എൻഎസ്എസ് ജനറൽ സെക്രട്ടറി ജി. സുകുമാരൻ നായർക്കെതിരെ നടത്തിയ പരാമർശങ്ങളിൽ കെ.ബി. ഗണേഷ് കുമാർ മാപ്പ് പറയണമെന്ന് ആവശ്യപ്പെട്ട് എൻഎസ്എസ് പത്തനാപുരം താലൂക്ക് യൂണിയൻ നേതൃയോഗം രംഗത്തെത്തി. എൻഎസ്എസിനും സംഘടനാ നേതൃത്വത്തിനുമെതിരായ അധിക്ഷേപങ്ങളും നിന്ദാപരമായ പരാമർശങ്ങളും അംഗീകരിക്കാനാവില്ലെന്നും യോഗം വ്യക്തമാക്കി.
ഇത്തരം പരാമർശങ്ങൾ തുടർന്നാൽ ശക്തമായ സമരപരിപാടികളുമായി പൊതുരംഗത്ത് ഇറങ്ങി പ്രതിഷേധിക്കുമെന്നും താലൂക്ക് യൂണിയൻ മുന്നറിയിപ്പ് നൽകി.
എൻഎസ്എസിനെ തകർക്കുക എന്ന ലക്ഷ്യത്തോടെ സംഘടിപ്പിച്ച പരിപാടിയിലാണ് ഗണേഷ് കുമാർ പങ്കെടുത്തതെന്ന് നേതൃയോഗം ആരോപിച്ചു. സ്വന്തം രാഷ്ട്രീയവും പൊതുപ്രവർത്തനവുമായി ബന്ധപ്പെട്ട നിലപാടുകളുടെ ഫലമായാണ് അദ്ദേഹം പൊതുമണ്ഡലങ്ങളിൽ നിന്ന് ഒറ്റപ്പെടുകയും വിമർശനങ്ങൾ നേരിടുകയും ചെയ്തതെന്നും പ്രസ്താവനയിൽ പറയുന്നു.
വ്യക്തിപരമായ വിരോധവും നിരാശയും മൂലമാണ് ഗണേഷ് കുമാർ ഇത്തരം പരാമർശങ്ങൾ നടത്തുന്നതെന്ന് ആരോപിച്ച നേതൃയോഗം, അദ്ദേഹത്തിന്റെ പ്രസ്താവനകൾ സമൂഹത്തിൽ അനാവശ്യ വിവാദങ്ങൾ സൃഷ്ടിക്കുകയാണെന്നും വിമർശിച്ചു.
സുകുമാരൻ നായർക്കും എൻഎസ്എസ് നേതൃത്വത്തിനുമെതിരായ അധിക്ഷേപങ്ങൾ അവസാനിപ്പിച്ച് പരാമർശങ്ങൾ പിൻവലിച്ച് മാപ്പ് പറയണമെന്നാണ് സംഘടനയുടെ ആവശ്യം.
