വിഴിഞ്ഞം അന്താരാഷ്ട്ര തുറമുഖത്തിന്റെ ഓഹരികൾ കൈമാറാനുള്ള അദാനി ഗ്രൂപ്പിന്റെ നീക്കത്തിൽ സംസ്ഥാന സർക്കാരിനും മുഖ്യമന്ത്രി വി.ഡി. സതീശനുമെതിരെ രൂക്ഷ വിമർശനവുമായി സിപിഎം സംസ്ഥാന സെക്രട്ടറി എം.വി. ഗോവിന്ദൻ. തുറമുഖ ഓഹരി കൈമാറ്റത്തെക്കുറിച്ച് സർക്കാർ ഒന്നും അറിഞ്ഞിരുന്നില്ലെന്ന മുഖ്യമന്ത്രിയുടെ വിശദീകരണം പൊതുസമൂഹത്തിന് വിശ്വസിക്കാനാവുന്നതല്ലെന്ന് അദ്ദേഹം പറഞ്ഞു.
അദാനി ഗ്രൂപ്പുമായി അടുത്ത ബന്ധം പുലർത്തുന്ന മുഖ്യമന്ത്രി, ഇത്രയും വലിയ ബിസിനസ് ഇടപാടിനെക്കുറിച്ച് പത്രവാർത്തകളിലൂടെയാണ് അറിഞ്ഞതെന്ന് പറയുന്നത് അസംബന്ധമാണെന്നും എം.വി. ഗോവിന്ദൻ ആരോപിച്ചു. മുൻപ് നടത്തിയ ചില യാത്രകളുടെയും കൂടിക്കാഴ്ചകളുടെയും പശ്ചാത്തലത്തിൽ സർക്കാരിന്റെ നിലപാട് കൂടുതൽ സംശയങ്ങൾക്ക് ഇടയാക്കുന്നതായും അദ്ദേഹം പറഞ്ഞു.
വിഴിഞ്ഞം പദ്ധതിക്കായി അദാനി ഗ്രൂപ്പ് ഇതുവരെ ചെലവഴിച്ച തുക 3,000 കോടി രൂപയിൽ താഴെയാണെന്ന് ചൂണ്ടിക്കാട്ടിയ അദ്ദേഹം, ഇപ്പോൾ തുറമുഖത്തിന്റെ 49 ശതമാനം ഓഹരികൾ ഏകദേശം 13,000 കോടി രൂപയ്ക്ക് അന്താരാഷ്ട്ര ഷിപ്പിങ് കമ്പനിയായ എംഎസ്സിക്ക് കൈമാറാനുള്ള നീക്കമാണ് നടക്കുന്നതെന്ന് പറഞ്ഞു.
നിലവിലെ കരാർ വ്യവസ്ഥകൾ പ്രകാരം 25 ശതമാനത്തിലധികം ഓഹരികൾ കൈമാറണമെങ്കിൽ സംസ്ഥാന സർക്കാരിന്റെ മുൻകൂർ അനുമതി നിർബന്ധമാണെന്നും, അത്തരം നിയമപരമായ നടപടികൾ പാലിക്കാതെ മുന്നോട്ടുപോകുന്നത് ഗുരുതരമായ പ്രത്യാഘാതങ്ങൾ സൃഷ്ടിക്കുമെന്നും അദ്ദേഹം മുന്നറിയിപ്പ് നൽകി.
വിഴിഞ്ഞം പോലുള്ള തന്ത്രപ്രധാന തുറമുഖങ്ങൾ രാജ്യസുരക്ഷയുമായി ബന്ധപ്പെട്ട സുപ്രധാന അടിസ്ഥാനസൗകര്യങ്ങളാണെന്നും അവയുടെ നിയന്ത്രണം ഒരു സ്വകാര്യ കുത്തക സ്ഥാപനത്തിന്റെ കൈകളിൽ മാത്രം കേന്ദ്രീകരിക്കുന്നത് അപകടകരമാണെന്നും എം.വി. ഗോവിന്ദൻ അഭിപ്രായപ്പെട്ടു.
മത്സരാധിഷ്ഠിത സേവനങ്ങൾ ഉറപ്പാക്കുന്ന ബഹുകമ്പനി സംവിധാനത്തിന് പകരം, ഒരു പ്രത്യേക കമ്പനിക്ക് മാത്രം മേൽക്കൈ ലഭിക്കുന്ന സാഹചര്യം രൂപപ്പെടുകയാണെന്നും അദ്ദേഹം ആരോപിച്ചു. കേരളത്തിന്റെയും രാജ്യത്തിന്റെയും താൽപര്യങ്ങളെ ബാധിക്കുന്ന ഇത്തരം കുത്തകവൽക്കരണ നീക്കങ്ങൾക്കെതിരെ ജനങ്ങളെ അണിനിരത്തി ശക്തമായ പ്രതിഷേധം സംഘടിപ്പിക്കുമെന്നും സിപിഎം സംസ്ഥാന സെക്രട്ടറി വ്യക്തമാക്കി.
