മലയാള സിനിമാ താരസംഘടനയായ ‘അമ്മ’യിൽ ഉയർന്നിരിക്കുന്ന വിവാദങ്ങളും ആഭ്യന്തര പ്രശ്നങ്ങളും സംഘടനയുടെ സ്വന്തം കാര്യങ്ങളാണെന്നും അതിൽ സർക്കാർ ഇടപെടുന്നത് ഉചിതമല്ലെന്നും സാംസ്കാരിക വകുപ്പ് മന്ത്രി പി.സി. വിഷ്ണുനാഥ് വ്യക്തമാക്കി.
‘അമ്മ’യിൽ നടന്ന ചർച്ചകളും അഭിപ്രായ ഭിന്നതകളും ഏത് തലത്തിലാണ് ഉണ്ടായതെന്ന് വ്യക്തമായ വിവരം തനിക്കില്ലെന്ന് മന്ത്രി പറഞ്ഞു. സംഘടനയ്ക്കുള്ളിലെ പ്രശ്നങ്ങൾ അവരവരുടെ സംവിധാനത്തിലൂടെ തന്നെ പരിഹരിക്കപ്പെടണമെന്നാണ് സർക്കാരിന്റെ നിലപാടെന്നും അദ്ദേഹം കൂട്ടിച്ചേർത്തു.
മലയാള സിനിമ നിലവിൽ മികച്ച വളർച്ചയുടെ പാതയിലാണെന്നും, ആഭ്യന്തര വിവാദങ്ങൾ മാറ്റിനിർത്തി നോക്കുമ്പോൾ സിനിമാ മേഖല ഒരു പുതിയ സുവർണകാലഘട്ടത്തിലേക്ക് കടന്നിരിക്കുകയാണെന്നും മന്ത്രി അഭിപ്രായപ്പെട്ടു. ദേശീയ-അന്തർദേശീയ തലങ്ങളിൽ മലയാള സിനിമയ്ക്ക് വലിയ അംഗീകാരവും ശ്രദ്ധയും ലഭിച്ചുകൊണ്ടിരിക്കുകയാണെന്നും അദ്ദേഹം ചൂണ്ടിക്കാട്ടി.
ഇതിനിടെ, രാജ്യാന്തര ചലച്ചിത്രമേള കൊച്ചിയിലേക്ക് മാറ്റുമെന്ന പ്രചാരണം അടിസ്ഥാനരഹിതമാണെന്നും മന്ത്രി വ്യക്തമാക്കി. ഇത്തവണയും മേള തിരുവനന്തപുരം നഗരത്തിൽ തന്നെ സംഘടിപ്പിക്കുമെന്നും വേദിമാറ്റവുമായി ബന്ധപ്പെട്ട വാർത്തകൾ വ്യാജപ്രചാരണമാണെന്നും അദ്ദേഹം മാധ്യമങ്ങളോട് പറഞ്ഞു.
