മലയാള സിനിമാ താരസംഘടനയായ ‘അമ്മ’യിലെ ഭരണപരമായ തർക്കങ്ങൾക്കിടെ നിർണായക ഇടപെടലുമായി എറണാകുളം മുൻസിഫ് കോടതി. സംഘടനയുടെ അഡ്ഹോക് കമ്മിറ്റിക്ക് കോടതി വിലക്കേർപ്പെടുത്തി. അഡ്ഹോക് കമ്മിറ്റി നിയമവിരുദ്ധമായി രൂപീകരിച്ചതാണെന്ന് ചൂണ്ടിക്കാട്ടി നടി സ്വേതാ മേനോൻ സമർപ്പിച്ച ഹർജിയിലാണ് നടപടി.
അഡ്ഹോക് കമ്മിറ്റിയുടെ പ്രവർത്തനങ്ങൾ തൽക്കാലം നിർത്തിവയ്ക്കണമെന്ന ആവശ്യമാണ് കോടതി പരിഗണിച്ചത്. ഹർജിയിലെ വാദങ്ങൾ പ്രാഥമികമായി അംഗീകരിച്ച കോടതി, നിലവിൽ പ്രവർത്തിക്കുന്ന അഡ്ഹോക് കമ്മിറ്റിക്ക് തുടർനടപടികളിൽ നിന്ന് വിട്ടുനിൽക്കാൻ നിർദേശം നൽകി.
അതേസമയം, ശ്വേത മേനോന്റെ നേതൃത്വത്തിൽ രൂപീകരിച്ചിരിക്കുന്ന കമ്മിറ്റിക്ക് സംഘടനയുടെ ദൈനംദിന പ്രവർത്തനങ്ങൾ തുടരാമെന്നും കോടതി ഉത്തരവിൽ വ്യക്തമാക്കിയിട്ടുണ്ട്. സംഘടനയുടെ പ്രവർത്തനങ്ങളിൽ അനിശ്ചിതത്വം ഉണ്ടാകാതിരിക്കാനാണ് ഈ ഇടക്കാല ക്രമീകരണമെന്ന് നിയമവൃത്തങ്ങൾ ചൂണ്ടിക്കാട്ടുന്നു.
‘അമ്മ’യിലെ ഭരണഘടനാപരമായ നടപടിക്രമങ്ങൾ പാലിക്കാതെയാണ് അഡ്ഹോക് കമ്മിറ്റി രൂപീകരിച്ചതെന്നായിരുന്നു ഹർജിയിലെ പ്രധാന വാദം. വിഷയത്തിൽ വിശദമായ വാദം പിന്നീട് കേൾക്കാനിരിക്കെ, കോടതി പുറപ്പെടുവിച്ച ഇടക്കാല ഉത്തരവ് സംഘടനയുടെ ഭാവി ഭരണക്രമത്തെ സ്വാധീനിക്കുന്ന പ്രധാന തീരുമാനമായാണ് വിലയിരുത്തപ്പെടുന്നത്.
