സംസ്ഥാനത്തെ മിന്നൽപ്രളയ മുന്നറിയിപ്പിലും ദുരന്തനിവാരണ പ്രവർത്തനങ്ങളിലുമുണ്ടായ വീഴ്ചകൾ ചൂണ്ടിക്കാട്ടി സർക്കാരിനെതിരെ ശക്തമായ വിമർശനം ഉയരുന്നു. സർക്കാരിന്റെ ഭാഗത്ത് അനാസ്ഥയും ഗുരുതരമായ ഏകോപനക്കുറവും ഉണ്ടായതായി പ്രതിപക്ഷ നേതാവ് പിണറായി വിജയൻ ആരോപിച്ചു. അതേസമയം, സംസ്ഥാനത്ത് ഉണ്ടായത് “സർക്കാർ നിർമിത പ്രളയം” ആണെന്ന കടുത്ത വിമർശനവുമായി സിപിഐഎം സംസ്ഥാന സെക്രട്ടറി എം.വി. ഗോവിന്ദനും രംഗത്തെത്തി.
ആറന്മുളയും റാന്നിയും ഉൾപ്പെടെയുള്ള പ്രദേശങ്ങൾ വെള്ളത്തിനടിയിലാകാൻ കാരണം അധികൃതരുടെ അലംഭാവമാണെന്ന് സിപിഐഎം പത്തനംതിട്ട ജില്ലാ സെക്രട്ടറി രാജു എബ്രഹാം ആരോപിച്ചു. മൂഴിയാർ അണക്കെട്ടിലെ ജലനിരപ്പ് ഉയർന്നതിനെ തുടർന്ന് വെള്ളം പുറത്തുവിടുന്നതിന് മുമ്പ് പാലിക്കേണ്ട നടപടിക്രമങ്ങൾ കൃത്യമായി നടപ്പാക്കിയില്ലെന്നും അദ്ദേഹം കുറ്റപ്പെടുത്തി.
പത്തനംതിട്ടയുടെ മലയോര മേഖലയിൽ പെയ്ത അതിശക്തമായ മഴയെ തുടർന്ന് താഴ്ന്ന പ്രദേശങ്ങളിലേക്ക് വലിയ തോതിൽ വെള്ളം ഒഴുകിയെത്തുമെന്ന് ജനങ്ങൾക്ക് സമയബന്ധിതമായ മുന്നറിയിപ്പ് ലഭിച്ചില്ലെന്നാണ് ആക്ഷേപം. ഇതോടെ നിരവധി കുടുംബങ്ങൾ വെള്ളപ്പൊക്കത്തിൽ ഒറ്റപ്പെടുകയും വലിയ ദുരിതം അനുഭവിക്കുകയും ചെയ്തു.
മൂഴിയാർ ഡാമിൽ നിന്നുള്ള വെള്ളം ആവശ്യമായ മുന്നറിയിപ്പുകളില്ലാതെ തുറന്നുവിട്ടതാണ് റാന്നിയിലെയും ആറന്മുളയിലെയും സ്ഥിതി രൂക്ഷമാക്കിയതെന്ന് രാജു എബ്രഹാം പറഞ്ഞു. ഓറഞ്ച് ബുക്കിൽ നിർദേശിച്ചിട്ടുള്ള സുരക്ഷാ നടപടികൾ പാലിച്ചില്ലെന്നും അലാറം മുഴക്കുകയോ പൊതുജന അറിയിപ്പ് നൽകുകയോ തദ്ദേശസ്ഥാപനങ്ങളെ മുൻകൂട്ടി അറിയിക്കുകയോ ചെയ്തില്ലെന്നും അദ്ദേഹം ആരോപിച്ചു. സമയബന്ധിതമായ മുന്നറിയിപ്പ് നൽകിയിരുന്നെങ്കിൽ ദുരന്തത്തിന്റെ ആഘാതം ഗണ്യമായി കുറയ്ക്കാനാകുമായിരുന്നുവെന്നും അദ്ദേഹം കൂട്ടിച്ചേർത്തു.
സംസ്ഥാനത്തെ മഴക്കെടുതിയുമായി ബന്ധപ്പെട്ട് ദുരന്തനിവാരണ പ്രവർത്തനങ്ങളിൽ ഗുരുതര വീഴ്ച സംഭവിച്ചതായി പ്രതിപക്ഷ നേതാവ് പിണറായി വിജയനും വിമർശിച്ചു. റാന്നിയിൽ മുന്നറിയിപ്പില്ലാതെ ഡാം തുറന്നുവിട്ടെന്ന പ്രദേശവാസികളുടെ പരാതി അതീവ ഗൗരവത്തോടെ കാണേണ്ട വിഷയമാണെന്ന് അദ്ദേഹം ഫേസ്ബുക്ക് കുറിപ്പിൽ വ്യക്തമാക്കി. വെള്ളപ്പൊക്കത്തിൽ കാണാതായവർക്കായുള്ള തിരച്ചിൽ കൂടുതൽ ഊർജിതമാക്കണമെന്നും ദുരന്തനിവാരണ പ്രവർത്തനങ്ങൾ ഫലപ്രദമായി ഏകോപിപ്പിക്കാൻ സർക്കാർ അടിയന്തര നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
ദുരന്തനിവാരണ അതോറിറ്റിക്കും കാലാവസ്ഥ വകുപ്പിനും സംഭവിച്ച വീഴ്ചകളാണ് നിലവിലെ സാഹചര്യം കൂടുതൽ സങ്കീർണമാക്കിയതെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദനും വിമർശിച്ചു. കാലവർഷക്കെടുതിയുടെ ഗൗരവം മനസ്സിലാക്കി മുഖ്യമന്ത്രി നേരിട്ട് ഇടപെടണമെന്നും ജനങ്ങളെ സഹായിക്കാനുള്ള ഉത്തരവാദിത്തം സർക്കാർ ഏറ്റെടുക്കണമെന്നും സിപിഐഎം ആവശ്യപ്പെട്ടു. മഴക്കെടുതിയുമായി ബന്ധപ്പെട്ട ചോദ്യങ്ങളിൽ മാധ്യമങ്ങളോടുള്ള മുഖ്യമന്ത്രിയുടെ സമീപനവും വിമർശനവിധേയമാക്കി.
വെള്ളപ്പൊക്കം രൂക്ഷമായ സാഹചര്യത്തിൽ റവന്യൂ വകുപ്പിന്റെ പ്രവർത്തനങ്ങളെ പരോക്ഷമായി വിമർശിച്ച് ആറന്മുള എംഎൽഎ അബിൻ വർക്കിയും രംഗത്തെത്തി. കൂടുതൽ സർക്കാർ സഹായം പ്രദേശത്തിന് ലഭിക്കണമെന്നും റവന്യൂ വകുപ്പ് കൂടുതൽ കാര്യക്ഷമമായി ഇടപെടണമെന്നും അദ്ദേഹം ആവശ്യപ്പെട്ടു.
അതേസമയം, ആറന്മുളയ്ക്ക് പ്രത്യേക ശ്രദ്ധ ആവശ്യമാണ് എന്ന ആവശ്യം ന്യായമാണെന്ന് മന്ത്രി പി.സി. വിഷ്ണുനാഥ് അഭിപ്രായപ്പെട്ടു. ദുരന്തസാഹചര്യത്തെ രാഷ്ട്രീയ വിവാദമാക്കുന്നത് ഒഴിവാക്കണമെന്നും അദ്ദേഹം പറഞ്ഞു. എംഎൽഎ അബിൻ വർക്കി ഉന്നയിച്ച ആവശ്യങ്ങൾ അനുഭാവപൂർവം പരിഗണിക്കുമെന്ന് മന്ത്രി എ.പി. അനിൽകുമാർ അറിയിച്ചു.
