തൃശ്ശൂർ നിയമസഭാ മണ്ഡലത്തിൽ വോട്ടർമാരെ സ്വാധീനിക്കാൻ ബിജെപി ഭക്ഷ്യക്കിറ്റുകൾ വിതരണം ചെയ്യുന്നതായി പരാതി ഉയർന്നു. ഒളരിയിലെ ഒരു സൂപ്പർമാർക്കറ്റ് കേന്ദ്രീകരിച്ച് നടന്ന കിറ്റ് വിതരണം എൽഡിഎഫ് പ്രവർത്തകർ തടഞ്ഞതോടെയാണ് സംഭവം പുറത്തറിഞ്ഞത്.
തുടർന്ന് വിവരം ലഭിച്ച പോലീസ് സ്ഥലത്തെത്തി സൂപ്പർമാർക്കറ്റ് അടപ്പിക്കുകയും വിതരണത്തിനായി തയ്യാറാക്കിയിരുന്ന അമ്പതോളം കിറ്റുകൾ കസ്റ്റഡിയിലെടുക്കുകയും ചെയ്തു. സംഭവത്തെ തുടർന്ന് പ്രദേശത്ത് രാഷ്ട്രീയ സംഘർഷാവസ്ഥ രൂപപ്പെട്ടു.
മണ്ഡലത്തിൽ ബിജെപി വ്യാപകമായി കിറ്റുകളും വസ്ത്രങ്ങളും വിതരണം ചെയ്യുകയാണെന്ന് സിപിഐ നേതാവ് വി.എസ്. സുനിൽകുമാർ ആരോപിച്ചു. സ്വർണ്ണവ്യാപാരികളും ബാറുടമകളും ഇതിനായി സഹായം നൽകുന്നുണ്ടെന്നും ചില ബാറുകൾ വഴി മദ്യം വിതരണം നടക്കുന്നുവെന്നുമാണ് അദ്ദേഹത്തിന്റെ ആരോപണം. കഴിഞ്ഞ ലോക്സഭാ തിരഞ്ഞെടുപ്പിനിടെ സമാനമായ രീതിയിൽ വോട്ടർമാരെ സ്വാധീനിക്കാൻ ശ്രമങ്ങൾ നടന്നുവെന്നുമാണ് എൽഡിഎഫിന്റെ ആരോപണം.
അതേസമയം, രാധാകൃഷ്ണൻ എന്ന വ്യക്തിയാണ് 75 കിറ്റുകൾക്കായി ഓർഡർ നൽകിയതെന്ന് സൂപ്പർമാർക്കറ്റ് ഉടമ അറിയിച്ചു. കിറ്റുകളുടെ തുക മുൻകൂറായി അടച്ചിരുന്നുവെന്നും, ഇയാൾ നിർദ്ദേശിക്കുന്നവർ വന്ന് കിറ്റുകൾ വാങ്ങിക്കൊണ്ടുപോയിരുന്നുവെന്നും ഉടമ വ്യക്തമാക്കി. എന്നാൽ ഇതിന് പിന്നിൽ രാഷ്ട്രീയ ലക്ഷ്യമുണ്ടെന്നതാണ് തിരഞ്ഞെടുപ്പ് ഉദ്യോഗസ്ഥരുടെ പ്രാഥമിക വിലയിരുത്തൽ. സംഭവത്തിൽ പോലീസ് അന്വേഷണം ശക്തമാക്കിയിട്ടുണ്ട്.
