തെരഞ്ഞെടുപ്പുകളിൽ പാർട്ടി നേരിട്ട കനത്ത തിരിച്ചടികളും തോൽവികളും ജനങ്ങൾക്കു മുന്നിൽ തുറന്നുസമ്മതിച്ച് സിപിഎം ജനറൽ സെക്രട്ടറി എം.എ. ബേബി. ലോക്സഭാ തെരഞ്ഞെടുപ്പിലും തദ്ദേശസ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പുകളിലും പിന്നീട് നിയമസഭാ തെരഞ്ഞെടുപ്പിലും പാർട്ടിക്ക് തിരിച്ചടി നേരിട്ടതായി അദ്ദേഹം പറഞ്ഞു. തെരഞ്ഞെടുപ്പുകൾ കൈകാര്യം ചെയ്യുന്നതിൽ സിപിഎമ്മിനും ഇടതുപക്ഷത്തിനും പിഴവുകൾ സംഭവിച്ചിട്ടുണ്ടെന്നും അദ്ദേഹം തുറന്നുപറഞ്ഞു.
കോഴിക്കോട് സംഘടിപ്പിച്ച സിപിഎം വിപുലീകൃത സംസ്ഥാന കമ്മിറ്റി യോഗത്തിന്റെ സമാപന പൊതുസമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു എം.എ. ബേബി.
“പാർട്ടിക്ക് തെറ്റുകൾ സംഭവിച്ചുവെന്ന് തിരിച്ചറിയാൻ ജനങ്ങൾ ഇത്ര വലിയ തോൽവി നൽകേണ്ടിയിരുന്നോ? കുറച്ച് കടുത്ത തോൽവിയാണ് ഉണ്ടായത്. എന്നാൽ വസ്തുതകളെ വസ്തുതകളായി കാണുന്ന പ്രസ്ഥാനമാണ് സിപിഎം,” എന്ന് അദ്ദേഹം പറഞ്ഞു.
കേരളത്തിൽ തീവ്രവലതുപക്ഷ വർഗീയ-സാമുദായിക ഏകീകരണം നടന്നതും തെരഞ്ഞെടുപ്പ് തോൽവിയുടെ പ്രധാന കാരണങ്ങളിലൊന്നാണെന്ന് എം.എ. ബേബി ചൂണ്ടിക്കാട്ടി. അതോടൊപ്പം പാർട്ടിയുടെ ഭാഗത്തും ചെറുതും വലുതുമായ പോരായ്മകൾ ഉണ്ടായിരുന്നുവെന്നും അദ്ദേഹം സമ്മതിച്ചു.
കേരളത്തിൽ അതിതീവ്ര ദാരിദ്ര്യം പൂർണമായി ഇല്ലാതാക്കിയ ആദ്യ സംസ്ഥാനമെന്ന നേട്ടം പിണറായി വിജയൻ സർക്കാരിന് സ്വന്തമാണെന്നും നിരവധി വികസന നേട്ടങ്ങൾ കൈവരിച്ചിട്ടും എന്തുകൊണ്ടാണ് ഇത്ര വലിയ തിരിച്ചടി ഉണ്ടായതെന്ന് പാർട്ടി ഗൗരവമായി പരിശോധിച്ചുവെന്നും അദ്ദേഹം പറഞ്ഞു.
വ്യാജ പ്രതീതി നിർമാണവും സംഘടിത കള്ളപ്രചാരണങ്ങളും തെരഞ്ഞെടുപ്പ് ഫലത്തെ സ്വാധീനിച്ചുവെന്നാണ് എം.എ. ബേബിയുടെ ആരോപണം. ഇടതുപക്ഷവും ആർ.എസ്.എസ്-ഉം തമ്മിൽ ധാരണയുണ്ടെന്ന തരത്തിലുള്ള പ്രചാരണങ്ങളും മുഖ്യമന്ത്രി പിണറായി വിജയനെ ലക്ഷ്യമിട്ടുള്ള ആക്രമണങ്ങളും വ്യാപകമായി നടന്നുവെന്നും അദ്ദേഹം പറഞ്ഞു.
സ്മാർട്ട്ഫോൺ ഉപയോക്താക്കളെ ലക്ഷ്യമിട്ട് വ്യാജവാർത്തകളും കെട്ടുകഥകളും വ്യാപകമായി പ്രചരിപ്പിക്കപ്പെടുകയാണെന്നും അദ്ദേഹം ആരോപിച്ചു. ഇപ്പോൾ പുതിയ രൂപത്തിൽ എൻഫോഴ്സ്മെന്റ് ഡയറക്ടറേറ്റിനെയും ഉപയോഗിച്ച് രാഷ്ട്രീയ ലക്ഷ്യങ്ങളോടെയുള്ള നീക്കങ്ങൾ നടക്കുകയാണെന്നും എം.എ. ബേബി പറഞ്ഞു.
പിണറായി വിജയൻ, വീണ വിജയൻ, പി.എ. മുഹമ്മദ് റിയാസ് എന്നിവർക്കെതിരായ നീക്കങ്ങളെ രാഷ്ട്രീയ പ്രേരിതമായാണ് കാണുന്നതെന്നും അത്തരം ശ്രമങ്ങളെ ശക്തമായി പ്രതിരോധിക്കുമെന്നും അദ്ദേഹം വ്യക്തമാക്കി.
പ്രതിസന്ധികളെ മറികടന്ന് പാർട്ടിയെ വീണ്ടും വിജയപാതയിലേക്ക് തിരിച്ചുകൊണ്ടുവരാൻ വിപുലീകൃത സംസ്ഥാന കമ്മിറ്റി നിർണായക തീരുമാനങ്ങൾ കൈക്കൊണ്ടിട്ടുണ്ടെന്നും കേരളത്തിലും പശ്ചിമ ബംഗാളിലും നടന്ന സംഘടനാ അവലോകനങ്ങൾ പാർട്ടിക്ക് പുതിയ കരുത്ത് പകരുമെന്നും എം.എ. ബേബി കൂട്ടിച്ചേർത്തു.
