സിപിഐഎമ്മിൽ നിന്ന് പുറത്തുപോയ മുൻ നേതാക്കളായ ടി.കെ. ഗോവിന്ദനും വി. കുഞ്ഞികൃഷ്ണനും തെറ്റ് തിരുത്തി വന്നാൽ പാർട്ടിയിലേക്ക് മടങ്ങിവരാമെന്ന സംസ്ഥാന സെക്രട്ടേറിയറ്റ് അംഗം എം.വി. ജയരാജന്റെ പരാമർശം രാഷ്ട്രീയ ചർച്ചകൾക്ക് വഴിവെച്ചു. വിവാദം ശക്തമായതോടെ ജയരാജന്റെ നിലപാട് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ തള്ളി രംഗത്തെത്തി.
ഒരു പ്രാദേശിക ചാനലിന് നൽകിയ അഭിമുഖത്തിലായിരുന്നു എം.വി. ജയരാജന്റെ പ്രതികരണം. നയപരമായോ സംഘടനാപരമായോ തെറ്റുകൾ സംഭവിച്ചതിന്റെ പേരിൽ മുൻ കമ്മ്യൂണിസ്റ്റ് പ്രവർത്തകരെ ജീവിതകാലം മുഴുവൻ ഒറ്റപ്പെടുത്തുന്ന നിലപാട് പാർട്ടിക്കില്ലെന്ന് അദ്ദേഹം പറഞ്ഞു. പാർട്ടിയെ വഞ്ചിച്ചവരെ ശക്തമായി വിമർശിക്കുമെങ്കിലും അവർ നിലപാട് തിരുത്തി സഹകരിക്കാൻ തയ്യാറായാൽ വാതിൽ പൂർണമായി അടയ്ക്കുന്ന പാർട്ടിയല്ല സിപിഐഎം എന്നും ജയരാജൻ വ്യക്തമാക്കി.
അതേസമയം, വിഷയത്തിൽ പ്രതികരിച്ച എം.വി. ഗോവിന്ദൻ, പാർട്ടിയെ വഞ്ചിച്ചവരുടെ നടപടികൾ വർഗവഞ്ചനയും ചതിയുമാണെന്ന് ആവർത്തിച്ചു. ടി.കെ. ഗോവിന്ദനോ വി. കുഞ്ഞികൃഷ്ണനോ ഉൾപ്പെടെ പാർട്ടിക്കെതിരെ നിലപാട് സ്വീകരിച്ചവർ ശക്തമായ വിമർശനത്തിന് വിധേയരായിട്ടുണ്ടെന്നും ആ വിമർശനം തുടരുമെന്നും അദ്ദേഹം പറഞ്ഞു.
ഓരോരുത്തരും വിവിധ മാധ്യമങ്ങളിൽ പറയുന്ന അഭിപ്രായങ്ങൾക്ക് മറുപടി പറയേണ്ട സാഹചര്യമില്ലെന്നും, തെറ്റ് തിരുത്തിയാൽ തിരിച്ചെടുക്കുന്നത് പൊതുവായ രാഷ്ട്രീയ സമീപനമാണെന്നും എം.വി. ഗോവിന്ദൻ കൂട്ടിച്ചേർത്തു. ജയരാജന്റെ പരാമർശത്തെ തുടർന്ന് സിപിഐഎമ്മിനുള്ളിൽ നിലപാട് സംബന്ധിച്ച ആശയക്കുഴപ്പം ഉയർന്ന സാഹചര്യത്തിലാണ് സംസ്ഥാന സെക്രട്ടറിയുടെ വിശദീകരണം.
