പശ്ചിമ ബംഗാൾ നിയമസഭാ തെരഞ്ഞെടുപ്പിന് മുന്നോടിയായി നടക്കുന്ന സ്പെഷ്യൽ ഇന്റൻസീവ് റിവിഷൻ (എസ്ഐആർ) നടപടിയെ ചുറ്റിപ്പറ്റി ബിജെപിക്കെതിരെ ഗുരുതര ആരോപണവുമായി മുൻ ത്രിപുര മുഖ്യമന്ത്രിയും സിപിഐ(എം) നേതാവുമായ മണിക് സർക്കാർ. സ്വന്തം രാഷ്ട്രീയ താൽപര്യങ്ങൾക്ക് അനുസരിച്ചുള്ള വോട്ടർ പട്ടിക തയ്യാറാക്കാനാണ് ബിജെപി ശ്രമിക്കുന്നതെന്നും, പ്രതിപക്ഷ വോട്ടർമാരായി കരുതുന്ന വിഭാഗങ്ങളുടെ പേരുകൾ പട്ടികയിൽ നിന്ന് ഒഴിവാക്കാനുള്ള നീക്കങ്ങൾ നടക്കുന്നുണ്ടെന്നും അദ്ദേഹം ആരോപിച്ചു.
ധലായ് ജില്ലയിലെ സിപിഐ(എം) നേതാവ് നീരജോയ് ത്രിപുരയുടെ അനുസ്മരണ യോഗത്തിൽ സംസാരിക്കവെയാണ് മണിക് സർക്കാരിന്റെ പ്രതികരണം. മുസ്ലിംകൾ, പട്ടികവർഗക്കാർ, പട്ടികജാതിക്കാർ, തൊഴിലാളിവർഗക്കാർ തുടങ്ങിയ വിഭാഗങ്ങളെയാണ് ലക്ഷ്യമിടുന്നതെന്നും, ഇവരിൽ ഭൂരിഭാഗവും ബിജെപിക്ക് വോട്ട് ചെയ്യില്ലെന്ന ധാരണയിലാണ് ഈ ശ്രമങ്ങളെന്നും അദ്ദേഹം പറഞ്ഞു.
ബീഹാർ, പശ്ചിമ ബംഗാൾ, അസം തുടങ്ങിയ സംസ്ഥാനങ്ങളിൽ എസ്ഐആറുമായി ബന്ധപ്പെട്ട് ഉയർന്ന വിവാദങ്ങൾ ചൂണ്ടിക്കാട്ടിയ അദ്ദേഹം, ത്രിപുരയിലും സമാനമായ സാഹചര്യങ്ങൾ ആവർത്തിക്കുമെന്ന ആശങ്ക പ്രകടിപ്പിച്ചു.
തൊഴിലവസരങ്ങൾ സൃഷ്ടിക്കുമെന്ന ബിജെപിയുടെ വാഗ്ദാനങ്ങൾ പാലിക്കപ്പെട്ടിട്ടില്ലെന്നും, തൊഴിലില്ലായ്മ കാരണം സംസ്ഥാനത്തെ യുവാക്കൾ മറ്റ് സംസ്ഥാനങ്ങളിലേക്ക് കുടിയേറുകയാണെന്നും മണിക് സർക്കാർ വിമർശിച്ചു. വിദ്യാഭ്യാസ-ആരോഗ്യ മേഖലകളിലും സർക്കാർ പരാജയപ്പെട്ടുവെന്നും, സ്കൂളുകളിൽ അധ്യാപകരുടെയും ആശുപത്രികളിൽ ആരോഗ്യപ്രവർത്തകരുടെയും ഗുരുതര ക്ഷാമം നിലനിൽക്കുന്നുവെന്നും അദ്ദേഹം ആരോപിച്ചു.
2023-ലെ ത്രിപുര നിയമസഭാ തെരഞ്ഞെടുപ്പിനെ പരാമർശിച്ച അദ്ദേഹം, ആദിവാസി വോട്ടുകൾ ഇടതുമുന്നണിയിലേക്ക് പോകാതിരിക്കാൻ തിപ്ര മഠയും ബിജെപിയും തമ്മിൽ രഹസ്യ ധാരണ ഉണ്ടായിരുന്നുവെന്നും ആരോപിച്ചു. അല്ലാത്തപക്ഷം ബിജെപിക്ക് വീണ്ടും അധികാരത്തിലെത്തുക ബുദ്ധിമുട്ടായിരുന്നുവെന്നും അദ്ദേഹം പറഞ്ഞു.
അതേസമയം, മണിക് സർക്കാരിന്റെ ആരോപണങ്ങൾക്ക് ബിജെപിയോ തിപ്ര മഠയോ ഇതുവരെ ഔദ്യോഗിക പ്രതികരണം നടത്തിയിട്ടില്ല.
