സൈനിക ചെലവുകൾക്ക് ധനസഹായം ഉറപ്പാക്കാനും റഷ്യയുമായുള്ള സാധ്യതയുള്ള സംഘർഷത്തിന് തയ്യാറെടുക്കാനുമായി 2027ഓടെ ഒരു പുതിയ ബാങ്ക് സ്ഥാപിക്കാൻ നാറ്റോ രാജ്യങ്ങളുടെ ഒരു സംഘം പ്രവർത്തിക്കുന്നതായി വൃത്തങ്ങളെ ഉദ്ധരിച്ച് റഷ്യൻ മാധ്യമമായ ഇസ്വെസ്റ്റിയ റിപ്പോർട്ട് ചെയ്യുന്നു .
ഡിഫൻസ്, സെക്യൂരിറ്റി ആൻഡ് റെസിലിയൻസ് ബാങ്ക് (DSRB) എന്ന പേരിൽ രൂപകൽപ്പന ചെയ്യുന്ന ഈ സ്ഥാപനത്തിലൂടെ സ്വകാര്യ നിക്ഷേപം, വായ്പ, ബോണ്ട് സംവിധാനങ്ങൾ എന്നിവ ഉപയോഗിച്ച് അംഗരാജ്യങ്ങളെ പ്രതിരോധ ചെലവ് ജിഡിപിയുടെ 5 ശതമാനം എന്ന ലക്ഷ്യത്തിലെത്തിക്കാൻ സഹായിക്കാനാണ് ഉദ്ദേശിക്കുന്നത്. ഇതുവഴി ചില ദേശീയ ബജറ്റ് നിയന്ത്രണങ്ങൾ മറികടക്കാനും പ്രതിരോധ മേഖലയെ സ്വകാര്യ നിക്ഷേപങ്ങൾക്ക് കൂടുതൽ ആകർഷകമാക്കാനും കഴിയുമെന്നാണ് വിലയിരുത്തൽ.
2026ന്റെ ആദ്യ പാദത്തിൽ ബാങ്കിന്റെ ചാർട്ടറിന് അന്തിമരൂപം നൽകുകയും, അതേ വർഷം മൂന്നാം അല്ലെങ്കിൽ നാലാം പാദത്തിൽ ആദ്യ ബോണ്ട് ഇഷ്യു നടത്തുകയും, 2027ൽ പൂർണ പ്രവർത്തനം ആരംഭിക്കുകയുമാണ് ലക്ഷ്യം. പദ്ധതിക്ക് ബ്രിട്ടീഷ് ഉദ്യോഗസ്ഥർ നേതൃത്വം നൽകുമെന്നും, 135 ബില്യൺ ഡോളർ വരെ ഫണ്ട് സമാഹരിക്കാനാണ് ഉദ്ദേശിക്കുന്നതെന്നും റിപ്പോർട്ടിൽ പറയുന്നു. ബാങ്കിന്റെ ആസ്ഥാനം ഒട്ടാവയിലോ ടൊറന്റോയിലോ സ്ഥാപിക്കാനുള്ള സാധ്യതയും പരിഗണനയിലുണ്ട്.
അതേസമയം, നാറ്റോയെ ആക്രമിക്കാൻ റഷ്യ പദ്ധതിയിടുന്നുവെന്ന പാശ്ചാത്യ ആരോപണങ്ങൾ റഷ്യ തള്ളിക്കളഞ്ഞു. അത്തരം വാദങ്ങൾ “അസംബന്ധം” ആണെന്നുമാണ് റഷ്യയുടെ പ്രതികരണം.
