മുന്നണി മാറ്റമില്ലെന്നും എൽഡിഎഫിൽ ഉറച്ചുനിൽക്കുമെന്നും കേരളാ കോൺഗ്രസ് (എം) നേതാവ് ജോസ് കെ. മാണി വ്യക്തമാക്കി. സ്റ്റിയറിംഗ് കമ്മിറ്റി യോഗത്തിൽ തന്റെ നിലപാടിന് നേതാക്കളുടെ പൂർണ പിന്തുണ ലഭിച്ചതായും അദ്ദേഹം പറഞ്ഞു. എൽഡിഎഫ് മധ്യ മേഖലാ ജാഥ താനാണ് നയിക്കുകയെന്നും യോഗത്തിന് ശേഷം നടത്തിയ വാർത്താസമ്മേളനത്തിൽ അറിയിച്ചു.
കേരളാ കോൺഗ്രസിനെ പുറത്താക്കിയത് യുഡിഎഫാണെന്നും അങ്ങനെയൊരു മുന്നണിയിലേക്ക് തിരികെ പോകാനുള്ള സാഹചര്യമില്ലെന്നും ജോസ് കെ. മാണി വ്യക്തമാക്കി. യുഡിഎഫ് പുറത്താക്കിയപ്പോൾ ചേർത്തുപിടിച്ചത് എൽഡിഎഫും മുഖ്യമന്ത്രി പിണറായി വിജയനുമാണെന്നും അദ്ദേഹം പറഞ്ഞു.
ഭരണപക്ഷത്തിരുന്ന് ജനകീയ വിഷയങ്ങളിൽ പാർട്ടി സജീവമായി ഇടപെട്ടുവെന്നും ബഫർ സോൺ, വന്യജീവി പ്രശ്നങ്ങൾ, വനനിയമ ഭേദഗതി, ഭിന്നശേഷി സംവരണം തുടങ്ങിയ വിഷയങ്ങളിൽ ശക്തമായ നിലപാട് സ്വീകരിച്ചതായും അദ്ദേഹം കൂട്ടിച്ചേർത്തു. വരുന്ന നിയമസഭാ തിരഞ്ഞെടുപ്പിൽ കുറഞ്ഞത് 13 സീറ്റുകൾ ആവശ്യപ്പെടുമെന്നും അതിലധികം സീറ്റുകൾ സംബന്ധിച്ചും ചർച്ച നടത്തുമെന്നും ജോസ് കെ. മാണി വ്യക്തമാക്കി.
