വിപുലീകൃത ജില്ലാ കമ്മിറ്റിയുമായി ബന്ധപ്പെട്ട തർക്കങ്ങൾക്കുപിന്നാലെ പാർട്ടിയുമായി അകൽച്ചയിലാണെന്ന സൂചന നൽകിയ മുൻ കണ്ണൂർ ജില്ലാ പഞ്ചായത്ത് പ്രസിഡന്റ് പി.പി. ദിവ്യയെ അനുനയിപ്പിക്കാൻ സിപിഐഎം കേന്ദ്രനേതൃത്വം ഇടപെടുന്നു. കേന്ദ്രകമ്മിറ്റിക്ക് ദിവ്യ നൽകിയ പരാതിയുടെ അടിസ്ഥാനത്തിലാണ് നേതൃത്വത്തിന്റെ ഇടപെടൽ. കേന്ദ്രനേതാക്കൾ ദിവ്യയുമായി ഫോണിൽ സംസാരിച്ചതായാണ് വിവരം.
സിപിഐഎമ്മിലെ ചില നേതാക്കൾക്കെതിരെയും ദിവ്യ പരാതിയിൽ ആരോപണങ്ങൾ ഉന്നയിച്ചിട്ടുണ്ടെന്നാണ് റിപ്പോർട്ട്. പാർട്ടിക്കുള്ളിലെ പ്രശ്നങ്ങളിൽ കേന്ദ്രനേതൃത്വം ഇടപെട്ടതോടെ ദിവ്യയുടെ പരാതിയിൽ തുടർനടപടികൾക്ക് സാധ്യതയേറിയിട്ടുണ്ട്.
സിപിഐഎമ്മിൽനിന്ന് അകലുന്നതിന്റെ സൂചനകൾ നൽകിക്കൊണ്ട് ദിവ്യ കഴിഞ്ഞ ദിവസം ഫേസ്ബുക്കിൽ പങ്കുവച്ച കുറിപ്പും ചർച്ചയായിരുന്നു. “ചില വേർപിരിയലുകൾ നഷ്ടങ്ങളല്ല, പുതിയ വഴികളിലേക്കുള്ള തുടക്കങ്ങളായിരിക്കാം” എന്ന ആശയത്തിലൂന്നിയായിരുന്നു കുറിപ്പ്. ഇതോടെ ദിവ്യ പാർട്ടിയുമായി അകൽച്ചയിലാണെന്ന അഭ്യൂഹങ്ങൾ ശക്തമായി.
അതേസമയം, കാർട്ടൺ കമ്പനിക്ക് കരാറുകൾ നൽകിയതിൽ അഴിമതിയുണ്ടെന്ന കെഎസ്‌യു സംസ്ഥാന വൈസ് പ്രസിഡന്റിന്റെ പരാതിയിൽ വിജിലൻസ് പ്രാഥമിക അന്വേഷണം പ്രഖ്യാപിച്ചതിനെയും ദിവ്യ സ്വാഗതം ചെയ്തിരുന്നു. അനധികൃതമായി ഒരിഞ്ച് ഭൂമിയെങ്കിലും കണ്ടെത്തിയാൽ അത് പരാതിക്കാരനായ മുഹമ്മദ് ഷമ്മാസിന്റെ പേരിൽ രജിസ്റ്റർ ചെയ്യാൻ തയ്യാറാണെന്ന് ഫേസ്ബുക്ക് കുറിപ്പിലൂടെ ദിവ്യ പ്രതികരിച്ചിരുന്നു.
പാർട്ടിക്കുള്ളിലെ അസ്വാരസ്യങ്ങളും ദിവ്യയുടെ പരാതിയും സംബന്ധിച്ച് സിപിഐഎം നേതൃത്വം സ്വീകരിക്കുന്ന തുടർനടപടികളിലാണ് ഇനി ശ്രദ്ധ.
