പാകിസ്ഥാൻ ആസ്ഥാനമായി പ്രവർത്തിക്കുന്നതായി കേന്ദ്ര സർക്കാർ പറയുന്ന ഷഹ്സാദ് ഭട്ടി നെറ്റ്വർക്കിനെ (എസ്ബിഎൻ) ഭീകരസംഘടനയായി പ്രഖ്യാപിച്ച് കേന്ദ്ര ആഭ്യന്തര മന്ത്രാലയം. നിയമവിരുദ്ധ പ്രവർത്തനങ്ങൾ (തടയൽ) നിയമമായ യുഎപിഎയുടെ സെക്ഷൻ 35(1)(a) പ്രകാരം ബുധനാഴ്ചയാണ് വിജ്ഞാപനം പുറത്തിറക്കിയത്. ഇതോടെ സംഘടനയുമായി ബന്ധപ്പെട്ടവർക്കെതിരെ യുഎപിഎ ഉൾപ്പെടെയുള്ള നിയമങ്ങൾ പ്രകാരം കൂടുതൽ കർശനമായ നിയമനടപടികൾക്ക് വഴിയൊരുങ്ങും.
അതിർത്തി കടന്നുള്ള ഭീകരപ്രവർത്തനത്തോട് കേന്ദ്ര സർക്കാരിന് യാതൊരു വിട്ടുവീഴ്ചയുമില്ലെന്ന് കേന്ദ്ര ആഭ്യന്തര മന്ത്രി അമിത് ഷാ വ്യക്തമാക്കി. ആയുധങ്ങൾ, സ്ഫോടകവസ്തുക്കൾ, മയക്കുമരുന്ന് എന്നിവ ഇന്ത്യയിലേക്ക് കടത്തുന്നതിലും യുവാക്കളെയും പ്രാദേശിക കുറ്റവാളികളെയും ഭീകരപ്രവർത്തനങ്ങളിലേക്ക് റിക്രൂട്ട് ചെയ്യുന്നതിലും എസ്ബിഎൻ ഉൾപ്പെട്ടതായി ആഭ്യന്തര മന്ത്രാലയം ആരോപിക്കുന്നു. ഡിജിറ്റൽ മാധ്യമങ്ങളിലൂടെ വിദ്വേഷവും തീവ്രവാദ ആശയങ്ങളും പ്രചരിപ്പിക്കുന്നതായും മന്ത്രാലയം പറയുന്നു.
ഐഎസ്ഐ പിന്തുണയുള്ള പാകിസ്ഥാൻ ആസ്ഥാനമായുള്ള ശൃംഖലയാണ് എസ്ബിഎന്നെന്നാണ് സുരക്ഷാ ഏജൻസികളുടെ വിലയിരുത്തൽ. ഗ്രനേഡ്, ഐഇഡി, പെട്രോൾ ബോംബ് ആക്രമണങ്ങൾ, ലക്ഷ്യമിട്ടുള്ള കൊലപാതകങ്ങൾ, പൊലീസ്-പ്രതിരോധ സ്ഥാപനങ്ങളുടെയും മതകേന്ദ്രങ്ങളുടെയും നിരീക്ഷണം തുടങ്ങിയ പ്രവർത്തനങ്ങളുമായി ശൃംഖലയ്ക്ക് ബന്ധമുണ്ടെന്നാണ് അന്വേഷണ ഏജൻസികൾ ആരോപിക്കുന്നത്.
സ്വാതന്ത്ര്യദിനത്തിന് മുന്നോടിയായി ഓഗസ്റ്റ് 12ന് വിവിധ സംസ്ഥാനങ്ങളിലായി നടത്തിയ ഏകോപിത നടപടിയിൽ 14 സംസ്ഥാനങ്ങളിൽ നിന്ന് 253 പേരെ കസ്റ്റഡിയിലെടുത്തതായി കേന്ദ്ര ആഭ്യന്തര മന്ത്രാലയം അറിയിച്ചു. 80ലധികം എഫ്ഐആറുകളും 200ലധികം അറസ്റ്റുകളും എസ്ബിഎന്നുമായി ബന്ധപ്പെട്ട് രേഖപ്പെടുത്തിയിട്ടുണ്ടെന്നും മന്ത്രാലയം വ്യക്തമാക്കി. ഐഇഡികൾ, പാകിസ്ഥാൻ ഓർഡനൻസ് ഫാക്ടറിയുടെ അടയാളമുള്ള ഗ്രനേഡുകൾ, പിസ്റ്റളുകൾ, വെടിയുണ്ടകൾ, നിരീക്ഷണ ഉപകരണങ്ങൾ എന്നിവ പിടിച്ചെടുത്തതായും അധികൃതർ അറിയിച്ചു.
ഇന്ത്യയിലെ വിവിധ ഭാഗങ്ങളിൽ നടന്നതായി പറയപ്പെടുന്ന ആക്രമണങ്ങളുമായും എസ്ബിഎൻ ബന്ധിപ്പിക്കപ്പെട്ടിട്ടുണ്ട്. എന്നാൽ ഓരോ സംഭവത്തിലും സംഘടനയ്ക്കോ അതിന്റെ നേതാവിനോ ഉള്ള പങ്ക് അന്വേഷണത്തിലൂടെയാണ് സ്ഥിരീകരിക്കേണ്ടത്. പുതിയ വിജ്ഞാപനത്തോടെ നെറ്റ്വർക്കിന്റെ പ്രവർത്തനങ്ങളുമായി ബന്ധപ്പെട്ട അന്വേഷണം കൂടുതൽ ശക്തമാക്കാനാണ് കേന്ദ്ര ഏജൻസികൾക്ക് അവസരം ലഭിക്കുക.
