2024-25 സാമ്പത്തിക വർഷത്തിൽ ദേശീയ പാർട്ടികളിൽ ഏറ്റവും ഉയർന്ന വരുമാനം ബിജെപിക്കാണെന്ന് അസോസിയേഷൻ ഫോർ ഡെമോക്രാറ്റിക് റിഫോംസ് (എഡിആർ) വെളിപ്പെടുത്തി. സാമ്പത്തിക വർഷത്തിൽ രാജ്യത്തെ ആറ് ദേശീയ പാർട്ടികൾക്കും കൂടി 7,960.09 കോടി രൂപയുടെ വരുമാനം ലഭിച്ചതായി അതിൽ പറയുന്നു. ഇതിൽ 85.03 ശതമാനവും ബിജെപിയുടെ അക്കൗണ്ടിലേക്കാണ് പോയത് . അതത് പാർട്ടികൾ തിരഞ്ഞെടുപ്പ് കമ്മീഷന് സമർപ്പിച്ച ഓഡിറ്റ് റിപ്പോർട്ടുകളുടെ അടിസ്ഥാനത്തിലാണ് എഡിആർ ഈ കണക്കുകൾ വെളിപ്പെടുത്തിയത്.
ഈ റിപ്പോർട്ട് അനുസരിച്ച്, 2024-25 സാമ്പത്തിക വർഷത്തിൽ ബിജെപിക്ക് 6769.14 കോടി രൂപയുടെ വരുമാനമുണ്ടായിരുന്നു. 918.28 കോടി വരുമാനവുമായി കോൺഗ്രസ് രണ്ടാം സ്ഥാനത്തും, സിപിഎമ്മിന് 172.60 കോടിയും, ബിഎസ്പിക്ക് 58.58 കോടിയും, ആം ആദ്മി പാർട്ടിക്ക് 39.28 കോടിയും, നാഷണൽ പീപ്പിൾസ് പാർട്ടിക്ക് 2.18 കോടിയും വരുമാനമുണ്ട്.
ബിജെപി വരുമാനത്തിന്റെ 55.76 ശതമാനം, അതായത് 3,774.58 കോടി രൂപ ചെലവഴിച്ചപ്പോൾ കോൺഗ്രസ് 1111.94 കോടി രൂപ ചെലവഴിച്ചു. കോൺഗ്രസ് പാർട്ടിയുടെ ചെലവ് അവരുടെ മൊത്തം വരുമാനത്തേക്കാൾ 21.09 ശതമാനം കൂടുതലാണ്. ബിഎസ്പിയും വരുമാനത്തേക്കാൾ 81 ശതമാനം കൂടുതലാണ് ചെലവഴിച്ചത്. മറുവശത്ത്, ആം ആദ്മി പാർട്ടി വരുമാനത്തിന്റെ 92.83 ശതമാനം ചെലവഴിച്ചു.
2023-24 നും 2024-25 നും ഇടയിൽ, ബിജെപിയുടെ വരുമാനം 55.95 ശതമാനം വർദ്ധിച്ചപ്പോൾ, കോൺഗ്രസിന്റെ വരുമാനം 25.05 ശതമാനം കുറഞ്ഞു. ആം ആദ്മി പാർട്ടിയുടെ വരുമാനം 73.20 ശതമാനം വർദ്ധിച്ചു. ആറ് ദേശീയ പാർട്ടികളുടെയും വരുമാനത്തിന്റെ 85.08 ശതമാനവും സംഭാവനയായി ലഭിച്ചു. മറുവശത്ത്, ബിഎസ്പിക്ക് വരുമാനത്തിന്റെ 100 ശതമാനവും മറ്റ് സ്രോതസ്സുകളിൽ നിന്നാണ് ലഭിച്ചത്.
