ലോക്സഭയിലേക്കും സംസ്ഥാന നിയമസഭകളിലേക്കും ഒരേസമയം തിരഞ്ഞെടുപ്പ് നടത്താനുള്ള കേന്ദ്ര സർക്കാരിന്റെ ‘ഒരു രാജ്യം, ഒരു തിരഞ്ഞെടുപ്പ്’ പദ്ധതിയെ വീണ്ടും വിമർശിച്ച് മുൻ കേന്ദ്രമന്ത്രി പി. ചിദംബരം. ഭരണഘടനാ പാർലമെന്ററി സംയുക്ത സമിതിയുടെ യോഗത്തിലാണ് അദ്ദേഹം പദ്ധതിക്കെതിരായ നിലപാട് വ്യക്തമാക്കിയത്.
ഭരണഘടന (129-ാം ഭേദഗതി) ബിൽ, 2024, കേന്ദ്രഭരണ പ്രദേശ നിയമങ്ങൾ (ഭേദഗതി) ബിൽ, 2024 എന്നിവ പരിഗണിക്കുന്നതിനായി ചേർന്ന സംയുക്ത പാർലമെന്ററി സമിതിയിലാണ് ചിദംബരം തന്റെ വാദങ്ങൾ അവതരിപ്പിച്ചത്. ഏതൊരു നിയമസഭയും അഞ്ച് വർഷത്തെ കാലാവധിയിലേക്ക് തെരഞ്ഞെടുക്കപ്പെടുന്നതായതിനാൽ, ആ കാലാവധി കുറയ്ക്കുകയോ മാറ്റം വരുത്തുകയോ ചെയ്യുന്നത് ഭരണഘടനയുടെ അടിസ്ഥാന ഘടനയെ നേരിട്ട് ബാധിക്കുമെന്ന് അദ്ദേഹം ചൂണ്ടിക്കാട്ടി.
ബില്ലിനെ പിന്തുണയ്ക്കാൻ തന്റെ മനസ്സാക്ഷി അനുവദിക്കുന്നില്ലെന്നും, നിയമനിർമ്മാണം പാസാക്കാൻ ആവശ്യമായ മൂന്നിൽ രണ്ട് ഭൂരിപക്ഷം സർക്കാരിന് നിലവിൽ ഇല്ലെന്നും ചിദംബരം അഭിപ്രായപ്പെട്ടതായി റിപ്പോർട്ടുകളുണ്ട്.
നിർദേശിച്ചിരിക്കുന്ന തിരഞ്ഞെടുപ്പ് മാതൃക ഇന്ത്യൻ തിരഞ്ഞെടുപ്പ് കമ്മീഷന് അമിതമായ അധികാരം നൽകുമെന്ന ആശങ്കയും പ്രതിപക്ഷ അംഗങ്ങൾ മുന്നോട്ടുവച്ചു. ഇതേ കാരണം ചൂണ്ടിക്കാട്ടിയാണ് വിവിധ പ്രതിപക്ഷ പാർട്ടികൾ പദ്ധതിയെ എതിർക്കുന്നത്.
ബിജെപി എംപി പി.പി. ചൗധരി അധ്യക്ഷനായ സംയുക്ത സമിതിയിൽ ബിജെപിയുടെ അനിൽ ബലൂണി, സഞ്ജയ് ജയ്സ്വാൾ, കോൺഗ്രസിന്റെ പ്രിയങ്ക ഗാന്ധി വാദ്ര, മനീഷ് തിവാരി, സമാജ്വാദി പാർട്ടിയുടെ ധർമ്മേന്ദ്ര യാദവ്, തൃണമൂൽ കോൺഗ്രസിന്റെ സാഗരിക ഘോഷ് എന്നിവർ ഉൾപ്പെടെ വിവിധ പാർട്ടികളുടെ പ്രതിനിധികളുണ്ട്.
