പശ്ചിമേഷ്യൻ രാജ്യങ്ങളിലെ സംഘർഷങ്ങളും അസ്ഥിരമായ ആഗോള സാമ്പത്തിക സാഹചര്യങ്ങളും കാരണം ആഗോള-ആഭ്യന്തര വിപണികളിൽ സ്വർണ്ണത്തിന്റെയും വെള്ളിയുടെയും വിലയിൽ വൻ ഇടിവ് രേഖപ്പെടുത്തി. തിങ്കളാഴ്ച മാത്രം ഇരു ലോഹങ്ങളുടെയും വിലയിൽ ഏകദേശം 4 ശതമാനത്തോളമാണ് കുറവുണ്ടായത്. അതേസമയം, രാജ്യാന്തര വിപണിയിൽ അസംസ്കൃത എണ്ണ വില കുത്തനെ ഉയരുകയും ചെയ്തു.
ഇന്ത്യൻ കമ്മോഡിറ്റി വിപണിയായ മൾട്ടി കമ്മോഡിറ്റി എക്സ്ചേഞ്ചിൽ സ്വർണ്ണ ഫ്യൂച്ചേഴ്സ് (ഓഗസ്റ്റ് കരാർ) 1.85 ശതമാനം (2,882 രൂപ) ഇടിഞ്ഞ് ഉച്ചയ്ക്ക് 12:30 ഓടെ 1,52,712 രൂപയെന്ന ഏറ്റവും താഴ്ന്ന നിലയിലെത്തി. തുടർന്ന് 1 ശതമാനത്തിലധികം ഇടിവോടെ 1,53,550 രൂപയിലാണ് വ്യാപാരം പുരോഗമിച്ചത്. വ്യാപാരത്തിനിടയിൽ 1,54,512 രൂപ വരെയുള്ള ഉയർന്ന നിരക്കും സ്വർണ്ണം രേഖപ്പെടുത്തിയിരുന്നു. സ്വർണ്ണത്തിന് പിന്നാലെ വെള്ളി ഫ്യൂച്ചേഴ്സിലും (ജൂലൈ കരാർ) വലിയ ഇടിവുണ്ടായി. വെള്ളി വില 3 ശതമാനത്തോളം (6,774 രൂപ) ഇടിഞ്ഞ് 2,41,763 രൂപയിലെത്തി. വ്യാപാരത്തിനിടയിലെ ഏറ്റവും താഴ്ന്ന നിരക്ക് 2,39,064 രൂപയും ഉയർന്ന നിരക്ക് 2,51,001 രൂപയുമായിരുന്നു.
അന്താരാഷ്ട്ര വിപണിയിലും വിലയേറിയ ലോഹങ്ങൾ വലിയ വില്പന സമ്മർദ്ദമാണ് നേരിടുന്നത്. കോമെക്സിൽ വെള്ളി വില 2.79 ശതമാനം ഇടിഞ്ഞ് ഔൺസിന് 67.17 ഡോളറിലും സ്വർണ്ണവില 1 ശതമാനം ഇടിഞ്ഞ് ഔൺസിന് 4,324.70 ഡോളറിലുമെത്തി.
യുഎസിലെ തൊഴിൽ ഡാറ്റ പ്രതീക്ഷിച്ചതിലും ശക്തമായതാണ് ഈ ഇടിവിന് പ്രധാന കാരണമെന്ന് ചരക്ക് വിശകലന വിദഗ്ധർ ചൂണ്ടിക്കാണിക്കുന്നു. യുഎസ് ഫെഡറൽ റിസർവ് പലിശനിരക്കുകൾ കൂടുതൽ കാലം ഉയർന്ന നിലയിൽ തന്നെ തുടരാൻ ഇത് കാരണമായേക്കുമെന്ന ആശങ്കയാണ് നിക്ഷേപകരെ മാറ്റിച്ചിന്തിപ്പിച്ചത്. പലിശനിരക്ക് ഉയർന്നു നിൽക്കുമ്പോൾ പലിശയിതര ആസ്തികളായ സ്വർണ്ണം, വെള്ളി എന്നിവയുടെ ആകർഷണം കുറയുകയാണ് പതിവ്. കൂടാതെ, യുഎസ്-ഇറാൻ ചർച്ചകളെക്കുറിച്ചുള്ള അനുകൂല സൂചനകൾ വിപണിയിലെ ആശങ്കകൾ ഒരു പരിധിവരെ ലഘൂകരിച്ചതും സ്വർണ്ണത്തിലേക്കുള്ള സുരക്ഷിത നിക്ഷേപ താല്പര്യത്തെ പിന്നോട്ടടിച്ചു.
സ്വർണ്ണവില കുറയുമ്പോഴും ആഗോള വിപണിയിൽ ക്രൂഡ് ഓയിൽ വില വലിയ തോതിൽ കുതിച്ചുയരുകയാണ്. ബ്രെന്റ് ക്രൂഡ് ഓയിൽ ഏകദേശം 4 ശതമാനം ഉയർന്ന് ബാരലിന് 96.90 ഡോളറിലെത്തി.
യുഎസ് വെസ്റ്റ് ടെക്സസ് ഇന്റർമീഡിയറ്റ് 4 ശതമാനത്തിലധികം ഉയർന്ന് ബാരലിന് 94.75 ഡോളറിലെത്തി. ആഗോള സാമ്പത്തിക അസ്ഥിരത ഏഷ്യൻ ഓഹരി വിപണികളെയും സാരമായി ബാധിച്ചു. ജപ്പാന്റെ ‘നിക്കി’ സൂചിക 4 ശതമാനവും, ദക്ഷിണ കൊറിയയുടെ ‘കോസ്പിഐ’ 5 ശതമാനവും, ഹോങ്കോങ്ങിന്റെ ‘ഹാങ് സെങ്’ 1 ശതമാനത്തോളവും ഇടിവോടെയാണ് തിങ്കളാഴ്ച വ്യാപാരം അവസാനിപ്പിച്ചത്.
