ള അടിയന്തര ഇടപെടലുകൾ സ്വീകരിക്കണമെന്നും ഇന്ത്യ ആവശ്യപ്പെട്ടു. മേഖലയിൽ പ്രവർത്തിക്കുന്ന ഇന്ത്യൻ നാവികരുടെ സുരക്ഷ ഉറപ്പാക്കാൻ നിരന്തരം നിരീക്ഷണം തുടരുകയാണെന്നും അധികൃതർ അറിയിച്ചു.
