തമിഴ്നാട് നിയമസഭയിൽ നടന്ന വിശ്വാസ വോട്ടെടുപ്പിൽ മുഖ്യമന്ത്രി ജോസഫ് വിജയ് നയിക്കുന്ന സർക്കാരിന് 144 വോട്ടുകളുടെ ഭൂരിപക്ഷത്തോടെ വിജയം. പുതുതായി രൂപീകരിച്ച തമിഴക വെട്രി കഴകം (ടിവികെ) നേതൃത്വത്തിലുള്ള സർക്കാരിന്റെ ആദ്യ പ്രധാന പരീക്ഷണമായിരുന്നു ഇത്.
വോട്ടെടുപ്പിൽ 22 എം.എൽ.എമാർ പ്രമേയത്തെ എതിർത്തപ്പോൾ, അഞ്ച് പേർ വോട്ടെടുപ്പിൽ നിന്ന് വിട്ടുനിന്നു. വിശ്വാസ വോട്ടെടുപ്പ് പൂർത്തിയായതിനെ തുടർന്ന് നിയമസഭ അനിശ്ചിതകാലത്തേക്ക് പിരിഞ്ഞു.
വോട്ടെടുപ്പ് ദിനം സഭയിൽ വലിയ രാഷ്ട്രീയ നാടകങ്ങൾക്ക് സാക്ഷ്യം വഹിച്ചു. ഡി.എം.കെ സഭ ബഹിഷ്കരിക്കുകയും പ്രതിപക്ഷ നേതാവ് ഉദയനിധി സ്റ്റാലിന്റെ നേതൃത്വത്തിൽ എം.എൽ.എമാർ വാക്കൗട്ട് നടത്തുകയും ചെയ്തു.
വിശ്വാസ പ്രമേയ ചർച്ചയ്ക്കിടെ വിജയ് സർക്കാരിനെതിരെ കടുത്ത വിമർശനമാണ് ഉദയനിധി സ്റ്റാലിൻ ഉയർത്തിയത്. ഭരണകക്ഷി രാഷ്ട്രീയ കൂറുമാറ്റങ്ങളെ പ്രോത്സാഹിപ്പിക്കുന്നുവെന്ന് അദ്ദേഹം ആരോപിച്ചു. ഇതിന്റെ ഭാഗമായി വിമത എ.ഐ.എ.ഡി.എം.കെ എം.എൽ.എമാരുമായി മുഖ്യമന്ത്രി കൂടിക്കാഴ്ച നടത്തിയതും അദ്ദേഹം ചൂണ്ടിക്കാട്ടി.
സഭയിൽ ഉണ്ടായ സംഘർഷാത്മക സാഹചര്യങ്ങൾക്കും പ്രതിപക്ഷ-ഭരണപക്ഷ വാദപ്രതിവാദങ്ങൾക്കും ഇടയിൽ നടന്ന വോട്ടെടുപ്പാണ് വിജയ് സർക്കാരിന് നിർണായക രാഷ്ട്രീയ നേട്ടമായി മാറിയത്.
