ആന്ധ്രാപ്രദേശിലെ വിശാഖപട്ടണത്ത് 1 ജിഗാവാട്ട് ശേഷിയുള്ള എഐ-റെഡി ഡാറ്റാ സെന്റർ പ്ലാറ്റ്ഫോം വികസിപ്പിക്കാൻ അദാനി ഗ്രൂപ്പും എഡ്ജ്കോണെക്സും ചേർന്നുള്ള സംയുക്ത സംരംഭമായ അദാനികോണെക്സ് മുന്നോട്ട് വന്നതായി പ്രഖ്യാപിച്ചു. ഇന്ത്യയുടെ ഡിജിറ്റൽ അടിസ്ഥാന സൗകര്യ വികസനത്തിൽ വലിയ മുന്നേറ്റമെന്ന നിലയിലാണ് ഈ പദ്ധതിയെ കാണുന്നത്.
ഏകദേശം 10 ബില്യൺ ഡോളറിന്റെ നിക്ഷേപം ഉൾക്കൊള്ളുന്ന ഈ സംരംഭം, രാജ്യത്തിന്റെ ഭാവി വളർച്ചയ്ക്ക് ആവശ്യമായ ഡിജിറ്റൽ ഇൻഫ്രാസ്ട്രക്ചർ ശക്തിപ്പെടുത്താനുള്ള അദാനി ഗ്രൂപ്പിന്റെ ദീർഘകാല പ്രതിബദ്ധതയുടെ ഭാഗമാണ്. ഉയർന്ന സാന്ദ്രതയുള്ള എഐയും ക്ലൗഡ് സേവനങ്ങളും പിന്തുണയ്ക്കുന്ന രീതിയിൽ സ്കെയിലബിൾ ഡാറ്റാ സെന്റർ സൗകര്യങ്ങളാണ് ഇവിടെ സൃഷ്ടിക്കുന്നത്.
ഊർജ്ജ മേഖലയിലെ അദാനി ഗ്രൂപ്പിന്റെ പരിചയസമ്പത്ത് പ്രയോജനപ്പെടുത്തി, വിശ്വസനീയവും ദീർഘകാല സുസ്ഥിരവുമായ വൈദ്യുതി ലഭ്യത ഉറപ്പാക്കുന്ന സമഗ്ര സംവിധാനമാണ് പദ്ധതിയുടെ അടിസ്ഥാനം. ഇതിലൂടെ ഹൈപ്പർസ്കെയിൽ ആവശ്യങ്ങൾക്ക് അനുസൃതമായി ഘട്ടം ഘട്ടമായി വികസനം നടപ്പിലാക്കും.
ഡിജിറ്റൽ സേവനങ്ങളുടെ വ്യാപനം, എന്റർപ്രൈസ് നവീകരണം, ഇന്ത്യയുടെ എഐ ലക്ഷ്യങ്ങൾ എന്നിവയ്ക്ക് ഈ പദ്ധതി വലിയ പിന്തുണ നൽകുമെന്ന് പ്രതീക്ഷിക്കുന്നു. കൂടാതെ, ആന്ധ്രാപ്രദേശിന്റെ സാമ്പത്തിക വളർച്ചയ്ക്കും ഈ വികസനം സഹായകരമാകുമെന്ന് വിലയിരുത്തപ്പെടുന്നു. ആഗോള ഡിജിറ്റൽ രംഗത്ത് സംസ്ഥാനത്തെ പ്രധാന കേന്ദ്രമായി ഉയർത്തുന്നതിനും ഇത് വഴിയൊരുക്കും.
ഇന്ത്യയുടെ എഐ, ഊർജ്ജ, ഡിജിറ്റൽ അടിസ്ഥാന സൗകര്യങ്ങൾ ശക്തിപ്പെടുത്താൻ അടുത്ത പത്ത് വർഷത്തിനുള്ളിൽ 100 ബില്യൺ ഡോളർ നിക്ഷേപിക്കാനുള്ള അദാനി ഗ്രൂപ്പിന്റെ പദ്ധതിയിലൊരു പ്രധാന ഘടകമാണ് ഈ സംരംഭം.
അതേസമയം, വിശാഖപട്ടണത്ത് നടന്ന ഇന്ത്യ എഐ ഹബ്ബിന്റെ തറക്കല്ലിടൽ ചടങ്ങ്, ഇന്ത്യയെ സാങ്കേതിക രംഗത്ത് ആഗോള നേതാവാക്കാനുള്ള പ്രധാനമന്ത്രി നരേന്ദ്ര മോദിയുടെ ദർശനത്തെ പ്രതിഫലിപ്പിക്കുന്നുവെന്ന് കേന്ദ്രമന്ത്രി അശ്വിനി വൈഷ്ണവ് വ്യക്തമാക്കി.
