ദുലീപ് ട്രോഫി സെമിഫൈനലിൽ സെഞ്ച്വറിക്ക് തൊട്ടരികിലെത്തി പുറത്തായി യുവതാരം വൈഭവ് സൂര്യവംശി. തിങ്കളാഴ്ച ഈസ്റ്റ് സോണും സെൻട്രൽ സോണും തമ്മിലുള്ള മത്സരത്തിൽ 81 പന്തിൽ 92 റൺസെടുത്താണ് സൂര്യവംശി പുറത്തായത്.
15 വർഷവും 157 ദിവസവും പ്രായമുള്ള സൂര്യവംശിക്ക് സെഞ്ച്വറി നേടാനായിരുന്നെങ്കിൽ ഫസ്റ്റ് ക്ലാസ് ക്രിക്കറ്റിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ രണ്ടാമത്തെ ഇന്ത്യൻ താരമാകാമായിരുന്നു. 1988ലെ രഞ്ജി ട്രോഫിയിൽ 15 വർഷവും 230 ദിവസവും പ്രായത്തിൽ സെഞ്ച്വറി നേടിയ സച്ചിൻ ടെൻഡുൽക്കറുടെ റെക്കോർഡാണ് ഈ പട്ടികയിൽ നിലവിൽ രണ്ടാമത്തേത്.
ഇന്ത്യൻ ക്രിക്കറ്റിലെ ഏറ്റവും പ്രായം കുറഞ്ഞ ഫസ്റ്റ് ക്ലാസ് സെഞ്ച്വറി എന്ന റെക്കോർഡ് ധ്രുവ് പാണ്ഡോവിന്റെ പേരിലാണ്. 1988ൽ 14 വർഷവും 293 ദിവസവും പ്രായത്തിലായിരുന്നു പാണ്ഡോവ് സെഞ്ച്വറി നേടിയത്.
അതേസമയം, ദുലീപ് ട്രോഫിയിൽ അർധസെഞ്ച്വറി നേടുന്ന ഏറ്റവും പ്രായം കുറഞ്ഞ താരമെന്ന നേട്ടം സൂര്യവംശി സ്വന്തമാക്കി. സെഞ്ച്വറിയിലേക്ക് കുതിച്ച താരം ഹർഷ് ദുബെയുടെ പന്തിൽ ഡീപ് മിഡ് വിക്കറ്റ് ഭാഗത്തേക്ക് ഷോട്ട് കളിക്കാൻ ശ്രമിക്കുന്നതിനിടെയാണ് 92 റൺസിൽ പുറത്തായത്.
സെഞ്ച്വറി നഷ്ടമായെങ്കിലും പ്രായത്തെ വെല്ലുന്ന പ്രകടനത്തിലൂടെ ദുലീപ് ട്രോഫിയിൽ വൈഭവ് സൂര്യവംശി വീണ്ടും ശ്രദ്ധേയനായി.
