വനിതാ അന്താരാഷ്ട്ര ക്രിക്കറ്റിൽ പുതിയ ചരിത്രം കുറിച്ച് ഇന്ത്യൻ വൈസ് ക്യാപ്റ്റനും ഓപ്പണറുമായ സ്മൃതി മന്ധാന. വനിതാ ക്രിക്കറ്റിൽ ഏറ്റവും കൂടുതൽ അന്താരാഷ്ട്ര റൺസ് നേടിയ താരമെന്ന റെക്കോർഡ് സ്മൃതി സ്വന്തം പേരിലാക്കി. ഹോങ്കോങ്ങിനെതിരായ വനിതാ ഏഷ്യാ കപ്പ് മത്സരത്തിലെ തകർപ്പൻ സെഞ്ച്വറിയോടെയാണ് സ്മൃതി ഈ നേട്ടത്തിലെത്തിയത്.
മുൻ ഇന്ത്യൻ ക്യാപ്റ്റനും ഇതിഹാസ താരവുമായ മിതാലി രാജിന്റെ റെക്കോർഡാണ് സ്മൃതി മറികടന്നത്. മത്സരത്തിൽ 64 പന്തിൽ ഏഴ് സിക്സും 14 ഫോറും ഉൾപ്പെടെ 124 റൺസാണ് സ്മൃതി നേടിയത്. ഇതോടെ അന്താരാഷ്ട്ര ക്രിക്കറ്റിലെ സ്മൃതിയുടെ ആകെ റൺസുനേട്ടം 10,880 ആയി. മിതാലി രാജിന്റെ റെക്കോർഡ് 10,868 റൺസായിരുന്നു.
ഏഷ്യാ കപ്പിലെ ആദ്യ മത്സരത്തിൽ തായ്ലൻഡിനെതിരെ 19 റൺസ് നേടിയതോടെ തന്നെ സ്മൃതി അന്താരാഷ്ട്ര റൺവേട്ടയിൽ രണ്ടാം സ്ഥാനത്തെത്തിയിരുന്നു. ന്യൂസിലൻഡ് താരം സുസി ബെയ്റ്റ്സിനെ മറികടന്നായിരുന്നു അന്ന് സ്മൃതി രണ്ടാം സ്ഥാനത്തെത്തിയത്.
തുടർന്ന് ഹോങ്കോങ്ങിനെതിരെ സെഞ്ച്വറി നേടിയതോടെ മിതാലി രാജിനെയും പിന്നിലാക്കി സ്മൃതി അന്താരാഷ്ട്ര റൺവേട്ടയിൽ ഒന്നാം സ്ഥാനത്തെത്തി. മത്സരത്തിൽ സെഞ്ച്വറിയടക്കം നിരവധി നേട്ടങ്ങൾ സ്വന്തമാക്കിയാണ് സ്മൃതി മന്ധാന ക്രീസ് വിട്ടത്.
