വയനാട്ടിലെ ചൂരൽമല–മുണ്ടക്കൈ ഉരുൾപ്പൊട്ടൽ ദുരന്തബാധിതർക്കായി കോൺഗ്രസും മുസ്‌ലിം ലീഗും പ്രഖ്യാപിച്ച ഭവനപദ്ധതികളുടെ നിർമാണം വൈകുന്നതിനെതിരെ വിമർശനം ശക്തമാകുന്നു. കോൺഗ്രസ് ആദ്യഘട്ടത്തിൽ പ്രഖ്യാപിച്ച 18 വീടുകളിൽ ഏഴെണ്ണത്തിന്റെ നിർമാണം മാത്രമാണ് ആരംഭിച്ചിട്ടുള്ളത്. ഇവയുടെ പണികൾ കട്ട കെട്ടൽ ഘട്ടത്തിൽ തുടരുമ്പോൾ, ബാക്കിയുള്ള 11 വീടുകളുടെ തറക്കല്ലിടൽ പോലും പൂർത്തിയായിട്ടില്ല.
എട്ടുസെന്റ് സ്ഥലത്ത് 1,100 ചതുരശ്ര അടി വിസ്തീർണത്തിൽ മൂന്ന് കിടപ്പുമുറികളും രണ്ട് ബാത്ത്റൂമുകളും സിറ്റൗട്ടും ഹാളും ഉൾപ്പെടുന്ന വീടുകളാണ് പദ്ധതിയിൽ ഉൾപ്പെടുത്തിയിരിക്കുന്നത്. എന്നാൽ പ്രഖ്യാപിച്ച വീടുകളിൽ പകുതിയിലേറെയും നിർമാണം ആരംഭിക്കാത്തത് ആശങ്ക ഉയർത്തുന്നുണ്ട്. വീടുകളുടെ വാർപ്പ് ഉൾപ്പെടെയുള്ള തുടർനടപടികളെക്കുറിച്ച് കോൺഗ്രസ് നേതൃത്വം ഇതുവരെ വ്യക്തത വരുത്തിയിട്ടില്ല.
ദുരന്തബാധിതർക്കായി കോൺഗ്രസ് ആദ്യം 100 വീടുകൾ പ്രഖ്യാപിച്ചിരുന്നു. പിന്നീട് യൂത്ത് കോൺഗ്രസ് 30 വീടുകൾ കൂടി പ്രഖ്യാപിച്ചെങ്കിലും അവയും കോൺഗ്രസിന്റെ 100 വീടുകളുടെ പദ്ധതിയിൽ ഉൾപ്പെടുത്തുമെന്നായിരുന്നു വിശദീകരണം. ഇതോടെ ആകെ വീടുകളുടെ എണ്ണത്തിലും പദ്ധതിയുടെ പുരോഗതിയിലും ആശയക്കുഴപ്പം നിലനിൽക്കുന്നതായി വിമർശനം ഉയരുന്നുണ്ട്.
അതേസമയം, മുസ്‌ലിം ലീഗ് പ്രഖ്യാപിച്ച 105 വീടുകളുടെ രണ്ടാംഘട്ട നിർമാണവും വൈകുകയാണ്. ആദ്യഘട്ടത്തിലെ 51 വീടുകൾ ഫെബ്രുവരി 28ന് കൈമാറിയിരുന്നു. തുടർന്ന് 25 വീടുകൾ ജൂൺ 15നകം പൂർത്തിയാക്കുമെന്നും ശേഷിക്കുന്നവ സെപ്റ്റംബർ 30നകം കൈമാറുമെന്നും മുസ്‌ലിം ലീഗ് സംസ്ഥാന പ്രസിഡന്റ് പാണക്കാട് സാദിഖലി ശിഹാബ് തങ്ങൾ പ്രഖ്യാപിച്ചിരുന്നു. എന്നാൽ സമയപരിധി കഴിഞ്ഞിട്ടും രണ്ടാംഘട്ട നിർമാണം പൂർത്തിയാക്കാനായിട്ടില്ല.
സർക്കാർ ടൗൺഷിപ്പ് പദ്ധതിയും പുനരധിവാസ നടപടികളും വൈകുന്നതിനിടെയാണ് രാഷ്ട്രീയ പാർട്ടികൾ പ്രഖ്യാപിച്ച ഭവനപദ്ധതികളിലും കാലതാമസം തുടരുന്നത്. ദുരന്തത്തിന് രണ്ടുവർഷം പിന്നിട്ടിട്ടും സ്ഥിരതാമസത്തിനായി കാത്തിരിക്കുന്ന കുടുംബങ്ങൾക്ക് പ്രഖ്യാപനങ്ങൾ പ്രതീക്ഷ നൽകുമ്പോഴും അവ യാഥാർഥ്യമാകാൻ വീണ്ടും കാത്തിരിക്കേണ്ട സാഹചര്യമാണുള്ളത്.
