ഡൽഹിയിൽ നടന്ന പതിനെട്ടാമത് ബ്രിക്സ് ഉച്ചകോടിക്കിടെ പ്രധാനമന്ത്രി നരേന്ദ്ര മോദിയും ചൈനീസ് പ്രസിഡന്റ് ഷി ജിൻപിംഗും നടത്തിയ ഉഭയകക്ഷി കൂടിക്കാഴ്ചയ്ക്ക് പിന്നാലെ ഇന്ത്യയുടെ സ്വതന്ത്ര വിദേശനയത്തെയും തന്ത്രപരമായ പരമാധികാരത്തെയും പ്രശംസിച്ച് ചൈന. ചൈനയുമായുള്ള ബന്ധം വികസിപ്പിക്കുന്നത് മൂന്നാം രാജ്യങ്ങളുടെ സ്വാധീനത്തിലല്ലെന്ന പ്രധാനമന്ത്രി മോദിയുടെ നിലപാടിനെ സ്വാഗതം ചെയ്യുന്നതായി ചൈനീസ് വിദേശകാര്യ മന്ത്രാലയം അറിയിച്ചു.
ഇന്ത്യയും ചൈനയും എതിരാളികളല്ല, മറിച്ച് പങ്കാളികളായിരിക്കണമെന്നതാണ് ഇരുനേതാക്കളും പങ്കുവെച്ച പ്രധാന ധാരണയെന്ന് ചൈനീസ് വിദേശകാര്യ മന്ത്രാലയ വക്താവ് ഗോ ജിയാകുൻ വ്യക്തമാക്കി. സ്വന്തം മണ്ണ് ചൈന വിരുദ്ധ പ്രവർത്തനങ്ങൾക്ക് ഉപയോഗിക്കാൻ ഒരു ശക്തിയെയും അനുവദിക്കില്ലെന്ന ഇന്ത്യയുടെ ഉറപ്പിനെയും ചൈന അനുകൂലമായി പരാമർശിച്ചു.
അതിർത്തി തർക്കങ്ങൾ ഉഭയകക്ഷി ബന്ധത്തിന്റെ മൊത്തത്തിലുള്ള പുരോഗതിയെ ബാധിക്കരുതെന്നും അതിർത്തി മേഖലയിൽ സമാധാനവും സ്ഥിരതയും നിലനിർത്താൻ ഇരുരാജ്യങ്ങളും ചേർന്ന് പ്രവർത്തിക്കുമെന്നും ചർച്ചയിൽ ധാരണയായി. അഭിപ്രായവ്യത്യാസങ്ങൾ നിയന്ത്രിത രീതിയിൽ കൈകാര്യം ചെയ്യുകയും സഹകരണ മേഖലകൾ കൂടുതൽ വിപുലപ്പെടുത്തുകയും ചെയ്യേണ്ടതിന്റെ ആവശ്യകതയും നേതാക്കൾ ചൂണ്ടിക്കാട്ടി.
വ്യാപാര രംഗത്തെ ആശങ്കകൾ പരിഹരിക്കുന്നതിനും ജനങ്ങൾ തമ്മിലുള്ള ബന്ധം ശക്തിപ്പെടുത്തുന്നതിനുമായി നേരിട്ടുള്ള വിമാന സർവീസുകൾ പുനരാരംഭിക്കാനും ഇരുരാജ്യങ്ങളും സമ്മതിച്ചു. ഏഴ് വർഷത്തിന് ശേഷം ഷി ജിൻപിംഗ് ഇന്ത്യ സന്ദർശിച്ച സാഹചര്യത്തിൽ നടന്ന ഈ കൂടിക്കാഴ്ച ഇന്ത്യ-ചൈന ബന്ധം സാധാരണ നിലയിലാക്കാനുള്ള നിർണ്ണായക നീക്കമായാണ് വിലയിരുത്തപ്പെടുന്നത്.
അടുത്ത വർഷം ബ്രിക്സ് അധ്യക്ഷസ്ഥാനം ഏറ്റെടുക്കാനൊരുങ്ങുന്ന ചൈന, ഗ്ലോബൽ സൗത്ത് രാജ്യങ്ങളുടെ വികസനത്തിനും അന്താരാഷ്ട്ര വേദികളിലെ സഹകരണത്തിനുമായി ഇന്ത്യയുമായി കൂടുതൽ അടുത്ത് പ്രവർത്തിക്കുമെന്നും വ്യക്തമാക്കി.
