ദക്ഷിണേന്ത്യൻ ചലച്ചിത്രരംഗമാണ് തന്റെ അഭിനയ ജീവിതത്തെ രൂപപ്പെടുത്തിയതെന്നും ഒരു നടിയെന്ന നിലയിൽ വളരാനും പരിണമിക്കാനും ഏറ്റവും വലിയ വേദി നൽകിയതും ഈ വ്യവസായമാണെന്നും നടി സീരത് കപൂർ. ഐഎഎൻഎസിന് നൽകിയ അഭിമുഖത്തിലാണ് താരം ഇക്കാര്യം വ്യക്തമാക്കിയത്.
വ്യത്യസ്ത ഭാഷകളിലും സംസ്കാരങ്ങളിലും പ്രവർത്തിച്ചതിലൂടെ കൂടുതൽ സഹജമായും സാഹചര്യങ്ങളോട് പൊരുത്തപ്പെടുന്ന രീതിയിലും അഭിനയിക്കാൻ കഴിഞ്ഞതായി സീരത് പറഞ്ഞു. “ദക്ഷിണേന്ത്യൻ സിനിമയാണ് ഒരു അഭിനേത്രിയായി വളരാനും പരിണമിക്കാനും എനിക്ക് അവസരം നൽകിയത്. വിവിധ ഭാഷകളിലും സംസ്കാരങ്ങളിലും പ്രവർത്തിച്ചത് ഓരോ കഥാപാത്രത്തെയും കൂടുതൽ ആത്മാർത്ഥമായി അവതരിപ്പിക്കാൻ എന്നെ പ്രാപ്തയാക്കി. മനുഷ്യ വികാരങ്ങൾക്ക് ഭാഷയുടെ അതിരുകളില്ലെന്ന വിശ്വാസം അതിലൂടെ കൂടുതൽ ശക്തമായി,” സീരത് പറഞ്ഞു.
ഇന്നത്തെ സിനിമാലോകത്ത് അഭിനേതാക്കൾ നേരിടുന്ന ഏറ്റവും വലിയ വെല്ലുവിളി ശരിയായ കാരണങ്ങളാൽ പ്രേക്ഷകരുടെ ഓർമ്മയിൽ നിലനിൽക്കുകയാണെന്നും താരം അഭിപ്രായപ്പെട്ടു. “പ്രശസ്തി ക്ഷണികമാണ്. ട്രെൻഡുകൾ മാറിക്കൊണ്ടിരിക്കും. എന്നാൽ മികച്ച പ്രകടനങ്ങളിലൂടെ നേടുന്ന ബഹുമാനമാണ് എന്നും നിലനിൽക്കുന്നത്. ആളുകൾ നിങ്ങളുടെ മുഖം മാത്രമല്ല, നിങ്ങൾ സമ്മാനിച്ച വികാരങ്ങളെയാണ് ഓർക്കേണ്ടത്,” സീരത് കൂട്ടിച്ചേർത്തു.
അതേസമയം, സീരത് കപൂർ ഇപ്പോൾ ‘ജാതസ്യ മരണം ധ്രുവം’ എന്ന ചിത്രത്തിന്റെ റിലീസിനായി ഒരുങ്ങുകയാണ്. ചിത്രത്തിന്റെ ക്ലൈമാക്സ് രംഗം ചിത്രീകരിക്കുന്നതിനിടെ പരിക്കേറ്റ അനുഭവവും താരം പങ്കുവച്ചു.
ക്ലൈമാക്സ് രംഗത്തിനിടെ കൈയിൽ ധരിച്ചിരുന്ന വളകൾ ഷൂട്ടിങ് പൂർത്തിയായപ്പോൾ കൈത്തണ്ട വീർന്നതിനാൽ അഴിച്ചുമാറ്റാൻ കഴിയാതെ വന്നതായി സീരത് പറഞ്ഞു. എല്ലാ സുരക്ഷാ മുൻകരുതലുകളും നിർമ്മാണസംഘം സ്വീകരിച്ചിരുന്നുവെങ്കിലും ചില അനുഭവങ്ങൾ, പ്രത്യേകിച്ച് കഥാപാത്രത്തിനായി പൂർണമായി സമർപ്പിക്കുമ്പോൾ, ഒഴിവാക്കാനാകാത്തതാണെന്നും അവർ വ്യക്തമാക്കി.
മുതിർന്ന നടൻ ജെ.ഡി. ചക്രവർത്തിക്കൊപ്പമാണ് സീരത് ചിത്രത്തിൽ അഭിനയിക്കുന്നത്. ചിത്രം അടുത്ത മാസം അഞ്ച് ഭാഷകളിലായി തിയറ്ററുകളിൽ റിലീസ് ചെയ്യാനാണ് ഒരുങ്ങുന്നത്.
