കേരളത്തിൽ ബിജെപി അധികാരത്തിലില്ലെങ്കിലും വി.ഡി. സതീശന്റെ നേതൃത്വത്തിലുള്ള യുഡിഎഫ് സർക്കാർ ബിജെപിയുടെ രാഷ്ട്രീയ അജണ്ടകൾ നടപ്പാക്കുകയാണെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ ആരോപിച്ചു. നരേന്ദ്ര മോദി സർക്കാരും കേരളത്തിലെ യുഡിഎഫ് നേതൃത്വവും സാമ്പത്തിക-രാഷ്ട്രീയ വിഷയങ്ങളിൽ ഒരേ സമീപനമാണ് സ്വീകരിക്കുന്നതെന്നും അദ്ദേഹം പറഞ്ഞു.
സ്വാതന്ത്ര്യദിനാഘോഷങ്ങളിൽ വന്ദേമാതരം പൂർണരൂപത്തിൽ ആലപിക്കണമെന്ന ചീഫ് സെക്രട്ടറിയുടെ ഉത്തരവിനെതിരെയും ഗോവിന്ദൻ മാസ്റ്റർ രംഗത്തെത്തി. ഇത് ആർഎസ്എസ് അജണ്ട നടപ്പാക്കാനുള്ള ശ്രമമാണെന്ന് അദ്ദേഹം ആരോപിച്ചു. വന്ദേമാതരത്തിന്റെ ആദ്യ രണ്ട് ചരണങ്ങൾ മാത്രം പൊതുപരിപാടികളിൽ ആലപിക്കണമെന്ന നിലപാട് ദേശീയ പ്രസ്ഥാനത്തിന്റെ നേതാക്കൾ സ്വീകരിച്ചതിന് പിന്നിൽ മതനിരപേക്ഷത സംരക്ഷിക്കാനുള്ള ലക്ഷ്യമായിരുന്നുവെന്നും അദ്ദേഹം ചൂണ്ടിക്കാട്ടി.
ഗാനത്തിന്റെ ശേഷിക്കുന്ന ഭാഗങ്ങളിൽ മതപരമായ പരാമർശങ്ങൾ ഉൾപ്പെട്ടിരിക്കുന്നതിനാൽ ദേശീയ പ്രസ്ഥാനത്തിന്റെ മതനിരപേക്ഷ സ്വഭാവവുമായി അത് യോജിക്കുന്നതല്ലെന്ന് അദ്ദേഹം അഭിപ്രായപ്പെട്ടു. അതിനാൽ തന്നെ പൂർണരൂപം നിർബന്ധമാക്കാനുള്ള നീക്കം രാഷ്ട്രീയ ലക്ഷ്യത്തോടെയാണെന്നും അദ്ദേഹം ആരോപിച്ചു.
കേന്ദ്ര സർക്കാരിന്റെ കോർപ്പറേറ്റ് അനുകൂല നയങ്ങൾ തന്നെയാണ് കേരള സർക്കാരും പിന്തുടരുന്നതെന്ന് വിമർശിച്ച ഗോവിന്ദൻ മാസ്റ്റർ, കോൺഗ്രസ് സ്വീകരിക്കുന്ന ‘മൃദു ഹിന്ദുത്വ’ സമീപനം മതനിരപേക്ഷ മൂല്യങ്ങൾക്ക് തിരിച്ചടിയാണെന്നും പറഞ്ഞു.
മുസ്ലിം ലീഗ് നിയന്ത്രിക്കുന്ന തദ്ദേശസ്വയംഭരണ വകുപ്പുകൾ ഉൾപ്പെടെ എല്ലാ വകുപ്പുകളിലേക്കും ഈ ഉത്തരവ് നടപ്പാക്കാൻ സർക്കുലർ നൽകിയതും പരിശോധിക്കപ്പെടേണ്ട വിഷയമാണെന്ന് അദ്ദേഹം വ്യക്തമാക്കി.
സത്യപ്രതിജ്ഞാ ചടങ്ങിൽ വന്ദേമാതരം പൂർണരൂപത്തിൽ ആലപിച്ചതുമായി ബന്ധപ്പെട്ട വിവാദത്തിൽ വ്യക്തതയില്ലാതിരുന്ന സർക്കാർ ഇപ്പോൾ അതേ നിലപാട് ഔദ്യോഗിക ഉത്തരവായി മാറ്റിയിരിക്കുകയാണെന്നും അദ്ദേഹം വിമർശിച്ചു. ബിജെപിയുടെ രാഷ്ട്രീയ നിലപാടുകൾക്ക് അനുകൂലമായി പ്രവർത്തിക്കുന്ന ഭരണകൂടമായി യുഡിഎഫ് സർക്കാർ മാറിയെന്ന ബോധ്യം ജനങ്ങളിൽ ശക്തമായിക്കൊണ്ടിരിക്കുകയാണെന്നും എം.വി. ഗോവിന്ദൻ മാസ്റ്റർ കൂട്ടിച്ചേർത്തു.
