മുൻ പാകിസ്ഥാൻ പ്രധാനമന്ത്രി ഇമ്രാൻ ഖാന്റെ ആരോഗ്യനിലയെക്കുറിച്ച് ഗുരുതര ആശങ്ക പ്രകടിപ്പിച്ച് മകൻ ഖാസിം ഖാൻ രംഗത്ത്. ഏകദേശം 1100 ദിവസമായി പിതാവ് ജയിലിൽ കഴിയുകയാണെന്നും ആവശ്യമായ വൈദ്യസഹായം ലഭിക്കാത്തതിനാൽ അദ്ദേഹത്തിന്റെ ആരോഗ്യനില മോശമാകുകയാണെന്നും ഖാസിം സമൂഹമാധ്യമത്തിലൂടെ ആരോപിച്ചു.
ശരിയായ ചികിത്സ ലഭിക്കാത്തത് മൂലം ഇമ്രാൻ ഖാന്റെ കാഴ്ചശക്തി ക്രമേണ കുറയുകയാണെന്ന് ഖാസിം പറഞ്ഞു. കുടുംബാംഗങ്ങൾക്കും അഭിഭാഷകർക്കും അദ്ദേഹത്തെ കാണാൻ പാകിസ്ഥാൻ അധികൃതർ അനുമതി നൽകുന്നില്ലെന്നും അദ്ദേഹം ആരോപിച്ചു. മാർച്ചിന് ശേഷം പിതാവിന്റെ ശബ്ദം പോലും കേൾക്കാൻ കഴിഞ്ഞിട്ടില്ലെന്ന വേദനയും ഖാസിം പങ്കുവച്ചു.
പാകിസ്ഥാനിലെ നിലവിലെ ഭരണകൂടം ജനാധിപത്യ സ്ഥാപനങ്ങളെയും ഭരണഘടനാ സംവിധാനങ്ങളെയും ദുർബലപ്പെടുത്തുകയാണെന്ന് ഖാസിം വിമർശിച്ചു. പ്രതിപക്ഷ നേതാക്കളെ അടിച്ചമർത്തുകയും ജനങ്ങളുടെ അവകാശങ്ങൾ നിഷേധിക്കുകയും ചെയ്യുന്ന നടപടികളാണ് രാജ്യത്ത് നടക്കുന്നതെന്നും അദ്ദേഹം ആരോപിച്ചു.
ഇമ്രാൻ ഖാന് ആവശ്യമായ വൈദ്യസഹായം ഉടൻ ഉറപ്പാക്കാൻ അന്താരാഷ്ട്ര സമൂഹവും മനുഷ്യാവകാശ സംഘടനകളും ഇടപെടണമെന്ന് ഖാസിം ആവശ്യപ്പെട്ടു. അദ്ദേഹത്തിന്റെ ആരോഗ്യസ്ഥിതി സംബന്ധിച്ച് സ്വതന്ത്രമായ പരിശോധന നടത്തണമെന്നും അദ്ദേഹം ആവശ്യപ്പെട്ടു.
തോഷഖാന അഴിമതി കേസിൽ കുറ്റക്കാരനാണെന്ന് കോടതി കണ്ടെത്തിയതിനെ തുടർന്ന് 2023 ഓഗസ്റ്റ് 5-നാണ് ഇമ്രാൻ ഖാൻ അറസ്റ്റിലായത്. അതിനുശേഷം റാവൽപിണ്ടിയിലെ അഡിയാല ജയിലിലാണ് അദ്ദേഹം കഴിയുന്നത്. ജയിലിൽ ആവശ്യമായ ചികിത്സ ലഭിക്കാത്തതിനെ തുടർന്ന് അദ്ദേഹത്തിന്റെ വലത് കണ്ണിന്റെ കാഴ്ചയ്ക്ക് സാരമായ പ്രശ്നങ്ങൾ ഉണ്ടായതായി പാകിസ്ഥാൻ തെഹ്രീക്-ഇ-ഇൻസാഫ് (പിടിഐ) പാർട്ടിയുമായി ബന്ധപ്പെട്ട വൃത്തങ്ങളും കുടുംബാംഗങ്ങളും ആരോപിക്കുന്നു.
ബ്രിട്ടനിൽ താമസിക്കുന്ന ഇമ്രാൻ ഖാന്റെ മക്കളായ ഖാസിം ഖാനും സുലൈമാൻ ഖാനും പിതാവിന്റെ ആരോഗ്യനിലയിൽ കടുത്ത ആശങ്ക പ്രകടിപ്പിച്ചിരിക്കുകയാണ്. ഇമ്രാൻ ഖാന്റെ സുരക്ഷയും ചികിത്സയും ഉറപ്പാക്കാൻ അന്താരാഷ്ട്ര സമ്മർദം ശക്തമാകണമെന്നാണ് കുടുംബത്തിന്റെ ആവശ്യം.
