രാജ്യത്തെ തിരഞ്ഞെടുപ്പ് പ്രക്രിയയിൽ ഉപയോഗിക്കുന്ന ഇലക്ട്രോണിക് വോട്ടിംഗ് മെഷീനുകളുടെ സുരക്ഷയെയും വിശ്വാസ്യതയെയും കുറിച്ച് യാതൊരു ആശങ്കയും വേണ്ടെന്ന് മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ. ഇവിഎമ്മുകൾ ഇന്റർനെറ്റ്, ബ്ലൂടൂത്ത്, വൈഫൈ തുടങ്ങിയ ഏതെങ്കിലും വയർലെസ് സംവിധാനങ്ങളുമായി ബന്ധിപ്പിക്കാൻ കഴിയില്ലെന്നും അതിനാൽ അവയുടെ സുരക്ഷയെക്കുറിച്ച് സംശയത്തിന് ഇടയില്ലെന്നും അദ്ദേഹം വ്യക്തമാക്കി.
ഉത്തർപ്രദേശിലെ ലഖ്നൗവിലുള്ള ചരിത്രപ്രസിദ്ധമായ കാൽവിൻ താലൂക്ക്ദാർസ് കോളേജിൽ വിദ്യാർത്ഥികളുമായി നടത്തിയ സംവാദ പരിപാടിയിലാണ് ഗ്യാനേഷ് കുമാർ ഇക്കാര്യം വ്യക്തമാക്കിയത്. പൊതുമേഖലാ സ്ഥാപനങ്ങളാണ് ഇവിഎമ്മുകൾ നിർമ്മിക്കുന്നതെന്നും രാജ്യത്തെ തിരഞ്ഞെടുപ്പ് സംവിധാനം ഏറ്റവും സുതാര്യമായ മാനദണ്ഡങ്ങൾ പാലിച്ചാണ് പ്രവർത്തിക്കുന്നതെന്നും അദ്ദേഹം പറഞ്ഞു.
ഇന്ത്യയിൽ ഏകദേശം 100 കോടി വോട്ടർമാരുണ്ടെന്നും ഇത്രയും വലിയ ജനാധിപത്യ സംവിധാനത്തിന്റെ തിരഞ്ഞെടുപ്പ് നടത്തുന്നത് വലിയ ഉത്തരവാദിത്തമാണെന്നും അദ്ദേഹം ചൂണ്ടിക്കാട്ടി. 18 വയസ് തികഞ്ഞ എല്ലാ പൗരന്മാരും വോട്ടർമാരായി രജിസ്റ്റർ ചെയ്യണമെന്നും യുവജനങ്ങൾ ജനാധിപത്യ പ്രക്രിയയിൽ സജീവമായി പങ്കാളികളാകണമെന്നും അദ്ദേഹം ആഹ്വാനം ചെയ്തു.
പരിപാടിക്കിടെ ജനാധിപത്യ സംവിധാനത്തിന്റെ പ്രവർത്തനം, തിരഞ്ഞെടുപ്പ് നടത്തിപ്പിലെ നടപടിക്രമങ്ങൾ, ഇവിഎമ്മുകളുടെ സുരക്ഷാ സംവിധാനങ്ങൾ എന്നിവയെക്കുറിച്ച് വിദ്യാർത്ഥികൾക്ക് വിശദമായ ബോധവത്കരണവും നൽകി.
