പശ്ചിമ ബംഗാളിലെ രാഷ്ട്രീയ മുന്നേറ്റത്തിന് പിന്നാലെ തെലങ്കാനയിൽ അധികാരം പിടിക്കാനുള്ള ആത്മവിശ്വാസം ഉയർത്തി ബിജെപി നേതൃത്വം. സംസ്ഥാനത്ത് വിജയക്കൊടി പാറിക്കുകയാണ് പാർട്ടിയുടെ അടുത്ത ലക്ഷ്യമെന്ന് തെലങ്കാന ബിജെപി അധ്യക്ഷൻ രാമചന്ദ്ര റാവു വ്യക്തമാക്കി.
ഹൈദരാബാദിൽ നിന്നായിരിക്കും വിജയയാത്ര ആരംഭിക്കുകയെന്നും വരാനിരിക്കുന്ന കോർപ്പറേഷൻ തിരഞ്ഞെടുപ്പിൽ എല്ലാ സീറ്റുകളും നേടാൻ ബിജെപി ശ്രമിക്കുമെന്നും അദ്ദേഹം പറഞ്ഞു. ബിആർഎസ്, കോൺഗ്രസ്, എഐഎംഐഎം എന്നീ പാർട്ടികൾ ഒന്നിച്ചാലും ബിജെപിയെ പരാജയപ്പെടുത്താൻ കഴിയില്ലെന്നും രാമചന്ദ്ര റാവു അവകാശപ്പെട്ടു.
അതേസമയം, ബിജെപി ദേശീയ അധ്യക്ഷൻ നിതിൻ നബിൻ ഉടൻ ഹൈദരാബാദ് സന്ദർശിക്കുമെന്ന് പാർട്ടി നേതൃത്വം അറിയിച്ചു. സംസ്ഥാനത്തെ സംഘടനാ പ്രവർത്തനങ്ങൾ ശക്തിപ്പെടുത്തുന്നതിന്റെ ഭാഗമായാണ് സന്ദർശനം.
രാജ്യസഭാംഗം ഡോ. കെ. ലക്ഷ്മൺ പറഞ്ഞത്, ബിജെപിയുടെ ദേശീയ നേതൃത്വം ഇപ്പോൾ തെലങ്കാനയെ പ്രത്യേക ശ്രദ്ധയോടെ കാണുകയാണെന്നാണ്. ഈ മാസം 29-ന് നിതിൻ നബിൻ വാറങ്കൽ സന്ദർശിച്ച് ആർട്സ് ആൻഡ് സയൻസ് കോളേജിൽ നടക്കുന്ന ബൂത്ത് തല പ്രവർത്തക സമ്മേളനത്തിൽ പങ്കെടുക്കുമെന്നും അദ്ദേഹം അറിയിച്ചു.
കോൺഗ്രസ് സർക്കാരിനെതിരെയും കെ. ലക്ഷ്മൺ വിമർശനം ഉന്നയിച്ചു. ബിജെപിക്ക് പകരം കോൺഗ്രസിനെ പിന്തുണച്ച ജനങ്ങൾ പ്രതീക്ഷിച്ച മാറ്റം ലഭിച്ചില്ലെന്നും സംസ്ഥാനത്ത് രാഷ്ട്രീയ ബദലായി ബിജെപി ഉയർന്നുവരുകയാണെന്നും അദ്ദേഹം പറഞ്ഞു.
