നീണ്ട ചർച്ചകൾക്കൊടുവിൽ കർണാടകയിലെ ഡി.കെ. ശിവകുമാർ സർക്കാരിന്റെ മന്ത്രിമാരുടെ കാര്യത്തിൽ അന്തിമ ധാരണയായി. മുഖ്യമന്ത്രി ഡി.കെ. ശിവകുമാറിനൊപ്പം പത്ത് മന്ത്രിമാർ നാളെ സത്യപ്രതിജ്ഞ ചെയ്ത് അധികാരമേൽക്കും. നാളെ വൈകീട്ട് 4.15-നാണ് പുതിയ കോൺഗ്രസ് സർക്കാരിന്റെ സത്യപ്രതിജ്ഞാ ചടങ്ങുകൾ നടക്കുക.
മലയാളികൾക്ക് ഏറെ അഭിമാനിക്കാവുന്ന തരത്തിൽ രണ്ട് മലയാളി നേതാക്കൾ പുതിയ മന്ത്രിസഭയിൽ ഇടംപിടിച്ചിട്ടുണ്ട്. കെ.ജെ. ജോർജ്, യു.ടി. ഖാദർ എന്നിവരാണ് കർണാടകയിൽ മന്ത്രിമാരാകുന്ന മലയാളികൾ.
മുൻ സിദ്ധരാമയ്യ സർക്കാരിൽ ഊർജ്ജവകുപ്പ് മന്ത്രിയായിരുന്ന കെ.ജെ. ജോർജ് കോട്ടയം ജില്ലയിലെ കിടങ്ങൂർ സ്വദേശിയാണ്. ഏറെക്കാലമായി കർണാടക രാഷ്ട്രീയത്തിൽ സജീവമായ അദ്ദേഹം, നെഹ്റു കുടുംബവുമായി അടുത്ത വ്യക്തിബന്ധം പുലർത്തുന്ന മുതിർന്ന നേതാവാണ്.
കഴിഞ്ഞ സിദ്ധരാമയ്യ സർക്കാരിന്റെ കാലത്ത് നിയമസഭാ സ്പീക്കറായിരുന്ന യു.ടി. ഖാദർ കാസർകോട് ഉള്ളാൽ സ്വദേശിയാണ്. മംഗളൂരു നിയമസഭാ മണ്ഡലത്തിൽ നിന്നും നാലാം തവണയാണ് അദ്ദേഹം വൻ ഭൂരിപക്ഷത്തോടെ തിരഞ്ഞെടുക്കപ്പെട്ടത്.
മുൻ മുഖ്യമന്ത്രി സിദ്ധരാമയ്യയുടെ മകൻ യതീന്ദ്ര സിദ്ധരാമയ്യ പുതിയ മന്ത്രിസഭയിലെ പ്രധാന വകുപ്പുകളിലൊന്നിൽ മന്ത്രിയാകുമെന്നാണ് വിവരം. ഇവർക്ക് പുറമെ കോൺഗ്രസിലെ മുതിർന്ന നേതാക്കളായ ജി. പരമേശ്വര, സതീഷ് ജാർക്കിഹോളി, എം.ബി. പാട്ടീൽ, പ്രിയങ്ക് ഖാർഗെ എന്നിവരും നാളെ ഡി.കെ. ശിവകുമാറിനൊപ്പം സത്യപ്രതിജ്ഞ ചെയ്ത് അധികാരമേൽക്കുമെന്നാണ് പുറത്തുവരുന്ന റിപ്പോർട്ടുകൾ വ്യക്തമാക്കുന്നത്.
