ബിജെപിയിലെ തിരഞ്ഞെടുപ്പ് ഫണ്ട് തട്ടിപ്പ് ആരോപണവുമായി ബന്ധപ്പെട്ട വിവാദം കൂടുതൽ സങ്കീർണമാകുന്നതിനിടെ സംസ്ഥാന നേതൃത്വത്തെ പ്രതിരോധത്തിലാക്കുന്ന പുതിയ തെളിവുകൾ പുറത്തുവന്നു. ഫണ്ട് ക്രമക്കേടുമായി ബന്ധപ്പെട്ട ആരോപണങ്ങൾ പാർട്ടി നേതൃത്വം രഹസ്യമായി ഒതുക്കിത്തീർക്കാൻ ശ്രമിക്കുന്നുവെന്ന വിമർശനങ്ങൾക്കിടെയാണ് തെരഞ്ഞെടുപ്പ് മാനേജ്മെന്റ് കമ്മിറ്റിയുടെ വിശദാംശങ്ങൾ ഇപ്പോൾ പരസ്യമായിരിക്കുന്നത്.
സംസ്ഥാന പ്രസിഡന്റ് തിരഞ്ഞെടുപ്പ് ഫണ്ടിന്റെ ഓഡിറ്റ് നടപടികൾ കൃത്യമായി പൂർത്തിയാക്കിയെന്നും ഇതിന് കേന്ദ്രനേതൃത്വത്തിന്റെ അഭിനന്ദനം ലഭിച്ചെന്നും വിശദീകരിച്ച് വാർത്താക്കുറിപ്പ് പുറത്തിറക്കിയതിന് മണിക്കൂറുകൾക്കകം തന്നെ നേതൃത്വത്തെ പ്രതിസന്ധിയിലാക്കുന്ന രേഖകൾ പുറത്തുവന്നതാണ് ശ്രദ്ധേയമായത്. പാർട്ടിക്കുള്ളിലെ ഒരു വിഭാഗം തന്നെയാണ് വിവാദവുമായി ബന്ധപ്പെട്ട തെളിവുകൾ ഘട്ടംഘട്ടമായി പുറത്തുവിടുന്നതെന്നാണ് സൂചന.
വിവാദത്തിന്റെ തുടക്കത്തിൽ കേന്ദ്രനേതൃത്വം സൗജന്യമായി നൽകിയ കൊടികൾക്കായി 3.25 ലക്ഷം രൂപയുടെ വ്യാജ ബിൽ തയ്യാറാക്കിയെന്ന ആരോപണമാണ് പുറത്തുവന്നത്. തുടർന്ന് അഖിലേന്ത്യാ സംഘടനാ ജനറൽ സെക്രട്ടറി ബി. എൽ. സന്തോഷിന് അയച്ചതായി പറയപ്പെടുന്ന പരാതിയിലെ പ്രധാന ഭാഗങ്ങളും സമൂഹമാധ്യമങ്ങളിലൂടെ പ്രചരിച്ചു.
ഇതിന്റെ തുടർച്ചയായാണ് ഇപ്പോൾ തെരഞ്ഞെടുപ്പ് മാനേജ്മെന്റ് കമ്മിറ്റിയുടെ പൂർണ വിവരങ്ങൾ പുറത്തുവന്നിരിക്കുന്നത്. സംസ്ഥാന ജനറൽ സെക്രട്ടറി എസ്. സുരേഷ് കൺവീനറായ കമ്മിറ്റിയുടെ അംഗങ്ങളുടെ വിവരങ്ങളാണ് സമൂഹമാധ്യമങ്ങളിലൂടെ വ്യാപകമായി പ്രചരിക്കുന്നത്.
നിലവിൽ ഉയർന്നിരിക്കുന്ന ആരോപണങ്ങളുടെ കേന്ദ്രബിന്ദുവിൽ എസ്. സുരേഷാണെന്ന സൂചന നൽകുന്നതാണ് ഈ രേഖകളുടെ പ്രചാരണമെന്നും രാഷ്ട്രീയ നിരീക്ഷകർ വിലയിരുത്തുന്നു. അതേസമയം, നടപടിക്ക് വിധേയയായ സംസ്ഥാന സെക്രട്ടറി എം. പി. അഞ്ജന ഉൾപ്പെടെയുള്ള നേതാക്കളുടെ പങ്കും ഇതോടെ കൂടുതൽ ചർച്ചയാകുകയാണ്.
തിരഞ്ഞെടുപ്പ് ഫണ്ട് വിവാദവുമായി ബന്ധപ്പെട്ട ആരോപണങ്ങൾക്കും മറുപടികൾക്കും ഇടയിൽ പാർട്ടിക്കുള്ളിലെ ഭിന്നതകൾ കൂടുതൽ പരസ്യമാകുന്ന സാഹചര്യമാണ് രൂപപ്പെട്ടിരിക്കുന്നത്. പുതിയ രേഖകൾ പുറത്തുവന്നതോടെ വിവാദം സംസ്ഥാന നേതൃത്വത്തിന് കൂടുതൽ തലവേദന സൃഷ്ടിക്കുമെന്നാണ് വിലയിരുത്തൽ.
