ഇന്ത്യയുടെ സ്റ്റാർ പേസർ ജസ്പ്രിത് ബുംറയുടെ പരിക്കും തിരിച്ചുവരവും സംബന്ധിച്ച് അനിശ്ചിതത്വം തുടരുന്നതിനിടെ, താരത്തെ കൈകാര്യം ചെയ്ത രീതിക്കെതിരെ വിമർശനവുമായി മുൻ ഇന്ത്യൻ താരം സുബ്രഹ്മണ്യം ബദരീനാഥ്. ബുംറയുടെ വർക്ക്ലോഡ് നിയന്ത്രിക്കുന്നതിൽ ക്യാപ്റ്റൻ, പരിശീലകൻ, സെലക്ടർമാർ എന്നിവർ പരാജയപ്പെട്ടുവെന്നാണ് അദ്ദേഹത്തിന്റെ ആരോപണം.
ബിസിസിഐ മെഡിക്കൽ ടീമിൽ നിന്ന് ബുംറയ്ക്ക് ഇതുവരെ ഫിറ്റ്നസ് ക്ലിയറൻസ് ലഭിച്ചിട്ടില്ല. എന്നിരുന്നാലും, അഫ്ഗാനിസ്ഥാനെതിരായ ടി20 പരമ്പരയ്ക്കുള്ള ഇന്ത്യൻ ടീമിൽ താരത്തെ ഉൾപ്പെടുത്തിയിട്ടുണ്ട്. എന്നാൽ ബുംറയുടെ അന്തിമ പങ്കാളിത്തം പൂർണമായും ഫിറ്റ്നസ് പരിശോധനാഫലത്തെ ആശ്രയിച്ചായിരിക്കും. 2026 ഏഷ്യൻ ഗെയിംസ് ടീമിലേക്കുള്ള തിരഞ്ഞെടുപ്പും ഫിറ്റ്നസ് തെളിയിക്കുന്നതിനെ അടിസ്ഥാനമാക്കിയായിരിക്കും.
കഴിഞ്ഞ ജൂലൈ 16ന് ഇംഗ്ലണ്ടിനെതിരായ രണ്ടാം ഏകദിനത്തിനിടെയാണ് ബുംറയ്ക്ക് മുട്ടിന് പരിക്കേറ്റത്. അതിനുശേഷം താരം മത്സര ക്രിക്കറ്റിൽ പന്തെറിഞ്ഞിട്ടില്ല.
ബുംറയുടെ പരിക്കിനെക്കുറിച്ച് പ്രതികരിച്ച ബദരീനാഥ്, ഫിറ്റ്നസ് സെന്ററിന്റെ പങ്ക് താരത്തിന്റെ ശാരീരികാവസ്ഥയും കളിക്കാനാകുന്ന മത്സരങ്ങളുടെ എണ്ണവും സംബന്ധിച്ച റിപ്പോർട്ട് നൽകുന്നതിൽ മാത്രമാണെന്ന് ചൂണ്ടിക്കാട്ടി. അന്തിമ തീരുമാനം എടുക്കേണ്ടത് ക്യാപ്റ്റനും പരിശീലകനും സെലക്ടർമാരുമാണെന്നും അദ്ദേഹം തന്റെ യൂട്യൂബ് ചാനലിലൂടെ വ്യക്തമാക്കി.
അതേസമയം, ബുംറയുടെ തിരിച്ചുവരവ് എപ്പോൾ സാധ്യമാകുമെന്ന കാര്യത്തിൽ വ്യക്തതയില്ലാത്ത സാഹചര്യത്തിൽ ഡൽഹി പേസർ പ്രിൻസ് യാദവിനെ ബാക്കപ്പ് ബൗളറായി അഫ്ഗാനിസ്ഥാൻ പരമ്പരയ്ക്കായി പരിഗണിക്കുന്നതായി റിപ്പോർട്ടുകളുണ്ട്.
ഈ മാസം 10ന് ദേശീയ ക്രിക്കറ്റ് അക്കാദമിയിൽ നടക്കുന്ന മാച്ച്-സിമുലേഷൻ ടെസ്റ്റുകൾക്ക് ബുംറ, നിതീഷ് കുമാർ റെഡ്ഡി, വാഷിങ്ടൺ സുന്ദർ, ഹർഷിത് റാണ എന്നിവർ ഹാജരാകും. ഈ പരിശോധനകളുടെ ഫലമാണ് ബുംറയുടെ മടങ്ങിവരവിനെക്കുറിച്ചുള്ള അന്തിമ ചിത്രം വ്യക്തമാക്കുക.
