മൂന്ന് വർഷത്തെ ഇടവേളയ്ക്ക് ശേഷം ദുൽഖർ സൽമാൻ നായകനായി എത്തുന്ന പുതിയ മലയാള ചിത്രം ‘ഐ ആം ഗെയിം’ ഓഗസ്റ്റ് 20-ന് ആഗോളതലത്തിൽ തിയറ്ററുകളിലെത്തും. ഓണം റിലീസായി എത്തുന്ന ചിത്രം ഇതിനോടകം തന്നെ സിനിമാ പ്രേമികൾക്കിടയിൽ വലിയ പ്രതീക്ഷകൾ ഉയർത്തിയിട്ടുണ്ട്.
നഹാസ് ഹിദായത് സംവിധാനം ചെയ്യുന്ന ഈ ചിത്രം, അദ്ദേഹത്തിന്റെ അരങ്ങേറ്റ ചിത്രം ‘ആർഡിഎക്സ്’ന് ശേഷം എത്തുന്ന ബിഗ് ബജറ്റ് ആക്ഷൻ ത്രില്ലറാണ്. ദുൽഖർ സൽമാന്റെ കരിയറിലെ 40-ാം ചിത്രമാണിത്.
ദുൽഖറും ജോം വർഗീസും ചേർന്ന് വേഫെറർ ഫിലിംസ് ബാനറിൽ നിർമ്മിക്കുന്ന ‘ഐ ആം ഗെയിം’ മലയാള സിനിമയിലെ ഏറ്റവും വലിയ പ്രോജക്റ്റുകളിൽ ഒന്നായാണ് ഒരുക്കിയിരിക്കുന്നത്.
സജീർ ബാബ, ഇസ്മായിൽ അബൂബക്കർ, ബിലാൽ മൊയ്തു എന്നിവർ ചേർന്നാണ് ചിത്രത്തിന്റെ തിരക്കഥ ഒരുക്കിയത്. 11 മാസങ്ങളിലായി 156 ദിവസത്തോളം നീണ്ടുനിന്ന ചിത്രീകരണത്തിലൂടെ പൂർത്തിയായ സിനിമ, തെന്നിന്ത്യയിലുടനീളമുള്ള നൂറിലധികം ലൊക്കേഷനുകളിലായാണ് ഷൂട്ട് ചെയ്തത്.
ആക്ഷൻ ത്രില്ലർ വിഭാഗത്തിൽ ഒരുക്കിയിരിക്കുന്ന ചിത്രം ദുൽഖർ സൽമാന്റെ കരിയറിൽ പുതിയ ഒരു മൈൽസ്റ്റോൺ ആകുമെന്ന പ്രതീക്ഷയിലാണ് ആരാധകർ.
