കൂട്ടുത്തരവാദിത്തമില്ലാത്ത മന്ത്രിസഭ; യുഡിഎഫ് സർക്കാരിനെതിരെ രൂക്ഷ വിമർശനവുമായി പിണറായി വിജയൻ

കേരളം ഭരിക്കുന്നത് കൂട്ടുത്തരവാദിത്തം നഷ്ടപ്പെട്ട മന്ത്രിസഭയാണെന്ന് പ്രതിപക്ഷ നേതാവ് പിണറായി വിജയൻ. അധികാരത്തിലെത്തി ആറുമാസം പിന്നിടുന്ന യുഡിഎഫ് സർക്കാരിനെതിരെ രൂക്ഷ വിമർശനവുമായാണ് അദ്ദേഹം രംഗത്തെത്തിയത്. തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം.

കെപിസിസി അധ്യക്ഷനുമായി പോലും ചർച്ച നടത്താതെയും മുന്നണിയെയോ പാർട്ടിയെയോ വിശ്വാസത്തിലെടുക്കാതെയുമാണ് മുഖ്യമന്ത്രി മുന്നോട്ടുപോകുന്നതെന്ന് പിണറായി വിജയൻ ആരോപിച്ചു. വാഗ്ദാനങ്ങളിൽനിന്നുള്ള തുടർച്ചയായ പിന്മാറ്റമാണ് കഴിഞ്ഞ ആറുമാസത്തെ ഭരണത്തിന്റെ സവിശേഷതയെന്നും അദ്ദേഹം വിമർശിച്ചു.

മന്ത്രിസഭയ്ക്കുള്ളിൽനിന്ന് പുറത്തുവന്ന കാര്യങ്ങൾ നിഷേധിക്കാനാകില്ലെന്നും ‘ടീം യുഡിഎഫ്’ എന്ന സങ്കൽപ്പം തന്നെ ഇല്ലാതായെന്നും പ്രതിപക്ഷ നേതാവ് പറഞ്ഞു. യുഡിഎഫ് വിഘടിത രൂപത്തിലേക്ക് മാറിയതിന്റെ പൂർണ ഉത്തരവാദിത്തം മുഖ്യമന്ത്രിക്കാണ്. ഈ അവസ്ഥയെ ജനാധിപത്യത്തിന്റെ സൗന്ദര്യമെന്ന് വിശേഷിപ്പിച്ചാൽ ആർക്കും മനസ്സിലാകില്ലെന്നും അദ്ദേഹം പരിഹസിച്ചു.

തെറ്റുകൾ തിരുത്താനും പൊതുജനാഭിപ്രായം പരിഗണിക്കാനും തയ്യാറാകാതെ വിതണ്ഡവാദങ്ങൾ ഉന്നയിച്ച് മുൻ സർക്കാരിനെ കുറ്റപ്പെടുത്താനാണ് മുഖ്യമന്ത്രിയുടെ ശ്രമമെന്നും പിണറായി വിജയൻ ആരോപിച്ചു. എൽഡിഎഫ് ഭരണകാലത്ത് ഇത്തരം പ്രശ്നങ്ങളൊന്നും ഉണ്ടായിട്ടില്ലെന്നും പാർട്ടിയെ വിശ്വാസത്തിലെടുക്കാത്ത മുഖ്യമന്ത്രിയുടെ ഏകാധിപത്യ സമീപനത്തിനെതിരെയാണ് മന്ത്രിമാരുടെ ഭാഗത്തുനിന്ന് പ്രതിഷേധമുയർന്നതെന്നും അദ്ദേഹം കൂട്ടിച്ചേർത്തു.

യുഡിഎഫ് സർക്കാരിന്റെ നയങ്ങളെയും പ്രതിപക്ഷ നേതാവ് രൂക്ഷമായി വിമർശിച്ചു. കുത്തകകൾക്ക് വിടുപണി ചെയ്യുന്ന സർക്കാരായി യുഡിഎഫ് മാറിയെന്നും സംഘപരിവാറിനോടുള്ള വിധേയത്വമാണ് സർക്കാരിന്റെ നിലപാടുകളിലൂടെ വ്യക്തമാകുന്നതെന്നും അദ്ദേഹം ആരോപിച്ചു. യുഡിഎഫ് സർക്കാരിനെക്കുറിച്ച് ബിജെപിക്ക് നല്ല മതിപ്പാണെന്നും തങ്ങളുടെ സർക്കാരെന്ന നിലയിലാണ് ആർഎസ്എസ് ഈ സർക്കാരിനെ കാണുന്നതെന്നും പിണറായി വിജയൻ പറഞ്ഞു.

കഴിഞ്ഞ എൽഡിഎഫ് സർക്കാരിനെയും നിലവിലെ സർക്കാരിനെയും താരതമ്യം ചെയ്യാൻ താനില്ലെന്നും ഇരു ഭരണങ്ങളെയും ജനങ്ങൾ വിലയിരുത്തട്ടെയെന്നും അദ്ദേഹം വ്യക്തമാക്കി.

മറുപടി രേഖപ്പെടുത്തുക