ചോദ്യപേപ്പർ ചോർച്ചയും വ്യാപകമായ ക്രമക്കേടുകളും ആരോപിച്ച് NEET-UG 2026 റദ്ദാക്കിയതിനെ തുടർന്ന് ദേശീയ മെഡിക്കൽ പ്രവേശന പരീക്ഷ പൂർണ്ണമായും നിർത്തലാക്കണമെന്ന് ആവശ്യപ്പെട്ട് തമിഴ്നാട് മുഖ്യമന്ത്രി ജോസഫ് വിജയ് രംഗത്തെത്തി. നീറ്റ് സംവിധാനത്തിനെതിരായ നിലപാട് കൂടുതൽ കടുപ്പിച്ചാണ് അദ്ദേഹം പ്രതികരിച്ചത്.
പരീക്ഷാ സംവിധാനത്തിലെ ഗുരുതരമായ ഘടനാപരമായ പിഴവുകളുടെ തെളിവായാണ് പുതിയ വിവാദത്തെ മുഖ്യമന്ത്രി വിശേഷിപ്പിച്ചത്. ദേശീയ തലത്തിലുള്ള ഏക പ്രവേശന പരീക്ഷയ്ക്ക് പകരം 12-ാം ക്ലാസ് മാർക്കിന്റെ അടിസ്ഥാനത്തിൽ മെഡിക്കൽ പ്രവേശനം അനുവദിക്കണമെന്ന് സംസ്ഥാനങ്ങൾക്ക് സ്വാതന്ത്ര്യം നൽകണമെന്നും അദ്ദേഹം ആവശ്യപ്പെട്ടു.
രാജ്യവ്യാപകമായി ലക്ഷക്കണക്കിന് വിദ്യാർത്ഥികളെ ബാധിക്കുന്ന നീറ്റ് പരീക്ഷ ആവർത്തിച്ച് വിവാദങ്ങളിൽപ്പെടുന്നത് വിദ്യാർത്ഥികളുടെയും രക്ഷിതാക്കളുടെയും വിശ്വാസം തകർക്കുന്നതാണെന്നും അദ്ദേഹം ചൂണ്ടിക്കാട്ടി. ഗ്രാമപ്രദേശങ്ങൾ, സർക്കാർ സ്കൂളുകൾ, തമിഴ് മീഡിയം വിദ്യാർത്ഥികൾ, സാമ്പത്തികമായി പിന്നാക്കം നിൽക്കുന്നവർ എന്നിവർക്ക് ഈ സംവിധാനം അനുകൂലമല്ലെന്നും അദ്ദേഹം പറഞ്ഞു.
പരീക്ഷാ ക്രമക്കേടുകളുമായി ബന്ധപ്പെട്ട ആരോപണങ്ങൾ ഉയർന്നതിനെ തുടർന്ന് കേസ് സിബിഐയ്ക്ക് കൈമാറിയിട്ടുണ്ട്. മുൻവർഷങ്ങളിലും സമാന വിവാദങ്ങൾ ഉണ്ടായിരുന്നുവെന്നും, പരിഷ്കാരങ്ങൾക്കായി ഉയർന്നതല സമിതി ശുപാർശകൾ നൽകിയിരുന്നുവെന്നും മുഖ്യമന്ത്രി ഓർമ്മിപ്പിച്ചു.
ചെലവേറിയ കോച്ചിംഗ് കേന്ദ്രങ്ങളും നഗര വിദ്യാഭ്യാസ സൗകര്യങ്ങളും ഉള്ള വിദ്യാർത്ഥികൾക്ക് കൂടുതൽ അനുകൂലമായ സംവിധാനമായി നീറ്റ് മാറിയതായി അദ്ദേഹം വിമർശിച്ചു. തിരഞ്ഞെടുപ്പ് പ്രചാരണകാലം മുതൽ തന്നെ നീറ്റിനെതിരെ ശക്തമായ നിലപാട് സ്വീകരിച്ചിരുന്ന വിജയ് , സംസ്ഥാനത്തിന്റെ ആവശ്യം തുടരുമെന്നും വ്യക്തമാക്കി.
