മലപ്പുറം താനാളൂർ പഞ്ചായത്തിലെ 17-ാം വാർഡിൽ അയ്യപ്പ ഭക്തിഗാനം തിരഞ്ഞെടുപ്പ് പാരഡിയാക്കി സിപിഐഎം രംഗത്തെത്തി. ലീഗ് പ്രാദേശിക നേതാക്കളുടെ പേരുകൾ പരാമർശിച്ചാണ് പാരഡി ഗാനം പുറത്തിറക്കിയത്. എന്നാൽ നേതൃത്വത്തിന്റെ അറിവോടെയല്ല പാട്ട് തയ്യാറാക്കിയതെന്ന് സിപിഐഎം വിശദീകരിച്ചു.
ഇത്തവണത്തെ തദ്ദേശ തിരഞ്ഞെടുപ്പിനിടെയാണ് സിപിഐഎം അയ്യപ്പഭക്തി ഗാനത്തിന്റെ പാരഡി ഉപയോഗിച്ചത്. എൽഡിഎഫ് സ്ഥാനാർഥിയുടെ വിജയാഘോഷത്തിനായി ഒരുക്കിയ ഗാനമാണിത്. മുൻ പഞ്ചായത്ത് വൈസ് പ്രസിഡന്റിന്റെ മരുമകളായിരുന്നു ഇവിടെ എൽഡിഎഫ് സ്ഥാനാർഥി.
കഴിഞ്ഞ 22 വർഷമായി എൽഡിഎഫ് ഭരിച്ചിരുന്ന താനാളൂർ പഞ്ചായത്ത് ഇത്തവണ യുഡിഎഫ് കൈവശപ്പെടുത്തി. 24 വാർഡുകളിൽ 17 സീറ്റുകൾ നേടിയാണ് യുഡിഎഫ് ഭരണം പിടിച്ചത്. അതേസമയം, തങ്ങളുടെ സ്ഥാനാർഥികൾക്കെതിരെയും സമാനമായ പാരഡി ഗാനങ്ങൾ തയ്യാറാക്കിയിരുന്നുവെന്ന് എൽഡിഎഫ് പ്രതികരിച്ചു.
