സ്വാതന്ത്ര്യദിനാഘോഷങ്ങളിൽ വന്ദേമാതരം മുഴുവനായും ആലപിക്കണമെന്ന നിർദേശവുമായി സംസ്ഥാന സർക്കാർ. ചീഫ് സെക്രട്ടറി തദ്ദേശ വകുപ്പ് സെക്രട്ടറിക്ക് നൽകിയ കത്തിലൂടെയാണ് നിർദേശം കൈമാറിയത്. കേന്ദ്ര സർക്കാർ വന്ദേമാതരം ആലപിക്കുന്നതുമായി ബന്ധപ്പെട്ട് പുറത്തിറക്കിയ പുതിയ മാർഗനിർദേശങ്ങളുടെ പശ്ചാത്തലത്തിലാണ് നടപടി.
കേന്ദ്ര ആഭ്യന്തര മന്ത്രാലയത്തിന്റെ നിർദേശപ്രകാരം സ്വാതന്ത്ര്യദിനം ഉൾപ്പെടെയുള്ള ഔദ്യോഗിക ആഘോഷങ്ങളിൽ സംസ്ഥാന ഗീതത്തിന് ശേഷം വന്ദേമാതരവും തുടർന്ന് ദേശീയ ഗാനവും ആലപിക്കണമെന്നാണ് നിർദേശം. സംസ്ഥാന ഗീതമില്ലാത്ത സാഹചര്യങ്ങളിൽ ആദ്യം വന്ദേമാതരവും തുടർന്ന് ദേശീയ ഗാനവും ആലപിക്കണമെന്നുമാണ് മാർഗനിർദേശം വ്യക്തമാക്കുന്നത്.
വന്ദേമാതരത്തിന്റെ യഥാർഥ കവിതയിലെ ആറ് ചരണങ്ങളും പൂർണമായി ആലപിക്കണമെന്ന നിർദേശവും കേന്ദ്രം നൽകിയിട്ടുണ്ട്. ദേശീയ ഗാനം ആലപിക്കുമ്പോൾ അതിന്റെ ഔദ്യോഗിക രീതിയും സമയപരിധിയും കൃത്യമായി പാലിക്കണമെന്നും നിർദേശത്തിലുണ്ട്. ദേശീയ ഗാനത്തിന്റെ ഔദ്യോഗിക ആലാപന സമയം മൂന്ന് മിനിറ്റും പത്ത് സെക്കന്റുമാണെന്നും മന്ത്രാലയം വ്യക്തമാക്കുന്നു.
ഇതിനിടെ, വന്ദേമാതരം പൂർണമായും ആലപിക്കേണ്ടതില്ലെന്ന നിലപാടാണ് കോൺഗ്രസ് ദേശീയ നേതൃത്വം മുൻപ് സ്വീകരിച്ചിട്ടുള്ളത്. ഇതോടെ പുതിയ നിർദേശങ്ങൾ രാഷ്ട്രീയ ചർച്ചകൾക്കും വഴിവെച്ചിരിക്കുകയാണ്.
കേന്ദ്ര ആഭ്യന്തര മന്ത്രാലയം സംസ്ഥാനങ്ങൾക്ക് അയച്ച മാർഗനിർദേശങ്ങൾ ബന്ധപ്പെട്ട വകുപ്പുകൾക്കും സ്ഥാപനങ്ങൾക്കും കൈമാറണമെന്നും ആവശ്യപ്പെട്ടിട്ടുണ്ട്. സ്വാതന്ത്ര്യദിനാഘോഷങ്ങൾ ഏകീകൃത രീതിയിൽ സംഘടിപ്പിക്കാനാണ് പുതിയ നിർദേശങ്ങളുടെ ലക്ഷ്യമെന്നാണ് കേന്ദ്രത്തിന്റെ വിശദീകരണം.
