തിരഞ്ഞെടുപ്പ് ഫണ്ടിന്റെ ദുരുപയോഗവും സാമ്പത്തിക ക്രമക്കേടുകളും സംബന്ധിച്ച ഗുരുതരമായ പരാതികൾ ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖറിന് മുന്നിൽ കുന്നുകൂടുകയാണ്. കോഴിക്കോട്, എറണാകുളം, തൃശൂർ, തിരുവനന്തപുരം ഉൾപ്പെടെ വിവിധ ജില്ലകളിൽ നിന്ന് ഫണ്ട് വിനിയോഗത്തിലെ അപാകതകളും വെട്ടിപ്പുകളും ചൂണ്ടിക്കാട്ടുന്ന പരാതികളാണ് ഉയരുന്നത്. മണ്ഡലം തലത്തിൽ നിന്ന് സംസ്ഥാന കമ്മിറ്റി വരെ സാമ്പത്തിക ക്രമക്കേടുകൾ നടന്നതായി റിപ്പോർട്ടുകൾ സൂചിപ്പിക്കുന്നു.
ന്യൂനപക്ഷ വോട്ടുകൾ ലക്ഷ്യമിട്ട് അനുവദിച്ച കോടിക്കണക്കിന് രൂപയുടെ ഫണ്ടിലും സ്ഥാനാർത്ഥികൾക്ക് നൽകേണ്ട തുകയിലും വ്യാപകമായ തിരിമറികൾ നടന്നുവെന്നാണ് പ്രധാന ആരോപണം. വാഗ്ദാനം ചെയ്ത തുക സ്ഥാനാർത്ഥികൾക്ക് കൈമാറാതിരിക്കുകയും, അവരുടെ പ്രചാരണത്തിനായി മാറ്റിവെച്ച ഫണ്ടിന്റെ വലിയൊരു വിഹിതം ചെലവഴിക്കാതിരിക്കുകയും ചെയ്തതായി എറണാകുളത്ത് പരാതിയുണ്ട്.
തൃശൂരിൽ തിരഞ്ഞെടുപ്പ് ഫണ്ട് ഓഫീസിലെ സിസിടിവി ദൃശ്യങ്ങൾ കാണാതായതും, പാർട്ടി ഫണ്ട് ഉപയോഗിച്ച് ചില നേതാക്കൾ വ്യക്തിഗത വായ്പകൾ തിരിച്ചടച്ചതായുള്ള ആരോപണവും പാർട്ടിക്കുള്ളിൽ വലിയ പ്രതിഷേധത്തിന് ഇടയാക്കിയിട്ടുണ്ട്. തിരഞ്ഞെടുപ്പിന് പിന്നാലെ ചില നേതാക്കൾ സഹകരണ ബാങ്കുകളിലെ വായ്പകൾ ഒറ്റത്തവണയായി തീർത്ത സംഭവവും സംശയങ്ങൾക്ക് ശക്തിപകരുന്നതായി പരാതിക്കാർ ചൂണ്ടിക്കാട്ടുന്നു.
പ്രധാനമന്ത്രിയുടെ സന്ദർശനവുമായി ബന്ധപ്പെട്ട് കൊടി വാങ്ങൽ, വാഹന വാടക, ഹോട്ടൽ റൂം ബുക്കിംഗ്, ഹെലികോപ്റ്റർ യാത്രകൾ എന്നിവയുടെ പേരിൽ വ്യാജ ബില്ലുകൾ സമർപ്പിച്ച് പണം തട്ടിയെന്ന ആരോപണവും ഉയർന്നിട്ടുണ്ട്. വട്ടിയൂർക്കാവ് മണ്ഡലവുമായി ബന്ധപ്പെട്ട് ഒരു കമ്പനിയുടെ പേരിൽ നൽകിയ വ്യാജ ബിൽ നേരത്തേ തന്നെ വ്യാപകമായി ചർച്ച ചെയ്യപ്പെട്ടിരുന്നു.
മണ്ഡലം മുതൽ കേന്ദ്രതലം വരെ ഓഡിറ്റ് നടത്തിയതായി പാർട്ടി മുൻപ് അവകാശപ്പെട്ടിരുന്നെങ്കിലും, ഇപ്പോൾ പുറത്തുവരുന്ന ആരോപണങ്ങൾ നേതൃത്വത്തെ പ്രതിരോധത്തിലാക്കിയിരിക്കുകയാണ്. സംസ്ഥാന അധ്യക്ഷൻ രാജീവ് ചന്ദ്രശേഖറിനോട് അടുത്ത ബന്ധമുള്ള ചില ഭാരവാഹികൾ ഉൾപ്പെടെ ഈ ക്രമക്കേടുകൾക്ക് പിന്നിലുണ്ടെന്നാണ് സൂചനകൾ.
ആരോപണങ്ങളുടെ പശ്ചാത്തലത്തിൽ, പ്രതിക്കൂട്ടിലായവർക്കെതിരെ കർശന നടപടി സ്വീകരിക്കാനും മണ്ഡലം അടിസ്ഥാനത്തിൽ ആഭ്യന്തര അന്വേഷണം നടത്താനും പാർട്ടി നേതൃത്വം നിർബന്ധിതമായ സാഹചര്യമാണ് രൂപപ്പെട്ടിരിക്കുന്നത്.
