കോൺഗ്രസ് നേതാവ് രാഹുൽ ഗാന്ധിയുടെ ‘ഛാത്രോം കി ഗൂഞ്ച്’ പരിപാടിക്ക് പിന്തുണ അറിയിക്കാത്തതിനെ തുടർന്ന് പ്രതിപക്ഷ നേതാവ് വി.ഡി. സതീശൻ ഉൾപ്പെടെയുള്ള പ്രമുഖ കോൺഗ്രസ് നേതാക്കൾക്ക് കാരണം കാണിക്കൽ നോട്ടീസ് നൽകി.
ആൾ ഇന്ത്യ കോൺഗ്രസ് വോളണ്ടിയേഴ്സ് കമ്മിറ്റിയാണ് നടപടി സ്വീകരിച്ചത്. കർണാടക ഉപമുഖ്യമന്ത്രി ഡി.കെ. ശിവകുമാർ, തെലങ്കാന മുഖ്യമന്ത്രി രേവന്ത് റെഡ്ഡി എന്നിവരും നോട്ടീസ് ലഭിച്ച നേതാക്കളുടെ പട്ടികയിൽ ഉൾപ്പെട്ടിട്ടുണ്ട്.
രാഹുൽ ഗാന്ധിയുടെ പരിപാടിക്ക് പിന്തുണ നൽകി സാമൂഹ്യമാധ്യമങ്ങളിൽ പോസ്റ്റുകളോ പ്രചാരണ സന്ദേശങ്ങളോ പങ്കുവെക്കാത്തതാണ് നോട്ടീസിന് കാരണമായതെന്നാണ് വിവരം. വിഷയത്തിൽ 72 മണിക്കൂറിനകം വിശദീകരണം നൽകണമെന്ന് ബന്ധപ്പെട്ട നേതാക്കളോട് ആവശ്യപ്പെട്ടിട്ടുണ്ട്.
അതേസമയം, രാഹുൽ ഗാന്ധിയുടെ പരിപാടിക്ക് ആവശ്യമായ പിന്തുണ നൽകുന്നതിൽ ചില നേതാക്കൾ വീഴ്ച വരുത്തിയെന്ന ആരോപണം കോൺഗ്രസ് വൃത്തങ്ങളിൽ തന്നെ ചർച്ചയായിട്ടുണ്ട്. ഇതുമായി ബന്ധപ്പെട്ട വിമർശനങ്ങൾ സാമൂഹ്യമാധ്യമങ്ങളിലും ശക്തമായി ഉയരുന്നുണ്ട്.
നോട്ടീസ് സംബന്ധിച്ച് ബന്ധപ്പെട്ട നേതാക്കൾ ഇതുവരെ ഔദ്യോഗിക പ്രതികരണം നടത്തിയിട്ടില്ല. വിഷയത്തിൽ കോൺഗ്രസ് നേതൃത്വത്തിന്റെ തുടർനടപടികൾ എന്തായിരിക്കുമെന്നത് രാഷ്ട്രീയ വൃത്തങ്ങൾ ഉറ്റുനോക്കുകയാണ്.
