പാലക്കാട് എംഎൽഎ രാഹുൽ മാങ്കൂട്ടത്തിനെതിരെ മറ്റൊരു ഗുരുതരമായ പരാതിയും ഉയർന്നിരിക്കുകയാണ് . സംസ്ഥാനത്തിനു പുറത്തു താമസിക്കുന്ന 23-കാരിയാണ് ഇത് സംബന്ധിച്ച പരാതിയെഴുതിയത്. ഹോട്ടൽ മുറിയിൽ വിളിച്ചുവരുത്തി ക്രൂരമായി പീഡിപ്പിച്ചുവെന്നതാണ് യുവതി കോൺഗ്രസ് നേതൃത്വത്തിന് ഇ-മെയിൽ മുഖേന നൽകിയത്. രാഹുൽ ഗാന്ധി, പ്രിയങ്ക ഗാന്ധി, സണ്ണി ജോസഫ് എന്നിവർക്കാണ് പരാതിയെത്തിയത്. പരാതിയിൽ വളരെ നടുക്കം സൃഷ്ടിക്കുന്ന വിവരങ്ങളാണുണ്ടെന്ന് റിപ്പോർട്ടുകൾ പറയുന്നു.
വിവാഹ വാഗ്ദാനം നൽകിയായിരുന്നു ബന്ധം തുടങ്ങിയത് എന്നും പിന്നീട് തന്നെ പീഡിപ്പിച്ചുവെന്നുമാണ് യുവതി ആരോപിക്കുന്നത്. ഇൻസ്റ്റഗ്രാം വഴി പരിചയപ്പെട്ട രാഹുൽ പിന്നീട് ടെലിഗ്രാം വഴി മാത്രമായിരുന്നു ആശയവിനിമയം നടത്തിയതെന്നും, വിവാഹാഭിലാഷം രാഹുൽ തന്നെയാണ് പ്രകടിപ്പിച്ചതെന്നും പരാതിയിൽ പറയുന്നു. ഈ കാര്യം വീട്ടുകാർക്ക് പറഞ്ഞപ്പോൾ ആദ്യം അദ്ദേഹം രാഷ്ട്രീയ പ്രവർത്തകനായതിനാൽ അവർക്ക് സംശയം ഉണ്ടായിരുന്നുവെങ്കിലും, പാർട്ടിയിൽ ഭാവിയുള്ള ആളാണെന്ന് ഉറപ്പായതോടെ യൂത്ത് കോൺഗ്രസ് അധ്യക്ഷനായപ്പോൾ കുടുംബം സമ്മതം അറിയിച്ചതായും പരാതിയിൽ ഉണ്ട്. ഇതറിയിച്ചപ്പോൾ ഇരുവീട്ടുകാരും കൂടിക്കാഴ്ച നടത്താമെന്നായിരുന്നു രാഹുലിന്റെ പ്രതികരണമെന്നാണ് ആരോപണം.
അവധി സമയത്ത് നാട്ടിലെത്തിയപ്പോൾ ഭാവിയെ കുറിച്ച് സംസാരിക്കാനായി കാണണമെന്ന് രാഹുൽ ആവശ്യപ്പെട്ടുവെന്നും, സുഹൃത്ത് ഫെനി നൈനാൻ ഓടിച്ച കാറിൽ എത്തി നഗരത്തിന് പുറത്തുള്ള ഒരു ഹോംസ്റ്റേയിലേക്ക് കൊണ്ടുപോയതായും യുവതി പറയുന്നു. അവിടെയായിരുന്നു പീഡനം നടന്നതെന്ന് അവളുടെ ആരോപണം. ശേഷം ഫെനി വീട്ടിനടുത്തുള്ള വഴിയിൽ ഇറക്കി വിട്ടുവെന്നും, ശാരീരികമായോ മാനസികമായോ അവസ്ഥയെക്കുറിച്ച് ഒരുവാക്കുപോലും ചോദിക്കാതെയായിരുന്നുവെന്നും പരാതിയിൽ പറയുന്നു.
സംഭവം രണ്ടുവർഷം മുമ്പാണ് നടന്നതെന്നാണ് വാദം. പീഡനത്തിന് ശേഷം പാനിക് അറ്റാക്ക് അനുഭവപ്പെട്ടതായും, മരുന്ന് കഴിക്കുന്നതിന് മുമ്പുതന്നെ വീണ്ടും ആക്രമണം നേരിട്ടുവെന്നുമാണ് ആരോപണം. പൊതുപ്രവർത്തകനെന്ന നിലയിൽ പ്രതീക്ഷിക്കപ്പെടുന്ന ഉത്തരവാദിത്വങ്ങൾക്ക് വിപരീതമായ പെരുമാറ്റമാണ് രാഹുലിന്റേതെന്ന് യുവതി പരാതിയിൽ ചൂണ്ടിക്കാട്ടുന്നു.
(മുകളിലെ വിവരങ്ങൾ എല്ലാം പരാതിയിൽ ഉന്നയിക്കപ്പെട്ട ആരോപണങ്ങളാണ്; ഇതിൽ ഒന്നും നിയമപരമായി തെളിയിച്ച സംഭവങ്ങളല്ല.)
