അന്താരാഷ്ട്ര സമ്മർദ്ദത്തിന് വഴങ്ങി നേപ്പാൾ; വെള്ളപ്പൊക്ക ദുരന്തത്തിൽ കാണാതായ വിദേശികളെ തേടി പ്രത്യേക രക്ഷാസംഘങ്ങൾ എത്തും

രാജ്യത്തെ ഭീമമായ വെള്ളപ്പൊക്ക ദുരന്തത്തിന്റെ പശ്ചാത്തലത്തിൽ വിദേശ സഹായം സ്വീകരിക്കുന്ന കാര്യത്തിൽ നേപ്പാൾ സർക്കാർ നിലപാട് മാറ്റി. തുടക്കത്തിൽ അന്താരാഷ്ട്ര രക്ഷാപ്രവർത്തക സംഘങ്ങളെ അനുവദിക്കില്ലെന്ന് വ്യക്തമാക്കിയിരുന്ന സർക്കാർ, വിവിധ രാജ്യങ്ങളുടെ നയതന്ത്ര സമ്മർദ്ദത്തെ തുടർന്ന് പ്രത്യേക വൈദഗ്ധ്യമുള്ള വിദേശ സംഘങ്ങൾക്ക് പ്രവേശനം അനുവദിക്കാൻ തീരുമാനിച്ചു.

ഭോട്ടെകോഷി-ത്രിശൂലി നദീതടങ്ങളിൽ കാണാതായ വിദേശ പൗരന്മാരെ കണ്ടെത്തുന്നതിനും പ്രത്യേക സാങ്കേതിക സഹായം ആവശ്യമായ മേഖലകളിലുമാണ് വിദേശ സംഘങ്ങളുടെ സേവനം ഉപയോഗപ്പെടുത്തുക. സാധാരണ രക്ഷാപ്രവർത്തനങ്ങൾ കൈകാര്യം ചെയ്യാൻ രാജ്യത്തിന് മതിയായ ശേഷിയുണ്ടെങ്കിലും തുരങ്ക രക്ഷാപ്രവർത്തനം, ഡിഎൻഎ പരിശോധന, ഫോറൻസിക് പരിശോധന തുടങ്ങിയ മേഖലകളിൽ വിദഗ്ധ സഹായം ആവശ്യമാണെന്ന് നേപ്പാൾ വിദേശകാര്യ മന്ത്രി ശിശിർ ഖനാൽ വ്യക്തമാക്കി.

ഭോട്ടെകോഷി, ത്രിശൂലി നദികളിലുണ്ടായ പ്രളയത്തിൽ വെള്ളിയാഴ്ച വരെ 550-ലധികം പേർ മരിച്ചതായി റിപ്പോർട്ടുണ്ട്. നേപ്പാൾ ദുരന്തനിവാരണ അതോറിറ്റിയുടെ കണക്കുകൾ പ്രകാരം 1,924 പേരെ ഇനിയും കണ്ടെത്താനുണ്ട്. കാണാതായവരിൽ 288 ഇന്ത്യക്കാർ, 100 ചൈനക്കാർ, 65 അമേരിക്കക്കാർ, 53 ഉക്രേനിയൻ പൗരന്മാർ, 35 ഓസ്ട്രേലിയക്കാർ, 33 ബ്രിട്ടീഷ് പൗരന്മാർ എന്നിവരും ഉൾപ്പെടുന്നു.

216 മെഗാവാട്ട് ശേഷിയുള്ള അപ്പർ ത്രിശൂലി-1 ജലവൈദ്യുത പദ്ധതിയിലാണ് സ്ഥിതി ഏറ്റവും ഗുരുതരമെന്ന് റിപ്പോർട്ടുകൾ സൂചിപ്പിക്കുന്നു. ദുരന്തസമയത്ത് ഇവിടെ ജോലി ചെയ്തിരുന്ന 1,350 തൊഴിലാളികളിൽ 576 പേരെക്കുറിച്ച് ഇതുവരെയും വിവരമില്ല. തുരങ്കങ്ങളിൽ കുടുങ്ങിക്കിടക്കുന്നവരെ സമയബന്ധിതമായി കണ്ടെത്താനായാൽ കൂടുതൽ ജീവനുകൾ രക്ഷിക്കാനാകുമെന്നാണ് വിദഗ്ധരുടെ വിലയിരുത്തൽ.

വെള്ളപ്പൊക്കവും തുടർന്നുണ്ടായ മണ്ണിടിച്ചിലും നിരവധി റോഡുകളും ആശയവിനിമയ ശൃംഖലകളും തകർത്തതോടെ രക്ഷാപ്രവർത്തനങ്ങൾ ദുഷ്‌കരമായിരിക്കുകയാണ്. ഈ സാഹചര്യത്തിൽ ഇന്ത്യ ഉൾപ്പെടെയുള്ള രാജ്യങ്ങൾ നേപ്പാളിന് സഹായഹസ്തം നീട്ടിയിട്ടുണ്ട്.

തുരങ്ക രക്ഷാസംഘം, മെഡിക്കൽ സംഘം, എൻഡിആർഎഫ് ഉദ്യോഗസ്ഥർ എന്നിവരെ അയയ്ക്കാൻ തയ്യാറാണെന്ന് ഇന്ത്യ അറിയിച്ചു. വിദേശകാര്യ മന്ത്രി എസ്. ജയശങ്കർ നേപ്പാൾ വിദേശകാര്യ മന്ത്രിയുമായി സംസാരിച്ച് എല്ലാ സഹായവും വാഗ്ദാനം ചെയ്തു. 10 ടൺ ദുരിതാശ്വാസ സാമഗ്രികളുമായി ഇന്ത്യയുടെ മൂന്നാമത്തെ വിമാനം ഇതിനകം കാഠ്മണ്ഡുവിലെത്തിയിട്ടുണ്ട്. ഡോക്ടർമാരും തുരങ്ക രക്ഷാ വിദഗ്ധരും ഉൾപ്പെട്ട 11 അംഗ സംഘവും നേപ്പാളിലേക്ക് പുറപ്പെട്ടിട്ടുണ്ട്.

ദക്ഷിണ കൊറിയയും സ്വന്തം പൗരന്മാരെ കണ്ടെത്തുന്നതിനായി രക്ഷാസംഘത്തെ അയയ്ക്കാൻ താത്പര്യം പ്രകടിപ്പിച്ചിട്ടുണ്ട്. നിലവിൽ ഇന്ത്യ, ചൈന, ഓസ്ട്രേലിയ, ദക്ഷിണ കൊറിയ എന്നിവിടങ്ങളിൽ നിന്നുള്ള വിദഗ്ധ സംഘങ്ങൾക്കാണ് നേപ്പാൾ അനുമതി നൽകിയിരിക്കുന്നത്. റസുവ, നുവാക്കോട്ട് മേഖലകളിലെ ജലവൈദ്യുത പദ്ധതികളുടെ തുരങ്കങ്ങളിലെ തിരച്ചിലും മൃതദേഹങ്ങളെ തിരിച്ചറിയുന്നതിനുള്ള ഡിഎൻഎ പരിശോധനാ നടപടികളിലും ഇവർ പ്രധാന പങ്കുവഹിക്കുമെന്നാണ് പ്രതീക്ഷ.