സിഎംആർഎൽ-എക്സാലോജിക് കേസുമായി ബന്ധപ്പെട്ട് പ്രതിപക്ഷ നേതാവ് പിണറായി വിജയന്റെ വസതികളിൽ എൻഫോഴ്സ്മെന്റ് ഡയറക്ടറേറ്റ് നടത്തിയ റെയ്ഡിൽ നിലപാട് വ്യക്തമാക്കാതെ മുഖ്യമന്ത്രി വി.ഡി. സതീശൻ. ഡൽഹിയിലും കൊച്ചിയിലുമായി പലതവണ മാധ്യമങ്ങൾ പ്രതികരണത്തിനായി സമീപിച്ചെങ്കിലും മുഖ്യമന്ത്രി വിഷയത്തിൽ മൗനം തുടരുകയാണ്.
മുഖ്യമന്ത്രി വി.ഡി. സതീശൻ അടുത്തിടെ ഡൽഹിയിൽ കേന്ദ്രമന്ത്രിമാരുമായി നടത്തിയ കൂടിക്കാഴ്ചയ്ക്ക് തൊട്ടുപിന്നാലെയാണ് റെയ്ഡ് നടന്നതെന്നതിനാൽ, ഈ നീക്കത്തിന് പിന്നിൽ കൃത്യമായ രാഷ്ട്രീയ ഗൂഢാലോചനയുണ്ടെന്നാണ് സി.പി.ഐ.എം ആരോപിക്കുന്നത്. എന്നാൽ സി.പി.ഐ.എമ്മിന്റെ കടുത്ത രാഷ്ട്രീയ ആരോപണങ്ങളോടും പ്രതികരിക്കാൻ മുഖ്യമന്ത്രി ഇതുവരെ തയ്യാറായിട്ടില്ല.
വിഷയത്തിൽ മുഖ്യമന്ത്രി പുലർത്തുന്ന മൗനം കോൺഗ്രസിനും യു.ഡി.എഫിനും ഉള്ളിൽ തന്നെ ഇപ്പോൾ വലിയ ചർച്ചകൾക്ക് വഴിവെച്ചിട്ടുണ്ട്. ഇതിന് പിന്നാലെ മുൻനിര യു.ഡി.എഫ് നേതാവും മുസ്ലിം ലീഗ് ജനറൽ സെക്രട്ടറിയുമായ പി.കെ. കുഞ്ഞാലിക്കുട്ടിയും ഇഡി റെയ്ഡിനെക്കുറിച്ച് മാധ്യമങ്ങളോട് പ്രതികരിക്കാൻ തയ്യാറാകാതിരുന്നത് രാഷ്ട്രീയ കേന്ദ്രങ്ങളിൽ ശ്രദ്ധേയമായി.
അതേസമയം, റെയ്ഡിനിടെ ഇഡി ഉദ്യോഗസ്ഥരെ റോഡിൽ തടയുകയും ആക്രമിക്കാൻ ശ്രമിക്കുകയും ചെയ്ത സി.പി.ഐ.എം പ്രവർത്തകർക്കെതിരെ ശക്തമായ നിയമനടപടികൾ സ്വീകരിക്കാത്തതിൽ ആഭ്യന്തര മന്ത്രി രമേശ് ചെന്നിത്തലയ്ക്കെതിരെ കോൺഗ്രസിലെ ഒരു വിഭാഗം നേതാക്കൾക്ക് കടുത്ത അതൃപ്തിയുണ്ട്. ആഭ്യന്തര വകുപ്പും കേരള പോലീസും സി.പി.ഐ.എമ്മിന് മുന്നിൽ മുട്ടുമടക്കുകയാണെന്നാണ് ഇവർ പരസ്യമായി ആക്ഷേപിക്കുന്നത്.
