‘വയനാട് ഫണ്ട് തട്ടിപ്പ്’ എന്ന പേരിൽ യുഡിഎഫിനെയും കോൺഗ്രസ് പാർട്ടിയെയും സമൂഹമാധ്യമങ്ങൾ വഴി അപകീർത്തിപ്പെടുത്തുന്നുവെന്ന് ആരോപിച്ച് ദീപ്തി മേരി വർഗീസ് ആഭ്യന്തരമന്ത്രി രമേശ് ചെന്നിത്തലയ്ക്ക് പരാതി നൽകി.
ഇത്തരത്തിൽ വ്യാജ പ്രചാരണം നടത്തുന്നവർക്കെതിരെ ശക്തമായ നടപടി സ്വീകരിക്കണമെന്ന് ആഭ്യന്തരമന്ത്രി രമേശ് ചെന്നിത്തലയോട് ആവശ്യപ്പെട്ടതായും ദീപ്തി മേരി വർഗീസ് വ്യക്തമാക്കി.
ആഭ്യന്തരമന്ത്രിക്ക് നൽകുന്ന തന്റെ ആദ്യ പരാതിയാണിതെന്നും അവർ പ്രതികരിച്ചു.
ദീപ്തി മേരി വർഗീസിൻ്റെ ഫേസ്ബുക്ക് പോസ്റ്റ്
ആഭ്യന്തരമന്ത്രിക്ക് എൻ്റെ ആദ്യത്തെ പരാതി…
കെപിസിസി വയനാട് ഫണ്ട് തട്ടിച്ചു എന്ന പേരിൽ
വ്യാജ സ്ക്രീൻഷോട്ടുകൾ ഉണ്ടാക്കി കോൺഗ്രസിനും യുഡിഎഫിനും എതിരെ തെരഞ്ഞെടുപ്പ് കാലത്ത് സോഷ്യൽ മീഡിയ വഴി വ്യാജപ്രചരണം നടത്തിയ സോഷ്യൽ മീഡിയ അക്കൗണ്ടുകൾക്കെതിരെ ഞാൻ ഡിജിപിക്ക് പരാതി നൽകിയിരുന്നു.
ആ പരാതിയിൽ അന്വേഷണം ദ്രുതഗതിയിൽ ആക്കണമെന്നും കുറ്റക്കാരെ അടിയന്തരമായി കണ്ടെത്തണമെന്നും ആവശ്യപ്പെട്ട് ബഹുമാനപ്പെട്ട കേരള ആഭ്യന്തരമന്ത്രി ശ്രീ രമേശ് ചെന്നിത്തലയ്ക്ക് പരാതി നൽകി , വിഷയത്തിൽ അടിയന്തര നടപടി സ്വീകരിക്കാൻ അദ്ദേഹം ഡിജിപിക്ക് നിർദേശം നൽകുകയും ചെയ്തു
