രാജ്യത്തിന്റെ ഊർജ്ജ മേഖലയിൽ പുതിയ അധ്യായത്തിന് വഴിതുറന്ന് ഇന്ത്യയും യുണൈറ്റഡ് അറബ് എമിറേറ്റ്സും തമ്മിൽ കടലിനടിയിലൂടെ വൈദ്യുതി കേബിളുകൾ സ്ഥാപിക്കുന്ന മെഗാ പദ്ധതിക്കായുള്ള ഒരുക്കങ്ങൾ ആരംഭിച്ചു. അറബിക്കടലിന്റെ ആഴങ്ങളിലൂടെ ഏകദേശം 1,600 കിലോമീറ്റർ ദൂരത്തിൽ അത്യാധുനിക പവർ ഗ്രിഡ് ലൈൻ സ്ഥാപിക്കാനാണ് കേന്ദ്ര സർക്കാർ പദ്ധതിയിടുന്നത്. ഇന്ത്യ എനർജി സ്റ്റോറേജ് വീക്ക് പരിപാടിയിൽ സംസാരിക്കവെയാണ് കേന്ദ്ര ഊർജ്ജമന്ത്രി മനോഹർ ലാൽ ഖട്ടർ പദ്ധതിയുടെ വിശദാംശങ്ങൾ പങ്കുവെച്ചത്.
ഏകദേശം 40,000 കോടി രൂപ ചെലവ് പ്രതീക്ഷിക്കുന്ന ഈ പദ്ധതി പ്രധാനമന്ത്രി നരേന്ദ്ര മോദി മുന്നോട്ടുവച്ച “വൺ സൺ, വൺ വേൾഡ്, വൺ ഗ്രിഡ്” എന്ന ആഗോള ഊർജ്ജ കാഴ്ചപ്പാടിന്റെ നിർണായക ഘടകമായാണ് വിലയിരുത്തപ്പെടുന്നത്. പദ്ധതി യാഥാർത്ഥ്യമായാൽ യുഎഇയിൽ നിന്ന് ഇന്ത്യയിലേക്ക് വൈദ്യുതി എത്തിക്കാനും ആവശ്യാനുസരണം ഇന്ത്യയിലെ അധിക വൈദ്യുതി യുഎഇയിലേക്ക് കൈമാറാനും സാധിക്കും.
ഗുജറാത്തിലെ ഭുജ് തീരപ്രദേശത്തെ പവർ സ്റ്റേഷനെയും യുഎഇ തീരപ്രദേശത്തെയും നേരിട്ട് ബന്ധിപ്പിക്കുന്ന രീതിയിലായിരിക്കും കടലിനടിയിലൂടെ കേബിളുകൾ സ്ഥാപിക്കുക. ഇതിലൂടെ ഇരു രാജ്യങ്ങളും തമ്മിലുള്ള ഊർജ്ജ കൈമാറ്റം കൂടുതൽ കാര്യക്ഷമമാകുമെന്നാണ് പ്രതീക്ഷ.
കാലാവസ്ഥാ വ്യതിയാനവും കാർബൺ പുറന്തള്ളലും ആഗോളതലത്തിൽ വലിയ വെല്ലുവിളിയായി മാറുന്ന സാഹചര്യത്തിൽ ഹരിത ഊർജ്ജ മേഖലക്ക് ഇന്ത്യ കൂടുതൽ പ്രാധാന്യം നൽകുകയാണ്. ഇലക്ട്രിക് വാഹനങ്ങളുടെ വ്യാപനവും ആർട്ടിഫിഷ്യൽ ഇന്റലിജൻസ് അധിഷ്ഠിത ഡാറ്റാ സെന്ററുകളുടെ വർധനവും രാജ്യത്തെ വൈദ്യുതി ആവശ്യകത ഗണ്യമായി ഉയർത്തുമെന്നാണ് വിലയിരുത്തൽ. വരും വർഷങ്ങളിൽ വൈദ്യുതി ആവശ്യകത 300 ജിഗാവാട്ട് വരെ ഉയരാൻ സാധ്യതയുണ്ടെന്നാണ് കേന്ദ്ര സർക്കാർ കണക്കുകൂട്ടുന്നത്.
ഈ സാഹചര്യത്തിലാണ് രാജ്യാന്തര വൈദ്യുതി ശൃംഖലകളിലൂടെ ഊർജ്ജ സുരക്ഷ ഉറപ്പാക്കാനുള്ള നീക്കങ്ങൾ വേഗത്തിലാക്കുന്നത്. യുഎഇക്ക് പുറമെ ശ്രീലങ്ക, സിംഗപ്പൂർ തുടങ്ങിയ രാജ്യങ്ങളുമായി സമാന രീതിയിലുള്ള സമുദ്രാതിർത്തി വൈദ്യുതി കണക്ഷനുകൾ സ്ഥാപിക്കുന്നതിനുള്ള പ്രാഥമിക ചർച്ചകളും പുരോഗമിക്കുന്നുണ്ട്. ഭാവിയിൽ മറ്റ് ഏഷ്യൻ രാജ്യങ്ങളിലേക്കും ഈ ശൃംഖല വ്യാപിപ്പിക്കാനുള്ള സാധ്യതകൾ കേന്ദ്രം പരിശോധിക്കുന്നുണ്ട്.
അറബിക്കടലിലെ വലിയ ആഴങ്ങളിലും പ്രതികൂല സമുദ്ര സാഹചര്യങ്ങളിലും കേബിളുകൾ സ്ഥാപിക്കുക എന്നത് വലിയ സാങ്കേതിക വെല്ലുവിളിയായിരിക്കുമെങ്കിലും സർക്കാർ ഉടമസ്ഥതയിലുള്ള പവർ ഗ്രിഡ് കോർപ്പറേഷനാണ് പദ്ധതിയുടെ നിർമാണ ചുമതല വഹിക്കുന്നത്. പദ്ധതി പൂർത്തിയാകുന്നതോടെ ഇന്ത്യയും പശ്ചിമേഷ്യൻ രാജ്യങ്ങളും തമ്മിലുള്ള ഊർജ്ജ, സാമ്പത്തിക, നയതന്ത്ര സഹകരണം പുതിയ ഉയരങ്ങളിലെത്തുമെന്നാണ് പ്രതീക്ഷ.
